خۆزیکێن شڤان و گاڤانەکی. ژیانا وان چەند بسانەھییە. چەند مرۆڤ ھەنە بەخیلییا ب مە دبەن، و ئەم بەخیلییا ب شڤانەکی دبەین. پا نۆکە کی بەخیلییا ب ھندەکان دبەن و چ ژ حالێ وی نزانن. لەوما بلا چ مرۆڤ بەخیلیێ ب چ مرۆڤەکی نەبتن. " دەستێ تەنا لسەر زکێ برسی "! بۆ مە نەوەسانە. ئەم نەشێین وەکی مرۆڤان بژین. ئەم چویچکەکێ یان خاخالۆکەکێ لسەر دار یان گیایەکی ببینین، نەشێین وەکی شڤانەکی ھەما دبەڕا بچین و گۆھێ خۆە نەدینێ. ئەم ب ھزار جۆران وی دیمەنی دبینین و ب سەد جۆران شرۆڤە دکەین. ھوین چەوا ئەڤێ ژیانێ دبینن؟ ھەتاکۆ ئەم نەشێین تێر تەماشەی تەلەفزیۆنان ژی بکەین. ژ بەر ھزر و تەخمینان ئەو ژی یا ل مە حەرام بووی.
ڕاستی نزانم کا مەبەست ژ بەلاڤکرنا ڤان جۆرە نووچەیان چیە، لێ ل (٢٢/٣/٢٠١٧) تەلەفزیۆنەکا لۆکال ل دەڤەرێ ل مانشێتەکا خۆ دا نڤێسیبی " ڕۆژناما ئیندیپێندێنتا (independent) بەریتانی " دبێژیتن " ئەمریکایێ ھەفت وەلاتێن عەرەبی کرینە د پلانا خۆ یا شەڕی دا"، و ئەڤ ڕاگەھاندنە ژ دەڤەرا ڕۆژھەلاتا ناڤین دگریتن. مە نەڤێتن بێژین خۆزیکا وەسا بیتن چونکی ئەم وەسا دبینین ھەر مرۆڤە بھایەک مەزنە و مرۆڤ ب ھەمی نەتەوە و نەژاد و ئایینی جوانییا ڤێ جیھانێ نە، بەلێ ئەڤ جیھانە ب یاسایێن ئەسمانی و یەزادنی دزڤڕێتن و ھەر کریارەک بەرھەمێ کریارا پێشی خۆیە. ھوین شوینا وان، دلێ خۆ بۆ خۆ و نەتەوە و وەلاتێ خۆ بسۆژن. ئەڤە بخێرترە.
فەرە بھێتە گۆتن سەرباری ھندێ کە وەلاتێن زلھێز پلان و بەرژەوەندیێن دویر و درێژماوە یێن ھەین و ھەتا ھندەک جاران ئەو بخۆ ژی نەشێن ڕەوش و ڕێڕەوەیا وان پلانان کۆنترۆل بکەن و نموونەک سادە لادانا شاھێ ئیرانێ بی کە ئەمریکایێ نەدزانی دێ ڕەوش گەھیتە ئەڤرۆکە، ھەکەر نەدھێلا کار بگەھیتە ھندێ ئەڤرۆکە مەزنترین نەیارێن وێ پشتی شاھی بھێنە سەر دەستھەلاتا وی وەلاتی.
بەلێ پا ھندەک جاران وان وەلاتان گۆڕاو و ئەلترناتیڤ ( بەدیل ) ژی یێن ھەین، لێ ھەتا ڕوویدان چێنەبن و نەگەھنە دۆماھیکا خۆ، تەنانەت ئەو ژی نزانن دێ چەوا چێبیتن. و مە نەڤێتن بێژین ئەمریکی ژ کەسەکێ باشترن چونکی باشی تشتەک ڕێژەییە، و ژ لایەک دیترڤە ئەمریکی نڤشێ فەلسەفەیا پراگماتینە، کە لسەر ڤێ چەندێ ھاتینە پەروەردەکرن بۆ بدەستڤەئینانا وی تشتێ بڤێتن ھەر ڕێک و کارەکا بکار بینن. ھەرچەندە ژی خەلک ب گشتی و مۆسلمان ژی، بەرۆڤاژی ئایین و وژدانی، دویر نینن ژ جێبجیکرنا ڤی شێوازی د ژیانا ڕۆژانەدا، و بەلگە ژی، وەکی عەلی وەردیێ بەھشتی، دبێژیتن د " ئەقلێ سەرڤەیی " ئەو خۆ ب مۆسلمان و مرۆڤ دبینن و نیشان ددەن، بەلێ پا د " ئەقلێ ڤەشارتی " د ھەمان پراگماتینە و بۆ ئارمانجێن خۆ ھەر کارەکی دکەن ھەتاکۆ زیانمەند بیتن بۆ مرۆڤان. نموونا ھەری زیندی ژی ڕەفتارا وەلاتێن بناڤ عەرەبی و مۆسلمانە ل چەند دەە و سەد سالێن بۆری دگەل کوردستانیان و نەخاسمە مۆسلمانێن وێ. لەوما ھەکەر چی مە نەڤێتن بێژین ئەمریکی ( شەرفێن مەککەھێ ) نە، بەلێ پا ھیچ نەبیتن ژ گەلەک ژ وان شۆڤینی و ناسیۆنالیستێن عەرەبان خرابتر ھەر نابن و دۆستاتییا وان نەچارییە، وەکی بابۆکالێن مە دبێژن " گرارا ڕۆھن ژ کێم دانی یە"!!
دبیتن مە چ جاران ئەو خۆزیک نەخواستبان ئەو ڕۆژ بھێن، و ئەو بسەرێ وان و ھیچ کەسەکی بھێتن، ھزاران زارۆک و ساڤا و ژن و بچویک لبەر پێیان بچن، و بلکۆ ژی یێ مەزن و بەلکۆ ژی داعشەک ژی. دلێ مرۆڤی دمینیتە ب داعشەکی ڤە، ئەو ژی مرۆڤە و کۆڕێ دەیبابەکییە و دبیتن سەدان زارۆک و کەس و کارێن وان ژی پشتی سەکتینا وی مابن بێخۆدان، بەلێ ئەڤە ئەو ڕێکە ھندەکان و وی بۆ خۆ ھەلبژارتی. مە گەلەک خۆ ل ھێڤییا دلۆڤانییا برایێن عەرەب گرت، بەلێ ژ خۆ بی و چ پێڤە نەھات. لەوما سەبارەت وەلاتێن عەرەب و پرۆژێ ڕاگەھاندنا جەنگی و گھۆڕین د وان دا، پترتر دچیتە د چارچۆڤەی وان یاسایێن سروشتی، نەک زێدەتر.
دویر نینە ئەوا ئەڤ کەنالە و ژ دەڤێ لایەنەک دیتر بەحس دکەتن، ڕاست بیتن و ئەو ڕۆژ ھلاتبیتن، و وەکی باب و باپیرێن مە یێن نەمر دبێژن " ھەر زەڤلەکی بەڤلەکێ ھەی"، و عەرەب و ئەمریکا ئەو " زەڤل " و " بەڤل " ن. ھەلبەت دەمێ ئەم دبێژین " عەرەب "، ڕاستی مەبەست نە عەرەبە، وەکی نەتەوە، چونکی مە ڕێزا ھەی بۆ ھەمی نەتەوەیەکی و مرۆڤەکی لڤێ جیھانێ، چ بەری نۆکە و چ نۆکە، و ب تایبەت یێن باش و جوامێر، کە بێگۆمان، عەرەبان ژی یێن ھەین، و دویڤداچۆنا ھژمارەکا دەزگەە و کەنالێن سیاسی و ڕاگەھاندنێ و پرۆژە و پرۆگرامێن وان نیشانددەن وان دڤێتن مرۆڤەک عەرەبێ جوامێرتر ژ جاران و جیاواز ژ تووندڕۆیی و دفن بلندیێ و بھایێن مرۆڤدۆستیێ و ڤیان و دویر ژ کەرب و کینێ و خۆپەرێستیێ و خۆویستی و نێرگزیسما ئەو نەتەوە ژبەر دنالینیتن، دروست بکەن و مێنتالیتەیێ وێ یێ ڕزی بۆ ئێَکێ باشتر بگھۆڕن.
بەلێ پا ب مخابنیڤە چ جھەکی ناگریتن و ناگەھیتە چ جھان. چونکی " چەپلە ب دەستەکی ناھێنە لێدان" و ئەو لایەن کێمن و دەنگێ وان زووی دھێتە خەندقاندن و ھەتا ئێک ب باشی بەحسێ وان بکەتن ھزار ھزار وان ب سیخۆڕ و دویڤەلانکێ خەلکێ و وەلات و ئەمریکا و ئەورۆپا ھژمێرن و ھزار دێ بێژن " ئەو دوژمنێن ئیسلامێ " نە، و جوانترین نموونە ژی بەھشتیێ " عەلی وەردی ( ١٩١٣-١٩٩٥ )، مەزنە فەسلەسۆفێ عەرەب بی، کۆ ژ قەنجیێ و شەکرێ پێڤەتر نەدگۆت، بەلێ کەسێ نەگۆت " عەفیە "، بەلکۆ ھەبین قەستا کرێتکرن و کافر و زەندیقکر و ھەتاکۆ کۆشتنا وی کرن !
بەلێ پا ھزاران عەرەب نۆکە بۆ وەھابیەتێ و داعش و ئەلقاعیدە و ھەڤ بیروباوەرێن وان ل وەلاتێن ئیسلامی و جیھانێ چەپلا دقۆتن و وەسا ھزر دکەن ئەو یێن ئیسلاما ڕاستین جێبەجێ دکەن و لڤێ کوردستانێ ژی وەکی وان نەکێمن. ئەم نە بەحسێ وی نەتەوەی ب تێکڕا دکەین، لێ پترتر مەبەستا مە " ھزرکرنا عەرەبی " یە، یاکۆ خۆ پترتر د چارچۆڤەیەکێ سیاسی دا دبینیتن، و ب مخابنیڤە، یا بۆ مەژیێ تاکێن ئاسایی ژی ھاتیە ڤەگۆھاستن، و ژێدەرێ وێ یێ سەرەکی ژی ئابووری یە، بەلێ پا مرۆڤ بلا دگەل خۆ یێ ڕاست و دروست بیتن و خۆ ل گێلی نەدەتن، تێگەھشتنا شاش ژ فەلسەفا ئایینی ژی ئەو چەند یا بھێزتر کری، و سیاسەتا شاشێن وەلاتێن عەرەبی ژی ئەڤ ئایینە بۆ خۆ کرییە ھێجەت و ئاگری پی َخۆشتر دکەن.
محەمەدێ ئەمین (س)، ئەو مرۆڤێ ئەو بخۆ و د قۆرئانێ دا بناڤێ "ھنارتیێ خۆدێ" ( ڕەسوول ) ھاتی نیاسین و ب سەدان ئایەت و ژ وان ژی (ئال عێمران/١٤٤) و گەلەکێن دیتر، دفەرموون، و ئایینێ پیرۆزێ ئیسلامێ د چارچۆڤەیەکێ پەرتووکەکا پیرۆز و ناڤەرۆکەکا زەنگین و بەرنامەیەکێ چاکسازییا دەروونی و سۆسیۆلۆژی و ئابووری، و ب جیھانەک ژ بھایێن جۆان و مرۆڤدۆستانە ل عەرەبان باراند، و وەک ھاتیە " ب عەرەبی ل وان ھاتە خوارێ دا پێ ئاقل ببن"، وەکی ل ڤان ئایەتێن پیرۆز ھاتی: ({إِنَّا جَعَلْنَاەُ قُرْآناً عَرَبِیّاً لَّعَلَّکُمْ تَعْقِلُونَ }الزخرف/٣ و {إِنَّا ڕَنزَلْنَاەُ .... }یوسف/ ٢ )؛ بەلێ پا دیارە نە عەرەبێن مەسیحی و جۆھی، بەلکۆ تنێ ئەوێن مۆسلمان ئەڤ چەندە کرە دەلیڤە و ئەو پێغەمبەر، بەرۆڤاژی ویست و حەز و فەرموودەیا وی (س) و یا قۆرئانێ، کرە " شاە "، و بناڤێ وی و ئایینێ وی یێ پیرۆز جەنگەک ل دژی ھەمی مرۆڤان ڕاگەھاند، تنێ دا بێژن " عەرەب نەتەوێ ھەلبژارتییە"، و بڤی ڕەنگی جھێ جۆھیێن بەرێ و سەردەمێ مۆسا (س) و عیسای (س) گرتن، یێن ھەر وان، عەرەبان بخۆ گلەیی و گازندە ژ وان جۆھی و زۆرداری و ھزرا وان یا شۆڤینی و جیھانبینییا خۆ ب " گەلێ ھەلبژارتی " دیتن، دگرت.
عەرەبان د ڤی پرۆژێ درێژماوە دا سەدان نەتەوە و ەلات و لبەر پێ یێن خۆ دان و ھاڤێتن، و کورد و کوردستانی مەزنتیرن و پترترین و نێزیکترین قۆربانیێ وێ حنێرا بێ شۆل و دژی ئیسلامی و ھزرەکا شۆڤینی و فاشیستی عەرەبی بی کە بناڤێ پیرۆزێ ئیسلامێ دھاتەکرن. گەلەک خەک و وەلاتێن دیتر ژی کەفتنە بن وی ئاگرێ خۆپەرێستانە و دفن بلندییا عەرەبان، بەلێ دیارە " یا ڤی دەستی ل وی دەستی نائێتن"، دۆماھیکا زۆرداریێ و دفن بلندیێ یە، و ئەو ژی یاسایا " ھەر زەڤلەکی بەڤلەک یێ ھەی " دھێتە گۆڕێ، و بەلکۆ ژی ئەو ڕۆژ یا ھاتی، و ئەڤە نیشان ددەتن شۆڤینیزما عەرەبی و سەرکرداتییا سیاسییا وەلاتێن وێ، پێدڤییە بزانن و ببینن زۆردارییا وان ل خەلکێ کرن و چەپلە بۆ گەلەک سەدامێن گۆڕبگۆڕ قۆتان، و سامان و پارەیێ خەلکێ وەلاتێن خۆ و جیھانا ئیسلامی ل وان مەزاختن و تراژێدیایێن وەکی حەلەبچە و ... شنگال و ئێزیدخانێ و ... ھتد، دروستکرن، یاکۆ برین و زیانێن مەزن و ھەتاھەتایی لسەر جڤاک و دەروونێ وان دروستکرن، چ تام و چێژ ھەیە و عێراق و سۆریا پێش وان ڤە دێ بیتە " دەوات " و " لێ لێ "، و ئەڤە نە ب دلێ مە و چ کەسەکێ ب ویژدانە، بەلێ پا ئەو " دارە یێ وان بخۆ کری د خۆ ڕا "، و دەرئینانا وی ژی یا بسانەھییە و تنێ پێدڤی ب ژبیرکرنا دفن بلندیێ و خۆ ئینانە ڕێزا ھەمی نەتەوە و جیھانێ و باوەری ئینان ب ڕاستیەکا قۆرئانا پیرۆز و ئەو ژی ئەوە کۆ محەمەدێ ئەمین (س) پەیامبەرەکێ ھنارتی( ڕەسوول) و چاکسازەکێ دیرۆکی و ژ مەزنترین و جوامێرترین مرۆڤانە، و ھەلگرێ بھایێن جوانە و شارستانیەت شانازیێ دکەتن کەسانەک وەسا دناڤ دا ھاتینە پێگەھشتن و مفایێن بۆ وێ ھەبووینە، بەلێ نەک " شاە" و " سۆلتان"، کە سیمبۆلێ بھایێن ستەمگەری و زۆرداریێ و دەستھەلاتێ، یاکۆ ھوین ب شاشی ھزر دکەن و د وی پێغەمبەرێ مەزن دگەھن، یێ کۆ ل قۆناغەکێ ھاتە ناڤ وان، کۆ وەکی نۆکە پاشکەفتیترین و " جاھێلترین " نەتەوە بین.
سەرەڕای ھندێ ئەمریکا د سیاسەتێ دا گەلەک یێ ھشیارە و زووی ب زووی خۆ بدەستڤە بەرنادەتن و نە ھند گێژۆکە پێ ل کۆرییا کتکێ بنت و وێ بترسینیتن و ژ دەست بدەتن، و پاشی ژی ھندی شۆل ب ئێک ژ وان ھەبیتن و نۆکە بسانەھی نەشێتن دەستان ژێ بەردەتن و بۆ پاراستنا وان بەرژەوەندییان دەستەکی ژی بسەرێ وان دابینیتن، بەلێ دویر یان نێزیک دێ وەکی ماری ب وان ڤەدەتن، نەخاسمە ھێدی کارێ وێ ب ھندەک ژ وان وەلاتان نەمایە، و مەزنێن مە کوردان دبێژن: " نوی ھاتن کەڤنی خەلاتن"، ھێدی کوردستان یا پەیدا دبیتن، و شۆل ب وان نەمایە. بەس بلا ھیچ نەبیتن ئەمریکا مە ئەنفال ناکەتن و دێ پێکڤە نانەکێ خوین، یێن دیتر ئەو ژی دگەل مە نەدکر و ناکەن ژی.
لەوما دویر نیە و بەلکۆ ئەو تیفانا مەزن و باھۆزا دژوار، کەس و وەلاتێن دیتر ژی دگەل خۆ ببەتن و دویر نینە ئەو وەلات ڕەشەکێن عەرەبان، تورکیا و ئیران و پاکستان و جھێن دیتر ژی بن. ما کی دزانیتن؟ ھەمی ژ یەزدانێ مەزن دھێن! راستی ژی ھندەک ژ وان وەلاتان، ژ ئەگەرێ مەزنبوونێ و ھژمارا ئاکنجیێن خۆ، خۆ گەلەک مەزن دبینن، و ھەتاکۆ نەھێنە دابەشکرن و ببنە چەند وەلاتێن بچویک دێ ھەر ب مێنتالیتە ( ئەقلیەتێ ) ئیمپراتۆریەتێ تەماشەی خۆ کەن و ھەر دەم بۆ دەڤەرێ و مرۆڤێن وێ جھێ مەترسیێ نە، نەخاسمە ژی د وان وەلاتان، گەلەک نەتەوە و دەڤەر ژی داخوازا جۆدابوون و سەربخۆیێ دکەن.
بلا ئەو کەسێن ڤان جۆرە تشتان بەلاڤ دکەن و دلێ وان ب عەرەبێن شۆڤینی دسۆژیتن و دلێ خۆ دھێلنە ب وانڤە باشتر چاڤێن خۆ ڤەکەن دا تشتێ ڕاست ل دەروبەرێ خۆ ببینن. ئەڤە نە ڕامانا وێ ئەوە مە کەرب ژ عەرەبان ڤەدبیتن یان ئەم دوژمناتییا ئیسلاما پیرۆز دکەین، بەلێ پا ئەڤە ھزار سالن عەرەبان ژی نیشان دایە ئەو نە ھندن ھندی دیار. دلێ مە چەند دمینیتە ب مە بخۆڤە، ھند ژی ب دوژمنان ژی ڤە. بۆچی ما داعش نەمرۆڤن و ژ مالباتەکێ ھاتینە و زارۆک و دەیباب و ژن و مال و حال نینە؟ ئەو ژی مرۆڤن و دلێ مە بۆ وان ژی دکۆزریتن دەمێ دبینین ئەو بۆ چ و چنە خۆ بۆ ھندەک پارەی یان ھزرەکا شاش ددەنە کۆشتن و مالا مە و یا خۆ ژی وێران دکەن. بلا ژ بیرا مە نەچیتن عەرەببوون نە ئانکۆ مۆسلمانبوون. شانازییە عەرەبان جوامێرێن وەکی ئەبدلمۆتەلب و ئەبی تالب و محەمەد (س) و ئیمام عەلی و عۆمەرێ عەبدۆلعەزیزی و گەلەک جامێرێن وەکی وان ش ناڤ دەرکەفتن و شارستانیەت شانازیێ ب وان مرۆڤان دکەتن، بەلێ پا مرۆڤێن کمباخ ژی، ھندی بێژی، ھەبین. ئەوێن دلێ خۆ ب دلۆڤانیا عەرەبێن شۆڤینی خۆش دکەن و کەیف وان تێتن کە تشتەکی ژ عەرەبیێ دزانن و شانازیێ ب وان دبەن و وەسا ھزر دکەن ھەکەر ڕژۆەکا وەسا ھەبیتن ئەو ئازاد و بەختەوەر و سەرفیراز ببن یا لسەر دەستی َعەربان ھاتی، خەونەک و ( سەرابە) و پەقەکا سەر ئاڤێ یە. عەرەبێن شۆڤینی ھزاران سالە نیشان دای بۆ بابێ خۆ نابنە مال و " نە بەرە و نە پشت"، و بەلگە ژی، محەمەدێ ئەمێن (س)، شانازییا مرۆڤاتیێ یە، کە ھەتا وەغەرا داویێ ژی کری چ خۆشی ب دەست وانڤە نەدیت. عەرەبێن شۆڤینی و خۆپەرێست و وەھابیزما ناسیۆنالیزم، ژپێخەمەت بەرژەوەندی و " تڕێن" ( ملکی ) و ھندەک مامۆستایێن ئایینی یێن ڕەشەک و ماستاوچی، ل شوینا مەزاختنا ( بیت المال) و وی داھاتێ وەلاتێ وی ھەی ل ھەژار و بەلەنگاز و برسی و ڕوویس و خاسان ل وەلاتێن ئیسلامی و جیھانی، و ڕێگری ل کۆچکرنا وان بۆ وەلاتێن دیتر و ئەرۆپی و گھۆڕینا ئایینی خۆ و ژپێخەمەت پارییەکێ نانی و گرتنا دەستێ برایێن مۆسلمانێن کورد و ...، ل جیھانێ ب مەلیارھا دۆلاران دژی برایێ خۆ یێ مۆسلمانێ پارس خەرج دکەتن و دکەتە د بەریکا خەلکێ دا. ل دەمەکی کە جیھان ھەمی گەواھیێ ددەتن وی نەتەوێ خۆنەویست بۆ خزمەتا ئیسلامێ و عەرەبان چەند نەخۆشی دیتن و د سەردەمێن جۆدایێن دەولەتا ئیسلامی چەپەرێن شەڕی بین و ھەتا د پیلانێن لەشکەری یێن عەرەبان دا ئەو نەتەوە و کورد ژی ل بەرۆکێن شەڕی ددەیناندن، چونکی دزانی ھندی ئەو بھێنە کۆشتن ش ھەر دوو لایانڤە بۆ وان ب مفایە. دێ ئێک ژ وان کێم بیتن. چونکی ئەو د دیتنا وان دا ( مەوالی) و خزمەتکارێن عەرەبان بین ! مەزنترین زانایێن ھەردوو قۆناغێن ئەمەوی و عەباسییان دا ل جیھانا عەرەبی و ئیسلامی پارس بین و جیھان شانازیێ ب وان دبەتن بەلێ ھەتا نۆکە ژی عەرەب د پەرتووکێن خۆ یێن دیرۆکی و زانستی دا ناڤێن وان ب عەرەب دئینیتن. بەرھەمێ ھزرا نەرگێزیسما خۆپەرێستانەیا ( مەوالیبوونا) نەعەرەبێن مۆسلمانە و ئەنجامێ ھندێ یە ئەو یێن بینە مۆسلمان دا خزمەتا عەرەبێن شۆڤینی بکەن، لدەمەکی ئیسلاما پیرۆز و محەمەدی(س) بەرۆڤاژی ڤێ دگۆت. دبیتن کەسەک ھزر بکەتن کە ئەم شێعەینە یان پشتەڤانیێ ل وی تاخمی دکەین. لێ د ڕاستیدا چەند ئەڤ بابەتە بۆ بزنەکێ خەمە ھند ژی لنک من گرنگە. گرنگ ئەوە ئەڤ جیھانە یا د دەستێن ڤان دوو تاخمان دا دسۆژیتن. نەخاسمە کوردستان و کورد. بلا خەلک باش بزانیتن ل جیھانا ئیسلامی تشتەک نەبی بناڤێ شیعە. سۆننە و نەڤیێن ئەبووجەھلی و ئەبوو لەھەبی و دفن بلندییا وان شێعە چێکرن. چێڕۆکا تەحلا وێ ھند درێژە لڤێرێ تنێ من ناڤ و نیشانێ وێ گۆت.
ئەو مۆسلمانێن ل وەلاتێن عەرەبی و ئیسلامی و کوردستانێ، ژبەر شەڕ و شۆڕ و نەخۆشی و ھەژاریێ و زۆرداریێ دڕەڤن و دچن ل وەلاتێن دیتر دبنە ئایینەک دیتر، ژی بەلگەیە بۆ ڤێ گۆتنێ. سۆننەیان و عەرەبێن شۆڤینی و خۆپەرێست لسەردەمیکی زۆردارییەک وەسا مەزن دکر خەلک نەچار بی ببیتە شێعە داکۆ خۆ بپارێزیتن و پشتی ھنگی مناسبەتێن وەکی عاشوورا و فلان و فیسار ژی کرنە سیمبۆل دا پێکڤە کۆم ببن و ببنە ( تفاق) و نێزیکتر ببن و ژ ئاگرێ سۆننەیان بھێنە پاراستن. پشتی دەرکەفتنا بزاڤا دڕندانە و ھۆڤا وەھابیەتێ ئەو خۆپەرێستی و خوینمێژی سەد جاران ھند زێدەتر بی.
بەلێ ئەڤرۆکە ئەو عەرەب، ل دژی برایێ مۆسلمانێ خۆ و یێ ھند خزمەتا وی و کەلتوورێ وی کری، بناڤێن جۆدا وێ حەشیمەتا پارەی خەرج دکەتن، دێ چەوا بۆ من و تە و کورد و کوردستانیان بیتە مال؟ ھێجەت تیرۆریزمە؟ ڕاستە بەلێ بلا جیھان بزانیتن ھەر دوو وەلاتێن ئیران و سعۆدییا ھێلیڤانک و سپۆنسەرێن سەرەکیێن تیرۆیزما جیھانینە، نەک ل دژی کەسێ بەلکۆ تنێ ل دژی ئێکدیتر ! دێ ئیسلام و مۆسلمانان چ ھیڤی ب ڤان دوو وەلاتان ھەبیتن. چەوا مرۆڤەک دلێ خۆ ب پشتەوانییا ئێک ژ وان دوو وەلاتان خۆش کەتن؟ تو پسیارێ ژ زارۆکەکی بکەی دێ وێ ب خشیمی دەینیتن. چەرخێ بیست و ئێکێ یە ئەڤ تشتە ب ئاقلێ بچویکەکی دا ناچیتن ڤێجا چەوا مەزن تێناگەھن؟
ئەو کۆنتراکتێن ل ڤان چەند ڕۆژان دگەل خەلکێ ھاتینەگرێدان و ئارمانج وەلاتەک ئیسلامییە، چ جیاوازییا وی َدگەل وی پارەیێ ئەو وەلاتێ وەھابی ل ڕێکخراوێن تیرۆریستی ل جیھانێ یان خۆ خافلاندن ب ھندێ بڕێکەکێ ژ ڕێکا، کۆ تشتەک نینە ژ ھەمان خەرجکرنا پارەی ل وان، کەس یان چەند کەسانەک ل ئەورۆپا یان ئەمریکا کرینە مۆسلمان و ھەمی ئێک تشتن، دەمێ خەلکێ مۆسلمان ھەر بۆ وی پارەی کۆم کۆم دبیتە نەمۆسلمان ! کابرایەک ئەورۆپی یان ئەمریکی دێ چەوا بیتە مۆسلمان ؟ ئەڤە خشیمییەکە بەس زارۆکێن ب شیر باوەر دکەن. ئەو مرۆڤ تشتەکی ژ ئایینێ خۆ نزانن و باوەری پێ نینە ھەتا شونیکا بێن ببن مۆسلمان ! من گەلەک تێکلییا وان بیانییان کر و دیت و زانی یێ ڤێ خەیالێ بکەتن ئەو بوویە مۆسلمان چ تشتەک بۆ سادەیی و گەمژەیی و خۆشباوەری و خشیمییا وی ناھێتە گۆتن.
چیڕۆکا ڤان ڕەفتارێن بیانییان و ئەورۆپی و بوونا وان وەک مۆسلمان چیڕۆکەک درێژە و ئەز وەکی ئەزموون جارەکێ گۆتارەک دویر و درێژ لسەر ڤی بابەتی نڤێسم. بەلێ تنێ من دڤێتن ئاماژەی ب گۆتنەکا خۆدێ ژێ ڕازی، عەلی وەردی، فەیلەسۆفی َمەزن، بدەم کە ئاماژەی ددەتن کۆ ئایینێ ھەر کەسەکی بۆ وی تشتەک گرنگ و پیرۆزە و ھۆسا بسانەھی نینە دەستان ژێ بەردەتن تنێ ئەگەر ب ئەگەرێن بھێز و کارتێکرنەک مەزن نەبیتن. چەوا ئەورۆپییەک چەند ڕۆژەکا تێکلی مۆسلمانەکی دبیتن و ئێکسەر دبیتە مۆسلمان؟ ئەڤە جھێ گۆمانێ یە. و ھاتنا ھزاران ژ وان کەسێن بناڤ مۆسلمان بۆ ناڤ ڕێزێن داعشیان نیشانەکە ڤێ گۆتنێ دسەلمینیتن. چەوا ئەو مۆسلمانێ ب کەساتییا محەمەدێ ئەمین(س) بمینیتە حێبەتی و ژ ھەمی ڕەفتار و کریار و گۆتار و باوەرێن جوان و مرۆڤدۆستانەیێن وی، ( فەخرێ کائیناتا) تنێ کۆشتن و سەربڕینێ و سۆتن و وێرانکرنێ فێر بوویە؟ بلا بەس بیتن پارەیێ ڤان مۆسلمانان لڤان ( ێنعەتکا ) بمەزێخن؟ مۆسلمان ژبرسان و ترسان دڕەڤن و دبنە مسیحی و تو شانازێی ب مۆسلمانکرنا ئێکی دبەی، یێ تنێ من دیتی و دزانم چ تشتن، و تە بەس گۆە ل مۆسلمانبوونا وی دبیتن؟ بلا سعدۆی بێتن " یێن بێ پێ بگریتن و بلا خۆ ژ ییچن ب پێ ڤەکەتن". مۆسلمان ژ کیستیچ تە چۆن دێ چ ل نەمۆسلمانان کەی؟
تو خۆدێ مسلمان بن و ڕێکا خۆدێ و پیامبەری و قەنجیێ بەرنەدەن، بەلێ خشیم و ساویلکە نەبن. قەنجی و خرابیێ و ڕاستیێ و درەوێ ژ ھەڤدۆ بنیاسن. دلێ خۆ ب وەھابیەتا مەلکێن سعۆدی و سیاسەتا ئیرانێ خۆش نەکەن و تێکلی ئاگرێ شێعە و سۆنناتیێ نەبن و مە ژی د وی ئاگری دا وەرنەدەن و نەسۆژن. ئەم کوردستانینە و مە تشتەک نەڤێتن ژبلی ژیانێ. مە نەوەکی وان کەرب ژ ھەڤدۆ و نە ژ کەسێ و نە ژ عەرەبان و نە ژ پارس و نە ژ ئیسرائیل و نە ئەمریکا و نەکەسێ ڤەنابن. مە تنیچ دەولەت و وەلاتەک دڤێتن ببیتە سیبەر ئەم لبن وێ سیبەرێ نەھێینە ئەنفال و کێمیابارانکرن. مە نەڤێتن ببینە دەولەت دا ھەر ڕۆژ سنگێ خۆ ل ڤی و وێ ھە و یێ دی بدەین. ئەم تنێ ل پارییەکێ ( حەلال) و دگرشھین دا ب خۆشی د حەفکا مە و زارۆکێن مە دا بچیتە خوارێ. ئەم کوردین. نە شێعەنە و نەسۆننەنە. ئەوێن سۆنناتی و یان شێعاتی لنک وان گرنگ و سەر کورداتیێ ڕایە بلا بار بکەن و بچن سعۆدی و ئیرانێ، دا ئەم د ئاگرێ وان نەکەلین. مە تشتەک ژبلی ئاسایێشا دەروونی و سایکۆلۆژی و جڤاکی و ئابووری و سیاسی و خێزانی ھیچ تشتەک دیتر نەڤێتن.