بۆچی گه‌شبینین؟
ئاسۆ عه‌لی فه‌ره‌ج
گه‌شبینی ئه‌م حاڵه‌ته‌یش واتا بایه‌خ پێدانی ئاژانس و میدیا جیهانیه‌كان به‌م پرسه له چه‌ند روانگه‌یه‌که‌وه‌یه وه‌ک:
یه‌که‌م: له ناوچه‌یه‌کی پڕ له ململانێی و شه‌ڕ و ناسه‌قامگیریدا پرسی نه‌ته‌وه‌یه‌کی بێده‌وڵه‌ت به ئیراده‌یه‌کی ناوخۆیی ده‌جوڵێندرێ.
دووه‌م: له عێراقێکدا سه‌روه‌ری تێدا نه‌ماوه و ساحایه‌کی کراوه‌ی شه‌ڕی به‌رژه‌وه‌ندییه هه‌رێمایه‌تی و نێوده‌وڵه‌تیه‌کان، میلله‌تێک جیاواز سیاسه‌ت ده‌کات و خۆی ناخزێنێته ناو به‌ره‌یه‌کی دیاریکراو دژ به به‌ره‌یه‌کی دیکه.
سێیه‌م: له ماوه‌ی سه‌رهه‌ڵدانی گروپی تیرۆریستی داعش کورد(پێشمه‌رگه) روانینی زۆر وڵاتی گۆڕی، هێزێکی به‌ئیراده و به پشتیوانیه‌کی که‌م و که‌می پێداویستی سه‌ربازی(چه‌ک) هه‌یبه‌تی هێزه دڕنده‌ییه‌که‌ی داعشی تێک شکاند و بووه پارێزه‌ری سه‌رجه‌م پێکهاته جیاوازه‌کانی عێراق چ نه‌ته‌وه‌یی یا دینی یا مه‌زهه‌بی.
چواره‌م: زیاد له توانای حکومه‌تی هه‌رێمی کوردستان و سه‌رباری قه‌یرانی دارایی، زێده‌تر له ٢ ملیۆن ئاواره داڵده بدات و ئیداره‌ی بکات.
پێنجه‌م: هه‌وڵه دیپلۆماسیه‌کانی جه‌نابی سه‌رۆک بارزانی له‌پێناو پێشخستنی پرسی کورد و پێداگیری سه‌خت و ره‌تکردنه‌وه‌ی جارێکیتر له ژێر ده‌سته‌یی، پێگه‌یه‌کی به‌هێزی بۆ کورد دروست کرد.
شه‌شه‌م: دیفاکتۆی هه‌رێمی کوردستان له ماوه‌ی زیاتر له ٢٠ ساڵ و سه‌لماندنی سه‌رچاوه‌ی هه‌ڕه‌شه نییه و پێچه‌وانه‌ی زۆر لایه‌ن گره‌نتی سه‌قامگیرییه.
حه‌وته‌م: له عێراقی دوای ٢٠٠٣ حکومه‌تی ناوه‌ند و هێزه‌کانی ده‌سه‌ڵاتدار بوونه مه‌ترسی له‌سه‌ر ژیانی پێکه‌وه‌یی و له هه‌رێمی کوردستانیش پێکه‌وه‌یی و موماره‌سه‌کردنی تایبه‌تمه‌ندی سیاسی و ئاینی و نه‌ته‌وه‌یی و مه‌زهه‌بی بووه سیمایه‌کی گه‌ش و پڕ شانازی.
ئه‌مه به‌شێکه له‌و هۆکارانه‌ی کورد ده‌توانێ بۆ پشتیوانی نێوده‌وڵه‌تی له دوای ئه‌نجامدانی ریفراندۆم وه‌به‌رهێنانی تێدا بکات.
