پارتی دیمۆکراتی کوردستان ، ئەو پارتا زەنگینترە ژ وی چەندێ کۆ پێناسا وی بھێتە کرن ، ئینکار ناھێتە کرن ژ خەباتا دیرودرێژا چەکداری و داستانێن پارتی تۆمارکرین دمێژوویا بزاڤا رزگاریخوازا کۆردیدا ، مێژوو دیدەڤانێ وی چەندێ بوو یە و دیدەڤانێ وی چەندێ یە ھەر ژ دەسپێکا دامەزراندنا وی و حەتا ئەڤرۆ ، چدی پێتڤی ناکەت لاپەران ڤەدین و پەسنا رۆلێ پارتی بکەین ، بەلێ دویر ژ زیادەرەویێ ( مبالغە ) ێ ئەوا من دڤێت بێژم د ھەمی وان بابەتێن رەھەندێ نیشتمانیێدا ، سەرباری وی ژێوارێ کۆ پێگەھا پارتی سەنترالیزم و پایتەختا برێڤەبرن و ئیدارەکرنا ھەرێما کوردستانێ یە و چۆ کێم کرن یان زێدەکرن بێ ی رازیبوونا پارتی سەرناگریت ، پارتیێ مینا برایێ مەزن لناڤمالا کوردیدا ھەمیشە ھەولا راگرتنا شەرم و پێگەھا مللەتێ کورد دایە لبەر چاڤێن جیھانا ژ دەرڤە و و لھەمی خۆشی و نەخۆشیان خۆدان بوویە و ژ پێخەمەت گەل و وەلاتی ، خۆ کریە خۆدان ، و نەخۆدانێ بریارا تاکی بوویە ژبلی کۆ نەچاربیت ئەوژی ژ پێخەمەت پاراستنا خۆدێ وان دەستکەفتیانبیت ئەوێن بدرێژیا سالان ڤی مللەتی بسەرکێشیا پارتی شیایە دەستخۆبێخیت .
پارتی بنیازێن پاک و دویر ژ بەرژەوەندیێن تاک حزبی پێنگاڤ ھاڤێتینە و ئەو پێنگاڤێت نۆکەژی دھاڤێژیت بەلگەنە لسەر ڤی مژارێ مینا پێکۆلا پارتی یا ڤی دوماھیێ سەبارەت سەرخستنا پرسا ریفراندۆمێ ژبۆ سەربەخۆییا کۆردستانێ و کۆم کرن لایەنێن سیاسی یێن ھەرێمێ و خستنە روویا بابەتێ ریفراندۆم و سەربەخۆییا کوردستانێ لسەر مێزا گفتوگۆیێ ، ھەروەسا دناڤا جاددێن کۆردیدا ، ئەڤجا نیاز پاکیا پارتی و داخازکرنا پێکڤە کارکرنا بئێکدەنگی و ببرایەتی سەبارەت ڤی پرسا چارەنڤیسساز ، سادەیی و دلپاکیا پارتیێ نیشا ددەت ، واتە گۆمان تێدا نینە حەزا راستەقینا پارتی رێکەتنا بھەڤرایە بەرەڤ ویستگەھا وی سەربەخۆییا کو زێدەتر ژ سەدەیەکێ خەبات ژبۆی وی دھێتە کرن و ب ھزاران کچ و کورێن ڤی خاکێ خۆین بۆ رشتینە و ئەڤە خەونا مللەتێ کوردە ، ھەرچەندە دژایەتیەکا ئێکجار مەزن دھێتە کرن ژ ئالیێ چاڤ پێ نەرابووێن پارتێڤە و دڤی دەمیدا لڤاندنا ڤی پرسێ بباش نزان و ببەھانێن جۆدا جۆدا دژایەتیێن خۆ سەبارەت ڤی خەوانا دیرۆکی دیار دکن ، بەلێ بەرێزێن خاندەڤان دەرفەتەکێ ژ جەنابێ وە وەردگرم و لڤێرێ بتنێ ئێک پسیارێ دکم ، پاشی بیرۆبۆچوونا خۆ لسەر دیار کم و بەرسڤا دوماھیێ بۆ وەیێن ھێژا بجھدھێلم ، ئەڤجا دپرسم :
بۆچی تەوقیتێ ریفراندۆمێ بۆ سەربەخۆییا ھەرێمێ دپێراردا نە بوو ؟؟ یانژی دپاردا نەبوو ؟؟؟...
ھەکە مەرم و نیازا جەنابێ سەرۆکێ ھەرێمێ تاک رەوی و خۆ سەپاندنا بزۆری بیت وەک ھندەک دبێژن ، مانێ جەنابێ وی بخۆ دزانی پشتی بدۆماھیک ھاتنا ویلایەتا درێژکری یا سەرۆکایەتیا وی ل ١٩ ی ئابا/٢٠١٥ و پشتی بریارا ژ کار خستنا پەرلەمانی ، دێ بەردەوام بیت سەر کارێ خۆیێ سەرۆکایەتیێ ، ئاخر وی دشیا دەمێ ریفراندۆمێ زویتر و بەروەختتر ژ نۆکە رابگەھینت ھەروەسا سەربەخۆیێژی ، داکۆ امتیازاتێت دەولەتبوونێ بکەڤنە ددەستیدا وشکۆیا دەولەتداریێ بتنێ بۆ جەنابێ وی و پارتیێ بیت ژبەری بگەھیتە ڤی دەمی ، ھەروەسا دەمێ ئەنجامدانا ڤی پرسێ گیروو نەدکر و نە دھێلات بکەڤیتە دگەل دەمێ ھەلبژارتنا سەرۆکێ ھەرێمێ بخۆ و خۆلا پێنجێ یا ھەلبژارتنا پەرلەمانێ کوردستانێ !!! ...
بەلێ پارتی و جەنابێ سەرۆکی دڤان پرسێن چارەنڤیسسازدا ، بەرژەوەندیا گشتیا وەلاتی ژ ھەر پێگەە و پایەکا دیتر بلندتر دیتیە ، و ئەڤ دەمە بباشتر زانیە بۆ ئەنجامدانا ڤی پرسێ ، پشتی کۆ جەنابێ وی پشتراستبووی ژ وی زەمینە سازیا ھاتیە کرن بۆ ئەنجامدانا ریفراندۆمێ وپشتراستبووی ژپشتەڤانیکرنا مەزنترین وەلاتێ زلھێزێ جیھانێ کۆ ئەمریکایە و وەکۆ مە بھیستی ژزاردەڤێ فەرمی یێ بەرپرسێن وی وەلاتی پشتەڤانی بۆ ڤی بابەتێ ھاتیە کرن ، وەکی مە لسەری گووتی جەنابێ وی بسیاسەتا پاک و روون و ئاشکەرا دەمێ ھەلبژارتنا سەرۆکایەتیێ و خۆلا پێنجێ یا پەرلەمانی ئێخستە دھەمان دەمێ دەستنیشانکریێ ریفراندۆمێدا ، وئاگەھدارە ژ دژایەتیا ھندەک لایەنان ، بەلێ سەرباری وی چەندێ ، جەنابێ وی ئارمانجەکا راستەقینەیا ئاشکەرا یا ھەی ، ئەوژی دەولەتبوونا کوردستانێ یە ، و بویژان دبێژین بتنێ کەسایەتیا وی ھەژی وی پێگەھیە و سەرباری وان کێشە و قەیرانێن نەچاڤەرێکری یێن ھەین ئەو باوەریا لجەم پتریا ڤی مللەتێ ژار چێبووی ئەوە کۆ بتنێ جەنابێ وی دێشێت مە بگەھینیتە کەنارەکێ ئارام و دەولەتبوون ژ ھەر پرسەکدی مەزنترە و ببەھاترە .
رەنگە رەخنە ھەبن بەرامبەر ڤان ئاخفتنان ، لێ ببەلگە و پشتراستیڤە دبێژم ژ پێخەمەت خراپتر لێنەھاتنا بارودۆخێ وەلاتی ، پارتیێ بقیادەکا حەکیمانە شیایە سەرەدەرێن گۆنجای ئەوا پاراستن و راگرتنا شکۆیا وەلاتی تێدا دگەل ھەر پێشھاتیەکێ نەچاڤەرێکریدا بکەت . ھەکە بشێوازەکێ لۆژیکی بریار و کریارێن پارتی لدویف پیڤەرێن سەردەمیانە دوارێ پۆلیتیکێ ، ئانکۆ ( سیاسەتێ ) دا بھەلسەنگینین ، دابگەھینە نیازێن راستەقینە ، پێتڤیە بچاڤێن باش ڤەکری مەودا و بەرفرەھبوونا رۆلێ کاریگەرێ پارتی ببینین نەبتنێ لناڤخۆیا ھەرێمێ ، بەلکی لسەر ئاستێ دەولەتێن ئەقلیمی و جیھانیژی ، مەحالە دویراتی و بەرفرەھیا بەرچاڤ دناڤبەرا وان بووچون و بیرۆرایاندا ببینین ئەوێن د فەرھەنگا پارتیێدا دھێنە خاندن سەبارەت ھەر پرسەکێ ، ئەڤەژی ھەمی ڤەدگەریت بۆ وی چەندێ کۆ لدەسپێک و دوماھیکێ ئارمانجا بنەرەتی و سەرەکی یا پارتی گەھشتنە بسەربەخۆییا کوردستانێ ، ڤێجا سست کرن و خۆرتکرنا پەیوەندیا دگەل ھەر لایەکێ بیت لدویف بەرژەوەندیێن وەلاتی و پاراستن و بەلانس راگرتنا بەرژەوەندیێن وەلاتێن زلھێزێن جیھانێ و پاراستنا پرەنسیپێن نەگھورێن مرۆڤایەتی و نێڤدەولەتی مینا پێکڤە ژیانا دناڤ وەلاتیدا و ھەلبژارتنێن ئازاد بشێوەکێ دیمۆکراتی و شارستانی ... وھتد ، ئەڤە ھەمی بەلگەنە لسەر ئەکتیڤیا رۆلێ پارتی .
راستە لسەر ئەردێ ژێواری پەیوەندیەکا بھێز ھەیە دناڤبەرا پۆلیتیکێ و ئیکۆنومێدا ، و بتایبەت لڤی سەردەمی ھەردوو ژێک ناھێنە جۆداکرن ژ لایێ پراکتیکیڤە دەمی دکەڤنە دبوارێ جھبجھکرنێدا ، بەلێ ھەکە بزمانێ زارەکی باخڤم ژبۆ تێگەھشتنا نیازا راستەقینا پارتیێ وەکی بەری نھا منگووتی بگرنگی دزانین دویر ژ بابەتێن ئابووری نیازا روون وئاشکەرایا پارتی بدەینە دیارکرن و ھەمی بیرۆ بۆچوونێن ئابووری سەبارەت ھۆکارۆ ئەگەرێن پەیدابوونا قەیرانا ئابووری و نەخشەرێکا چارەسەریا وی قەیرانێ بھێلین بھێڤیا ئابووریناسانڤە ، براستی دێ گەھینە وی باوەریێ کۆ بۆ ھەمی بابەتێن چارەنڤیس ساز سەرباری وی چەندێ کۆ پارتی پێشەنگ بوویە ، ھەمیشە ھەول ژی دایە ب وی شێوازێ کۆ دئایین و سیاسەتا نۆکە یا مۆدرێندا ھەیە ، پێنگاڤێن گۆنجای بھاڤێژیت ، ئەوژی بھەڤرا و ببرایەتی و بئێکدەنگی راھاتنا ( ممارسە ) دەسھەلات و مافێن خو بکەن ، واتە پێکڤە مەشورەتێ بکن، نەکۆ ڤیایە نازناڤ بتنێ بۆ پارتی بیت ، ئەڤجا بلا بھەناسەکا ئازاد و بزانینا مافەکێ رەوا و ببەرپرسیارەتیێڤە و بھەمی ھەست و سۆزێن کوردەواریڤە خۆ بەرھەڤکین بۆ ڤی وەرچەرخانا مێژوویی ئەوا ددیرۆکا مللەتێ کورددا چجاران دخەیالانژیدا نەبوو .