باژێرێ سلێمانیێ ئەو باژێرێ باشوورێ کوردستانێ یە کو ھەردەم جھێ شانازیا خەلکێ کوردستانێ ، ژبەر پێگەھا وێ یێ رەوشەنبیری و سیاسی و نەتەوایەتی و کلتوری و ....ھتد ، لبەر ڤێ پێگەھا پیرۆز ناسناڤێ پاییتەختێ رەوشەنبیری یێ ھەرێما کوردستانێ پێ ھاتیە دان . ئەڤەژی بریار و ناسناڤەکێ د جھێ خودا بوو چونکی باژارێ سلێمانیێ ب درێژاھیا دیرۆکێ ھەردەم بنگەە و کانگەھەکا پەروەردەیا رەوشەنبیری و نەتەوایەتی بوویە و یا پڕە ل کەسایەتیێن وەلات پارێز و نشتیمان پەروەر و کەسایەتیێن بلیمەت د وارێن سیاسی و ئەدەبی و پرانیا خەلکێ ڤی باژاری و دەورو بەر راستیا ڤێ چەندێ دزانن و لسەر رێکا وان ھایتنە پەروەردەکرن و د بەرھەڤن لسەر وێ رێکێ بەردەوامیێ ب ژیان خۆ بدەن . مخاین دڤان سالاندا گرۆپەکێ دویر ژ رەوشتێ سلێمانیێ و سلێمانیان کۆ ھەلگر و پەروەردەکارێن قوتابخانەیەکا دووبەرەکیێ و ئاژاوەگیریێ و خۆ سەپاندنێ نە و دژی ھەر تشتی نە کۆ د بەرژەوەندا وان یا تایبەت نەبن و ژمێژەیە کار لسەر گۆرینا سەرو سیما و ڕەوشت بلندیا سلێمانیێ دکەن ئەڤرۆ خۆ کریە زمان حالێ ڤی باژارێ ھەلمەت و قوربانی . پرانیا سەرکردایەتیا بزاڤا گوڕان دەرچویێن ڤێ قوتابخانێ نە و دڤێت لسەر ڤی بنەمایی جارەکادی دووبەرەکیێ و دەڤەردەڤەرکانێ ل ھەرێما کوردستانێ بەلاڤ بکەن و ئازادی و دیموکراسیا کوردستانێ کریە دەلیڤە بۆ شاراندنا سازیێن خۆ یێن راگەھاندنێ دژی بەرژەوەندێن گشتی یێن نەتەوی و نشتیمانی و خەلکەک پێ ھاتیە سەردابرن . ئەگەر نە ب درێژاھیا دیرۆکێ کەنگی خەلکێ سلێمانیێ و دەورو بەر دژی رزگاریا کوردستانێ و راپرسی و سەرخۆبوونێ بوونە ...! ، بەرۆڤاژی خەلکێ ڤێ دەڤەرا نشتیمان پەروەر ستوونا شۆرەش و سەرھەلدان و خەبات و قوربانیێ بوونە و ژبەر ھەلویستێ خۆ یێ نەتەوی توشی ئەنفال و کیمیا باران و وێرانکرنێ بوونە ، ھەر ژبەر ھندێ ب ھزاران ژ خەلکێ وێ دەڤەرێ ب گشتی کەفتینە دزیندانێن رژێمێن عیراقێ . جھێ پسیارێ یە ، چما ئەو خەلکێ ژ پێخەمەت ئازادی و رزگاریێ بڤی رەنگی خەبات کربیت و قوربانی دابن ، ل دەرفەتا دووماھیێ بیر و باوەر دێ ھێنە گۆڕین و دژی وێ ئارمانجێ راوەست ئەوا خەبات بۆ کربیت و قوربانی بۆ دابن ...! . ئەز ب باوەریەکا مۆکۆم ڤە دبێژم ئەڤ سیاسەت و بەرنامێ بزاڤا گوڕان ئەڤرۆ پەیڕەو دکەت نە بەرنامە و سیاسەتا خەلکێ سلێمانیێ یە ، بەلکی بەرۆڤاژی راستە . لێ گرۆپەکێ بچوکێ تێکدەر و ڕەشکەرێن روویێ سپی و زێرینێ خەلکێ سلێمانیێ یە و دڤێت دیرۆکا پر سەروەریا وێ دەڤەرێ د ھەمی واران دا بەزر و بەرۆڤاژی بکەت . ب سەرگرتنا پیلانا وان مەزنترین شەرمزاری یە بۆ سلێمانیێ و خەلکێ وی بەری دەڤەرێن دیتر یێن کوردستانێ ، ئەز باوەرم خەلکێ پایتەختێ رەوشەنبیریێ ھەرێما کوردستانێ لڤێ چەندێ مەزنتر و بلندترە و چجاران ناکەڤیتە بن ئەجندایێن ڤی گۆرپێ کێم و دێ بەردەوام بیت لسەر ڕەوشت و رەوشەنبیریا خۆ یا نەتەوی و کوردایەتی و ب کەرنەڤال و ب ھەستەکا مۆکۆنا نەتەوی دێ بەشداریێ ل راپرسیا سەرخۆبوونا کوردستانێ کەن و ب دەنگەکێ بلند بانگەوازیا بەلێ کەن . چونکی رەشەنبیر بەلکی ھەرکەسەکی بەرژەوەندیا کشتی دپارێزن و داکۆکیێ لسەر بدەستڤەئینانا ماف و ئارمانجێن نەتەوی دکەن و د ئامادەنابن سەرخۆبوونا کوردستانێ بکەنە قوربانی بەرژەوەندێن وی گرۆپێ چیک و رێکێ نادەن ئەو نوونەرایەتیا سلێمانیێ بکەن ، چونکی پرۆژێ دەولەتبوونێ پرۆژەیەکێ نشتیمانی یە و نە ملکێ پارتی و سەرۆک بارزانی و وان پارتیێن داکۆکیێ لسەر سەرخۆبوونێ دکەن , بەلکی ئەوێن کار لسەر چەسپاندنا وێ دکەن .