چەند بەرپرسێکی یەکێتی نیشتیمانی کوردستان، داوادەکەن حاڵەتی باری نائاساییی لە چەند قەزایەکی سلێمانی رابگەیەنرێت، کارگەیشتوەتە سەر ئەوەی کە بەرپرسی یەكەمی یەكێتی، لە قەزای چەمچەماڵ دەڵیت: "بۆ پاراستنی ئەمنیەتی قەزاكەیان، ئێستا سەرقاڵی ئەوەن لە بەرپرسانی پێشمەرگە‌ و كەسانی سەربازی ئەمنی حیزبەكان ‌و خەڵكی ناوچەكە هێز دروستبكەن، بۆ پاراستنی ئەمنیەتی گەڕەك ‌و كۆڵانەكانی چەمچەماڵ". ئەمە لە کاتێکدایە تادێت حاڵەتی کوشتن و ڕفاندن لەو قەزایە زیاتر دەبێت، بەرپرسانی ئەمنی لەسلێمانی لەنێوان بەرداشی ململانێی حزبی گیریان خواردووە، هەمان سیناریۆش لەگەرمیان هەیە، بەجۆرێک باڵێک یەکێتی لەگەل لادانی بەڕێوەبەری ئاسایش ن و بالێکیش دژی دەوەستنەوە.

لەهەمان کاتدا لە قەزای سەیدسادق، کەسێکی نزیک لە ئەندامێکی سەرکردایەتی یەکێتی کراوە بەر قایمقام و ئەو سەرکردەی یەکێتی هەڕەشە لە هەرکەسێک دەکات پەنا بۆ لادانی ببات، لە سنووری هەروامان و هەڵەبجەش باس لە سەرهەڵدانی دیاردەی چەکداری دەکرێت و ڕفاندنی منداڵ و خەڵک بۆ قەندیل پەرەی سەندووە، دۆخەکە بەشێوەیەکە کە کۆنترۆڵکردنی ئاستەمە.

ئەم فەوزایە تەنیا سنووری دەوروبەری سلێماین نەگرتوەتەوە لە شارباژێریش دۆخەکە ئاڵۆزە پەکەکە بازگەی سەربازی داناوە. نازانرێت داهاتووی سلێمانی بەرەوە کوێوە دەچێت؟