جیهان ودەڤەرێن دەروبەرێن مە دگورانکاریەکا ب لەز دانە و نێزیکە دێ گورانکاریێن مەزن ل دەڤەرێ رویدەن چ یێن رامیارى یان تەکنولوژى وزانستى یان ژینگەهى یان هونەرى وکەلتورى وجڤاکى، بەلێ یا ژ هەمووان گرنگتر گوارنکاریێن رامیارینە کو دێ ب سەر دەڤەرێدا هێنە خوارێ، راستە شەرێ داعشێ هندە دێ ب دوماهى هێت؟، بەلێ ژلایەکێ دیتر ڤە بزاڤا دورستکرنا هندەک ئەنیێن (جبهە)دیێن شەرى وجیوسیاسى یێن بهێز دهێتە کرن ل دەڤەرێ بۆ نمونە، چێکرنا (هیلال) شیعى ژلایێ ئیرانێ ڤە و ل بەرامبەرى وان ئەنیا سنى ژلایێ عەرەبستانا سعودى ڤە،و لسەرەراى هندێ ژى سەرهەلدانا کێشا وولاتێ قەتەر وهندەک وولاتێن عەرەبى، ئەڤە وەکو گورانکاریێن وولاتێن هەرێمى، وژلایێ نافخویا عێراقێ ڤە هاتنا حەشەدا شەعبى بو دەڤەرێن کوردستانى و گەفکرنا هندەک سەرکردێن حەشدێ وەکو ئەو دبێژن، ئەم دشێین ب ڕۆژەکێ هەرێما کوردستانێ هەمیێ داگیر کەن و یان ژى ئاخفتنێن نورى مالکى، ل دەمێ گوتى، ئەگەر پێدڤى کر دێ هێزێ رەوانەى هەرێما کوردستانێ کەین و دژى هەرێمێ دێ ب کارئینین، زێدەبارەى ڤان هەمیان کاودانێن نافخوی یێن هەرێما کوردستانێ کو هەتا نوکە هێزێن رامیارى نەگەهشتینە چ رێکەفتنان، هەر دیسان تا نوکە چ بەیانامە ل سەر رێکەفتنێن ئابوریێن حکومەتا هەرێما کوردستانێ یان ل سەر هندەک بەرژەوەندیێن تاک لایەنە نەهاتینە دان، وژبیر نەکین ژنویکا هندەک سیاسەتمەدار وپەرلەمانتارێن کورد بسەر "رەسەنەیەتیا نفشێ" خۆە هەلبون و زانى کو عەرەبن، ئەڤە هەمى روێدان وئاخفتن و گوتارن رۆژانە دهێنە گوتن و نڤێسین، لەوما پێدڤیە گەلێ کورد ب گشتى وتاکێ کورد ب تایبەتى ب چاڤەکێ ڤەکرى وبهێز بەرێخو بدەتە هەلسوکەفت وکار وچالاکیێن دۆژمنێن خۆە، دڤێت گوهێن خۆە بهێز بکەت ونەرم نەکەت ونزمترین دەنگ وبهێزترین دەنگێن دەربارەى کورد وکوردستانێ ل دەڤەرێ دهێنە کرن وەرگریت وبەردەوام بزاڤێ بکەت چاڤ ڤەکرى بن گوه ل پێژانان بیت، چونکە چاڤ نقاندنا ژ رویدانێن رویدەن و وەسان خۆە بدەتە دیار کرن هەر وەکو چ نەدیتى وخۆە کەڕو لال بکەت وبێژیت، نەمەگوه ل چ بویە ونە چ دەنگ وباس هاتینە گوهێن مە ژ وان یێن دناڤ جڤاکى ول دەوروبەرێن مە دهێنە گوتن، بلا ئەو دپشت ڕاست بن نە ئەڤە چ ژ بارودوخى دگهوریت ونە چ تشتان بدووماهی دئینیت، ژبەر هندێ ب نقاندنا چاڤێن خۆە وگرتنا گوهێن خۆە ئەو تشتێن دهێنە رویدان نە بەرزە دبن ونەدهێنە راوەستیان، ئەو رویدان هەر دێ رویدەن وگوتن و ئاخفتن ژى هەر دێ هێنە گوتن، وهەر دێ ڕۆژەکێ ژ ڕۆژان چاڤێن وگوهێن مە ڤەببن ودێ بینن و بهیستن، وهینگێ دێ زانین ل شوینا چاکیا کاودانان مە کاودان بەرڤ خرابتر بر، چونکە مە خۆە کەڕ ولال و نابینا کر، ئەڤ جیهانا ئەم تێدا دژین پێدڤیە چاڤ وگوهێن مە بهێز ودڤەکرى بن وهەر تشتەکێ رویددەت ببینین ومەگوه لێ ببیت، دەنگ وباس گوتن و ئاخفتن وگووتار، و بزاڤێ بکەین وەکو تاکەکێ دناڤ ڤى جڤاکیدا ل شوینا چاڤ گوهێن خۆە بگرین دڤێت مە هەلویست هەبیت و بزاڤێ بکەین کاربەدەستێن خۆ ژ رویدان وپێشهاتان ئاگادار بکەین.
چونکە کاودانێن نوکە یێن هەرێما کوردستانێ تێدا دبوریت گەلەک دنازکن وبەرڤ قوناغەکا نوى پێنگاڤێن خۆە دهاڤێژیت، ئەوژى سەربەخویى و ریفراندومە، ئەم هەمى دزانین دۆژمنێن دەوروبەرێن مە خۆە ل بەر مە ڤەنیساندیە داکو ئەزمونا مە ژناڤببەن وناڤەشێرین هەمیان دڤێت بەربەستان دورست بکەن ل پێش وان بزاڤێن دهێنە دان ژبۆ رێفراندومێ وسەربەخویا کوردستانێ، کەسێن ترسنوک بزاڤێ دکەن چاڤێن وان دگرتى و دگرێدایى بن داکو چ تشتەکى نەب باشى ونەب خرابى نەبینن، گوهێن خۆە دگرن داکو گوه ل دەنگ وباسان نەبن، ژبەر هندێ پێدڤیە کاربەدەست وسیاسەتمەدارێن مە دچاڤ وگوه ڤەکرى تربن وهەلویست هەبیت بۆ وان گورانکاریێن کو نێزیکە دێ ل دەڤەرێ رویددەن.