دەوڵەتا عێڕاقێ چ جاڕا نەبویە جهێ دلنیایی و ئومێدا هوڵاتیێن خۆ، بەڕدەوام عێڕاق دەوڵەتەکا پری گیروگڕفت بویە، ل دەستپێکا دامەزراندنا دەوڵەتا عێڕاقێ هەتا ڤێ قوناغێ یان دەوڵەتەک بیە ب زوڕیا هێزێ هاوڵاتیێن خو بگشتی و کوڕد بتایبەتی کوشتنە و ژناڤ بڕنە، یانیش ل ئەگەڕێ لاوازیا خۆ هەڕدەم جهێ تیرورو فتنە و کوشتن و دزیێ بیە، عێڕاق نەشیا ببیتە نیشتیمان بو هاوڵاتیێن خۆ، چونکی یان سونا حوکم یێ کڕی و هەوڵا ژناڤ برنا کوڕد و شیعا دایە، یانیش شیعا حوکمێ کڕی و هەڕ دیسان هەوڵا ژناڤبڕنا کوڕد و سونا دایە، واتە ب چ شێوە و جوڕەکێ حکومڕانیا عێڕاقێ سود و مفا بو کوڕدا نەبونە، ل ئەگەڕێ زوڵم و زوڕداڕیا حکومڕانیا عێڕاقێ هاوڵاتی خو بخودانێ نیشتیمانی نەزانیە، مادەم دەوڵەت پێناسا هەمی هاوڵاتی نەکەت، نابیتە نیشتیمانەکێ هەڤبەش. ئەو ساڵێن کوڕدا دگەل عێڕاقێ بوڕاندین بهەمی شێوەکێ پەشیمانیە، چونکی دەوڵەتەک ئەگەڕ ڕێزێ ل هاوڵاتیێن خو نەگڕیت و تە بهاوڵاتی حسابنەکەت، ئەسلەن هەڕ نەبیت گەلەک باشترە، ئەڤە نێزیکی سەد ساڵانە کوڕد ل ناڤ دەوڵەتا عێڕاقێ، ژبلی زەرەر و زیان چ مفا نەدیتیە، ئەڤڕوش ئەگەڕ کوڕدستانێ بڤێت ل کوشتن و ئاوەڕەکڕن و برسیکڕن و مەزنتڕین جوڕێن عەزابێ خلاسبیت پێویستە خو ل عێڕاقەکا سقەت جودا بکەت، باوڕناکەم هاوڵاتیێ کوڕد دژایەتیا سەربەخویا کوڕدستانێ بکەت لێ باوەڕدکەم ل سەربەخویێ دودل ببن چونکو بەشەک ژ لایەنەکێ کوڕدی بەڕدەوام کاڕ لسەڕ شکاندنا دەستکەفتێن کوڕدا دکەت، وان دڤێت شکەستنێن خۆ فەشێڕن ل ناڤ پڕسەکا بڤی شێوەی یامەزن، کوڕدستان ئەڤڕو جهێ ئومێدا کێم نەتەوە و ئاینایە، جهێ ئومێدا سەدان هزاڕ ئاواڕایە کو ل جەڕگێ عێڕاقێ دڕەڤن و هەواڕا خۆ دگەهینە کوڕدستانێ، کەسێ باوەڕی ب ژیان و ماڵێ خو نەمایە ل ناڤ عێڕاقێ، کوشتن ل عێڕاقێ سناهیتڕین شولە، خوزیا عێڕەقیا ئاڕامیا کوڕدستانێیە خەلک ل پایتەختێ عێڕاقێ دهێنە کوڕدستانێ شول دکەن، لبەڕ ڤێ چەندێ و چەندین هەجەتێن دی، تاکە ڕێکا لبەڕ کوڕدا هەی بو خلاسبین ل شەر و کوشتن و برسیکڕنێ ئەوژی سەربەخویی یە، هەبونا دەوڵەتا کوڕدستانێ واتایا هەبونا هاوڵاتیەکێ ئازاد و خودان ماف ددەت.