دوای ھێرشەکانی زۆھاک بۆ سەر ئارییە پارسەکان، ئێتر جەمشید پاشای پارس ھێز و توانایی بەرگری نامێنێ و دەستھەڵاتی وڵاتانی ئاریایی دەکەوێـتە دەست یەکێک لە زۆردارترین مرۆڤەکانی ھەموو مرۆڤایەتی و ئەم قۆناغەی ستەمگەری زۆھاک، کە بە ڕەگەز عەرەبێکی خۆپەرێست بووە، و نزیکەی ھزار ساڵی پێچووە، بە یەکێک لە ناخۆشترین قۆناغەکانی ژیانی ئارییەکان، و بە تایبەت پارسەکان ھەژمار دەکرێت. چێڕۆکەکەی لە زۆربەی پەرتووکەکانی ئایینی و سانسکریت و لەوانەشە لە ئاڤێستا و شاھنامەی فیردەوسی دا بە درێژایی ھاتووە.
ئەگەر کاوەی ئاسنگەر، شێرەکۆڕەکەی کوردی ئەسفەھانی نەبوایە، و بەھەڵگرتنی ئاڵای درەفشی کاویانی خەڵکی ھان نەدابایە لە دژی زۆھاک ڕاپەرن لەوانەیە ئەو قۆناغە ناڵەبارەی زۆھاک زۆر زیاتری بخایاندبایە و قۆربانیی زیاتری لێکەوتبایە. کەچی کاوە بە ھاوکاریکردنی فەرەیدوون شاە، کە خۆی بە یەکێک لە پەیڕەوانی ئایینی نۆح(س) ھەژمار دەکرد، توانی زۆھاک بکۆژن و ئێرانییەکان لە ستەمەکەی قۆرتاڵ بکاتن و جارەکی دیتر سەروەری بۆ ئارییەکان و پارسەکا بگەڕێنێتەوە و سەردەمێکی زێڕینیان بۆ دابین بکات.
جاری دووھەمیش، کاتێک کە پارسەکان بەتایبەت و ئارییەکان بە گشتی لەپەڕی دڵسۆزییەوە تەنھا و تەنھا لە بڕی ئەوەی کە ببوون بە مۆسڵمان، لە لایەن چەندین خەلیفەی خۆپەرێستی عەرەبی بەناو مۆسڵمان بەو پەڕی نامرۆڤایانەوە زۆردارییان لێدەکرا و لە لایەن ئەوانەوە بە چاوێکی سووکەوە تەماشە دەکران و ھەر جۆرە ڕەفتارێکی ناشیاو و نەشرینییان لەگەڵدا دەکرا، بەڵام دیسانەوەش، ئەبوو مۆسلمی خۆراسانی، وەک کۆڕە کوردێکی ڕەسەن لەم کوردستانە ڕەنگین و جوانە، ئاڵای ڕاپەرین لە دژی ئەو خۆپەرێستانە ھەڵدەگرێ و لەناویان دەباتن. ئەو کات و جارێکی تریش، و ھەرچەندە کاتیش بووبێ، شکۆ و پرستیژی پارسەکان بۆیان دەگەڕێنێتەوە.
بەڵێ ئەو دوو جارە و زۆر جاریتر کوردەکان ئەو شۆڕە پۆڵاینە بوونە کە پارسەکانیان لە ناخۆشترین قۆناغەکانیان دەرباز کردووە و ئاسوودەیی و سەقامگیری دەروونی و کۆمەڵایەتی و ئابووری و سیاسییان بۆ دەستەبەر کردووە، کەچی ھەر ئێمڕۆ ھەمان ئەو کوردانە تەنھا و تەنھا بۆ ھەمان مەبەست و کۆتاییھێ،ان بە نەھامەتیەکانان و ڕزگاربوون لە ئەنفال و کێمیاباران و زۆر تاوانی تری ناسیۆنالیستەکانی ھەندێ لایەنی عەرەبی ناوچەکە، نیازیان وایە دەوڵەتێک بۆ خۆیان دابمەزرێنن، بەڵام ئەو پارسانە ئەم دەستکەوتەیان پێناخۆشە. ئەوان بە دەردی دەڵێن:" لە دز وابێ ھەموو کەس دزە"، وادەزانن کە ئێمەیش وەک ئەوان و ( مەلکەکانی ) عەرەبی شۆڤینی تووشی خۆبایبوون و لووتبەرزی دەبین یان لە دژی ئەوان دەبین. بەڵام ئەوان لە بیریان چووە کە ئێمە ھاونیشتمانیانی کەریمخانی زەندی لۆری کوردستانین، کە بە پەروەردەیەکی باش و جوان و مرۆڤدۆستانە گووشکرا بوو، و ھەموو بەھا مرۆڤدۆستانە و جوانەکانی کوردەواری، بە جوانترین نموونەی دەستھەڵاتی کورد لە جیھان دەژمێردرێتن، کە تەنانەت ئێوەی پارسیش سەرسۆڕماوی ئەو خەسڵەتە جوانانەن، و شایەت و گەواھیدەرن کە کریمخان لە لووتکەی دەستھەڵاتدا، لەوپەڕی خاکیبوون و سادەیی دا دەژیا و ڕووی نەدەھات ناوی شاە لە خۆی بنێ.
بۆیە ئەی برا پارسە ئارییەکان پێویستە ئێوە پرسیار لە دەستھەڵاتدارنی وڵاتی خۆتان، ئەو کەسانەی کە ئێستاشی لەگەڵدابێ ڕەسەنایەتی و نەژاد و ڕابردووی نەتەوەییان ھێشتان جێگەی گۆمانە، بکەن و بپرسن بۆچی و لەبەر چی و کێ ئێوە کۆسپ و تەگەرە دەخەنە بەردەم ئەو مافە ڕەوایەی برا کوردەکانتان، و ھەر ئێوەن دەتوانن ڕێگە لە ئەوان بگرن تا چیتر ستەم لە برا کوردەکانتان نەکەن، چونک ئێوە قەرداری ئێمەن و با جارێکیش ئەو قەرزەتان بدەنەوە.