مە ھەمی دەمەکی گازندە ژ بابۆکالێن خۆ دکرن. ئەو پێشمەرگە بین و ھندەک جاران مە چەند ھەیڤان نەددیتن. نۆکە ئەم تێدگەھین و دزانین ئەو دچۆن بەرگریێ ژ مە بکەن دا ئەم ڤان ڕۆژا ببینین. ڤان چەند سالا مە گەلەک گۆە ل گەنج و قوتابیان دبیتن و بەردەوام ژ گەلەک کەس و لایەن و دیاردێن وەکی گەندەلیێ و نەدادپەروەریێ و ... دکەن. مافێ وانە وان مفا ژ زۆر تشتی وەرگرتبایە.
ئەز نۆکە دزانم مە گازندەیێن بێ مفا ژ دەیبابێن خۆ دکرن. بابێ من ل جەنگێ خۆپەرێستان و ناسیۆنالیزمێ بی نەگەھشت بۆ مە گەلەک تشتان دابین بکەتن. ئەز نابێژم ھەمی مرۆڤەک لڤێ کوردستانێ مەلیۆنێرە، بەلێ ل بیرا منە ل کۆلیژەکێ سالێن نۆتان ھەمیێ دوو ترۆمبێل ل حەوشێ بین، نۆکە وێ کۆلیژێ ھند ترۆمبێل لێ دسەکنن، ھەر پێکڤە بێنە دەوامێ سێ قات لسەر ئێک بێنە ڕێزکرن و سەفتاندن ھێشتانێ جھێ وان ناکەتن. فەڕاشێ مە ترۆمبێلا وی ژ یا پاشایەکێ وەلاتان نویترە.
ئەڤ ڕۆژە ئەون یێن گەنجێن مە قەرەبۆیا وان کێماسییان بکەن ئەوێن بابێ وان ژبەر داگیرکەران نەشیا بخوینیتن و مانەخواندەوار و ئەوی خواند و بیە خۆدان باوەرنامە. ھەرچەندە دەلیڤێ کاری کێمە لێ ئەو ژی ب ئەگەرێ داگیرکەرانە نە ھیچ تشتەک دیتر.
جھێ داخێ یە یێن ھەین نەک وەسا نینن بەلکۆ ب دەڤ و ڕەنگ و دەنگ و و نڤێسینا خۆ نیشان ددەتن ھەکەر بشێتن دێ کوردستانێ ژ سەر نەخشەیا جیھانێ ڕەش کەتن، تنێ چونکی کەرب ژ پارت یان کەس یان تشتەکی ڤەدبیتن. نە مخابن!؟
ل فێیسبووکێ ئێک ژ وان ب مەزناھی ھاتبی نڤێسین: # ماش .
داعشێ ب ڤی کەرەستەی جیھان خرابکر بۆ چ و چنە، و ئەم حەز دکەین گەنجێ مە جیھانێ و کوردستانێ پێ ئاڤا بکەتن. ئایا ھوین نابینن ئەڤ گەنجە لڤێ قۆناغا دەستھەلاتێ و پشتی شازدە سالان خواندی، ل شوینا ئاڤاکرنا کەساتییا ھەڤالێن خۆ، ڤێ گەندەلیێ دگەل وەلات و سەروەت و سامانێ خۆ و نیشتمانێ خۆ دکەتن، سۆبەھی ل شوینا ھندەکان ببیتە بەرپرس دێ وی َچەندی َکەتن یا ئەو دکەتن بەلکۆ ژی گەلەک کمباختر و خرابتر !؟ کارێ ئەڤی گەنجی وەکی ھندێ یە ئەو کێلۆیەکا گویزا ب بھایەک گران بکڕیتن و بھاڤێژیتە سەر جەھدێ.
ئایا ئەڤە ژی جۆرەکێ گەندەلیێ و نەدادپەروەریێ نینە؟ بلا ئەڤ گەنجە گازندەی ژ کەسێ نەکەن، بەلکۆ ژ خۆ بکەن. ئەو نۆکە دژی خۆ و نیشتمان و بەرژەوەندیێ، خۆ و وەلاتی َخۆنە پا سۆباھی دێ چ کەن؟ ئەوێ ئەڤرۆ لڤێ قۆناغا پێدڤی و ناسک ل شوینا کارکرن بۆ سەرکەفتنا ڕیفراندۆما کوردستانێ، بێتن و گەندەلیەکا ھۆسا بکەتن و ڤان سەنی و مەنیکا و تشتۆکێن ھۆسا بێ بھا پارەی ل فێسبووکی بڕێژن، سۆبەھی دێ گەندەلیێن مەزنتر کەن و وەسا ژی خەلک گلەیا ژ وان کەتن.
فەرە گەنجێ مە بیرا خۆ بینیتن ئەو ئەڤرۆ یێ د جەنگەکێ مەزن بۆ مسۆگەرکرنا ئاییندە و پاشەڕۆژا خۆ و وان، سروشتێ سایکۆلۆژیایا تاک تاکێ مە کوردستانیان دخوازیتن ھەر ئێک ژ مە و نەخاسمە گەنج ل ڤان ڕۆژانێن ڕیفراندۆمێ پترتر ژ ھەر دەم و کەسەکی د خزمەتا ڤێ پاشەڕۆژێ دا بیتن، ھەکەر نە بلا خۆ ل ھیڤیا گازندە و ڕەخنە و لەعنەتا یێن دویڤ خۆ دا بگرن.
*بسپۆرێ زانستێن پێداگۆگی و پەروەردەیی/فاکۆلتییا پەروەردە/ زانینگەھا زاخۆ