ھزاران پێشمەرگە و سەربازێت بەرزە ل وەلاتێ من ڕۆژانە بۆ ئاڤاکرنا دەولەتا کوردستانێ دلێ وان دقۆتیتن و بەلکۆ کەسێ ھای ژ وان نینە و وان نەنیاسن. ئەحمەد جاسم ئێکە ژ وان. ئەم ھەڤدۆ نانیاسین. بۆ وی نزانم، بەلێ پا ئەز بەربژێرێ چ پلە و پایە و پۆستەکێ سیاسی و جڤاکی نینم و چ ماستاڤێ ژی بۆ وی بگرم، بەلێ یا ڕاستی ئەوە پشتی دیتنا وەرگێڕانێت وی بۆ پەرتووکێن فەیلەسۆفێ مەزن، عەلی وەردی، پێدڤییە بھێتە گۆتن ئەڤ کارە نە کێمی کارێ پێشمەرگەیە. ئەم ھندی بلنداھییا چیایێت کوردستانێ خۆ لبەر بەژنا پێشمەرگەی و کارێت وەکی وی دچەمینین.
سەرەڕای ھندەک ڕەخنەیان، بەلێ نابت ژ بیر بکین عەلی وەردی د پەرتووکێت خۆ نھێنییا کەساتی و جڤاک و نەتەوە و نەژادەکێ ئاشکرا دکەتن کە ئەڤە چەندین ھزار سالە جیرانێ مە کوردستانیانە و ئەو ڕەفتار و ئەقلیەت و کریار و بڕیارێت ژ دەڤ و دەست و سیاسەتا وان دەرکەفتین و دەردکەڤن دویر و نێزیک مەزنترین کارتێکرن لسەر ژیانا مە یا سایکۆلۆژی و جڤاکی ھەبوویە و ھەبیتن. ھەتاکۆ پشتی ئینانا ئایینێ ئیسلامێ ژی وان ب ھەمان ئاراستە کارتێکرنەکا ڕاستەوخۆ لسەر نەتەوەیێت دیتر و نەخاسمە تورک و پارسان ھەبیە و ڕەفتارێت وان ژی کێم و نێزیک لبن وی کەلتووری بووینە، ڤێجا چ باش و چ خراب.
عەلی وەردی، نەیارێ ململانیێا بێ ڕامانا بەرەیێ سۆننە و شێعەیان، ژ گەلەک ژ کارڤەدان و بەرھەمێن وێ کێشمەکێشا دویر و درێژ دئاخڤیت و گەلەک ب گازندەیە. ڕاستە وەردی د شرۆڤەیێن خۆ دا نە ھند یێ بێ لایەنە بەلێ پا ڕاستیان ڤەناشێریتن و نیشان ددەتن کا چەوا مرۆڤایەتی قۆربانیێ شمشێرێ وان دوو ھەڤڕکانە.
سالانەکە گەلەک کەسان ژبەر نەشیانا خواندنا وان بەرھەمان ب زمانێ عەرەبی گەلەک تشت نەدزانی، ھەمی ئەو نھێنی ڤەشارتی مابین. لەوما ئێکێ وەکی ئەحمەد جاسمی ب کارێ وەرگێڕانا وان ئەو نھێنی ئاشکرا کرن. فەرە بھێتە گۆتن ئەوێت دڤێتن دەولەتا کوردستانێ ھەبیتن و ڕیفراندۆما وێ سەربکەڤیتن دڤیا ب ھەر چەند ملا ڤان پەرتووکان بخوینن. یێ بشێت ب عەرەبی و یێ نەشێت ب کوردی. جھێ داخێ یە لڤی وەلاتی فەلسەفەیەک خەلەت ھەی و ئەو ژی نەخواندنە. من پەرتووکا وەرگێڕایا ( مەھزەلەیا ئەقلێ مرۆڤی ) ب چەند وێنە و چەند ڕۆژان ل نیشانگەھەکا پەرتووکان ل زاخۆ ددیت وەکی خۆ چەند ڕۆژان ئێک دانە ژی نەھاتبیە فرۆتن. ئەز وەکی خۆ ڤێ چەندێ ب تشتەکێ کێم نابینم بەلکۆ ب کارەساتەک مەزن و ل ڕێزا حەلەبچە و ئەنفالێ و ... دزانم. چونکی ئەو کارەسات ژ ڤێ چەندێ پەیدا بین ئەوێت ئەو ئەنجام داین وەکی مە ئەو پەرتووک نەخواندن.
فەرە بھێتە گۆتن و ئەز ژ ڤێ ئاخفتا خۆ بەرپرسیارم و ئامادەمە بۆ سەلماندنا وێ ھەتا بەر دارێ قەنارێ بچم، بلا لڤی وەلاتی کەس نەبێژتە خۆ مامۆستا و ئەکادیمی و نۆژدار و زانا و ئەندازیار و قوتابی و لاو و ئافرەت و زەلام و کچ و ژن و فەرمانبەر و سیاسی و پالە و مەلا و بەرپرس و زارۆک و ....ھتد، ھەکەر وی ھەمی پەرتووکێت عەلی وەردی نەخواند بن.
ئەوێت ھیجەتا وان زمان بی، ئەحمەد جاسم و یێت وەکی وی ئەو کار یێ ب سانەھی کری. بلا ئەو پەرتووک ب دوو وێنەیا ل ھەر مالەکێ ھەبن و ئێک بخوینت و ھێشتانێ نەدەینای یێ دی ھلگرت و بخوینت. دەولەتێت سیاسی و بەختەوەریێ ب ڤان پەرتووکا دھێتە بدەستڤەئینان نەک ب ھندێ توو کەرب و کینە و عینادێ ژ ڤی و یێ دی ھلگری و ژبەر فلان کەسی و تشتی پشتا خۆ بدەیە مللەت و نەتەوە و وەلاتەکی و ببیە ئەگەرێ کارەساتان. دەولەتا کوردستانێ ب ڤان تشتان ئاڤا دبیتن نە ب پت پت و کۆت کۆت و ھێجەت و گازندێت پیرەژنکانی. دڤیا ئەم ژی وەکی گەلەک ئەحمەد جاسما ملێ خۆ بدینە بەر ڤی ئاڤاھی و دەولەتێ.