سەربڕینی دووکەس، دەستڕێژی گوللە لە جەرگەی شار، ئاماری شەرمنانەی کوژراوان لە مانگی رابردوو، رەسمکردنی ئەو سایکۆلۆجیەتە شەرانگێزەیە کە لە رەحمی ئەو سیاسەتە خراپەی سلێمانی لەدایک بووە، بە مانایەکی دیکە توندو تیژیەکانی ئەمشەو چەند شەوی رابردوو دەرهاویشتەی ئەو چاولەیەک سورکردنەوەو پەنجەشکاندنی سیاسیەیە کە ئەگەر تا دوێنێ دەرفەتی بۆ بەیەکەوە سیاسەت کردن نەهێشتبێتەوە، ئاوا ئەمڕۆ خەریکە دەرفەت بۆ بەیەکەوە ژیانی کۆمەڵایەتیش ناهێلێت، ئەمانی ژیان لەسلێمانی کەوتۆتە ژێر پرسیار.
گواستنەوەی مۆدێلی نائارامی چەند مانگی رابردووی چەمچەمال بۆ سلێمانی و بێدەنگ بوونی ڕۆشنبیرانی شار مەترسیەکە گەورەتر دەکات، هەڵبەتە بەتەنیشت زیادبوونی دەنگی گوللە رووداوی دلتەزێنتر دەبنە هەوال، بۆیە پێویستە ڕێگری لەبەچەمچەمال بونی سلێمانی بگیرێت، ئەمەش تەنهاو تەنها بە گوێ نەگرتن لەو سیاسیانەی ناوچەکە درووست دەبێت کە رق دەبەشنەوە.
سیاسەتی رەدکردنەوەی لایەنی بەرامبەر خاوەنی ئەم دۆخەی سلێمانیە کە تەنها لەیەک مانگ هەشت کەس بوونەتە قوربانی گوللە و ئەڕبابەکانی، هیوای بەخۆ داچونەوەتان بۆدەخوازم،
ئارامی بۆ شارەکەی شێخ.