پێوستە ئیتر لایەنە سیاسییەكانی كوردستان ، بە روحیەتێكی پێشمەرگانە ئەم قۆناغە مێژوویی و هەستیارە بە سوود و بەرژوەندیی میللەتەكەمان تەواو بكەین .فیداكاری و خوێنبەخشینی هێزی پێشمەرگەی كوردستان شانازیی و مێژووییەكی گەورەی تۆمارٍ كردووە. خەباتی ئەمجارەی پێشمەرگە رۆحی نەبەزیوی كوردبوون و هەوڵی بێ وچان، گۆڕینی ئاراستەی شەڕ لە شكستەوە بۆ سەركەوتنی بەردەوامی هێزی پێشمەرگە بەرامبەر بە دوژمنێك كە دوو وڵاتی بە گیر هێناوە، ئەو راستییەمان پێ دەڵێت كە گەلەكەمان بۆ سەرفرازی و سەربەخۆیی كوردستان كەوتووەتە سەر شاڕێگە و دنیایش ئەو راستییەی بینی كە كورد چەند دژی تاریكی و چەندیش هێزی ئازادی و رووناكییە.هاوكات لەگەڵ نەبەردی پێشمەرگە و قارەمانییەتی ، مێژووی كوردستان ئەوەمان فێر دەكات كە خاكەكەمان هەمیشە شوێنی بیر و بۆ چوونی جیاواز و نەتەوە و ئاینی جیا بووە و ئەمەیش نموونەیەكە لە وڵاتانی ناوچەكە بەدی ناكرێت، بۆیە ئەو یەكتر قبووڵكردن و لێ بووردەیی و پێكەوەژیانە بوونەتە سەرچاوەی ویستی میللەتێك كە ئامانجی ئازادی و سەرفرازیییە بۆ ئەوەی لەگەڵ گەلانی دنیا بە برایەتی و ئاشتی و سەربەخۆیی پێكەوە بژین.ئێستە مێژوو ئاوڕی لە كوردستان داوەتەوە و دنیا بە سەرسامی لە ورەی كورد راماوە، راستە دابەشكردنی كوردستان ستەمێك بووە دژی گەلانی كوردستان كراوە، بەڵام ویستی كوردستانییان چیتر ستەم قبووڵ ناكات و دنیایش لەوە گەیشت كە لە ناوچەكەدا تەنیا كورد چەوساوە بووە، لە كاتێكدا هەر كوردیش تامەزرۆی ئازادی بووە، بۆیە ئێستە راستیی كوردستان دەبینن و لە دوورترین جوگرافیای دنیاوە بەدەم داواكانی كوردستانەوە دێن، گرنگە و دەبێت تواناكانی كوردستانیش بەپێی هەلومەرجی سیاسیی تازە رێك بخرێنەوە و پرسی رزگاریی كوردستان بكرێتە ئامانجی ستراتیژی هەموو لایەن و كەسێك و هیچ بەرژەوەندییەك نەخرێتە پێش ئەو ئامانجە، چونكە روونە تەنیا رێگە بۆ گەیشتن بەو ئامانجە یەكریِزی و یەكگرتنی كوردستان و وەرگرتنی ئەو گرنگیدانەی دنیایە وەك خۆی و وەڵامدانەوەی لە ناوخۆ لەو ئاستە بەرزەی كە وڵاتانی دنیا سەیری كوردستانی پێ دەكەن.بەهۆی رووداوەكانی ئەم دواییە و خەباتی نەپچڕاوی كورد بۆ گەیشتن بە سەربەخۆیی، وای دەبینین ئاسۆی كوردستان دەركەوتووە و داهاتوویەكی گەش چاوەڕوانمانە، بۆیە زۆر پێویستە بەرپرسان لە ئاستی قارەمانی پێشمەرگە و قوربانییان هەنگاوی گەورە بنێن و هەموو ئامانجێكی بازرگانی و تایبەت بەلاوە بنێن تا كوردستان ئەم پێشوازییە گەرمەی دنیا بە جوانی بەڕێوە ببات و كۆتاییەكەی بە دەوڵەتێكی نوێ كوردستان بۆ ناو وڵاتانی دنیا ببینین.
ئەزموونی هەرێمی كوردستان لە رووی بەرێوەبردنی سیستەمی حوكمرانی سەڕەرای دروستكردنی دەیان كێشە و ئاستەم لە بەردەم پێشكەوتنی دۆزی رەوامان بە تایبەت دوای روخانی رژێمی بەعسی و دواتر هاتنەئارایی رژێمی مالیكی و تا ئێستاش ، بەڵام بە شێوازێكی زۆر سەركەوتووانە لە رووی سیاسی و دیپلۆماسی و سەربازی و ئێستاش هەنگاویی گەورەی ئابووری ناوە و متمانەی ئیقلیمی و نێودەوڵەتی بەدەستهێناوە .پرسی دەوڵەتی كوردستان وەك دەوڵەتی دیفاكتۆ و وەك ئەوەی ئێستا هەیە كەوتۆتە ئاستی دەوڵەتی دیفاكتۆی تایوان، راستە تایوان لە رووی فەرمییەوە وەك بەشێك لە چین حیساب دەكرێت، بەڵام لە رووی مامەڵەكردن و بەڕێوەبردن و سیستمی حوكمڕانییەوە، نەك هەر لە چین ناچێت، بەڵكو سیستمی سیاسیی تایوان تەواو تەواو دژی سیستمی كۆمۆنیستی كۆماری چینی میللییە، بەڵام لەبەر ئەوەی لەماوەی نزیكەی 46 ساڵی رابردوودا تایوان نەیتوانیوە خۆی لە پاشكۆیەتی چین رزگار بكات، ئێستاش كە پرسەكە دێتە سەر ئەوەی وەك دەوڵەتێكی خاوەن سەروەری مامەڵە لەگەڵ تایوان بكرێت، یاسای نێودەوڵەتی پشتی چین دەگرێت، بۆ كوردستانیش كە ئێستا لە هیچ روویەكەوە لە عێراق ناچێت و سیستمی سیاسی كوردستانیش نەك هەر لە سیستمی سیاسیی ئێستای عێراق ناچێت، بەڵام لەبەر ئەوەی نەبووینە دەوڵەتێكی خاوەن سەروەریی، ئەوا لەزۆر حاڵەتەدا هاوپەیمانەكانمان ناچاردەبن لە چوارچێوەی یاسای نێودەوڵەتیدا نەتوانن وەك دەوڵەتێكی خاوەن سەروەریی مامەڵە لە كوردستاندا بكەن.ئەركە سەختەكەی كوردستان بۆ دەوڵەتی سەربەخۆ، ئەو ئاسۆیە گەشەشی لەبەردەمە و تا راددەیەكی زۆر بێدەنگیی كۆمەڵگەی نێودەوڵەتی لەبەرامبەر ئەو ئامانجە رەوایەی كورد، جۆرێك لە رەزامەندی لێ دەخوێندرێتەوە كە پێمان دەڵێن: ئەگەر بە ئاشكراش پشتگیریتان نەكەین، بەڵام دژایەتی دەوڵەتی كوردستان ناكەین، سەرۆكی كوردستانیش چەندین جار لەسەر ئەم پرسە رایگەیاندووە، "گرنگ ئەوەیە كۆمەڵگەی نێودەوڵەتی دژی دەوڵەتی كوردستان رانەوەستن"، بۆیە لە كاتێكدا كۆمەڵگەی نێودەوڵەتی دژی راگەیاندنی دەوڵەتی كوردستان رانەوەستن، ئەوا پرسەكە دەمێنێتەوە سەر ئەوەی چۆن لە ناوخۆی كوردستاندا خۆمان كۆدەكەینەوە و بۆ ئەم هەنگاوە چارەنووسسازە خۆمان ئامادەكەین و نێو ماڵمان یەكریز بكەین و بەیەكهەڵوێست پشتیوانیی هەنگاوەكانی سەرۆكی كوردستان بین بۆ بەدیهێنانی ئاواتی لە مێژینەمان كە ئەویش دەوڵەتی سەربەخۆیی كوردستانە ..