خۆدێ ژێ ڕازی مەلا مەحموودێ دێرشەوی، سیاسەتوان و زانا و وێژەوان، د ب. (٢٢١) ژ پەرتووکا خۆ یا گرانبھا، "مشتاخا چیا ژ گۆتنێن پێشیا"، چیڕۆکا زەلامەکێ خۆدان سێ ژنا دکەتن: ئێک حیز، یا دیتر دز و یا دیتر دەڤ پیس و دەڤ دڕھای. د دەست وان داژیانا وی پڕ نەخوش بی.جارەکێ ھەڤالەکێ وی پسیارا بێ گێولییا وی کر و وی ژی دەردێ خۆ و ژنان بۆ ڤەگێڕا. زەلامی، ژنەک باش ھەبی و دلێ وی ما ب ھەڤالێ خۆڤە،و داخواز ژ وی کر ژنێن خۆ پێکبگھۆڕن. وی ژی ژ خۆدێ دڤیا بەڵا وان سێ ژنان ژێڤە ببیتن. یێ ببی خۆدانێ سێ ژنان، مالا خۆ ژ وی گۆندی بر و قەستا جھەک دیتر کر. بڕێڤە ژ ئاڤەک مەزن دەرباز بین. وی ژنێن حیز و دز ژ ئاڤێ دەرباز کرن و یا دەڤدڕھای و خەبر ڕەش و جڤین پیس ب ئاڤێ دا بەردا و دا خەندقاندنێ. پاشی ڕابی یا دز کرە کاڤانییا مالێ و بۆ یا حیز مەزەلەک چێکر دوو دەرگەە. پشتی ماوەکی ژ دزیکرنێ یا دز گۆتە خۆ باشە ڤی زەلامی ژ باوەرییا خوە ئەز کرم کابانی بۆچی دێ ژ بەر ژنێن دیتر دزییا کم. وێ ئەو شۆل ھێلا. یا حیز ژی لسەر دەە و دۆۆا خۆ بی، پشتی مەدەھەکی ھزرێن خۆ کرن ئەڤی زەلامی ژۆرەکا ھۆسا بۆ من چێکری دا گاڤا ئەو ھات یارێ من ژ دەرگەھێ دی دەرکەڤت. باشە بۆچی؟ وێ ژی فەعلێن خوە ھێلان. وان تەوبە کرن و بینە ژنێن بژاردە. مێرکی پشتی ھنگی جارەک دیتر ژڤڕی گۆندێ خوە. زەلامێ وان یێ بەرێ ئەو دیتن و پێحەسا ئەوێن بینە شەنگە ژن ! ما حێبەتی. پسیارا ھەڤالێ خوە کر کا وی چەوا ئەو کرنە مرۆڤ. ئەو ژی چیڕۆکا خوە و ھەر دوو ژنا ڤەگێڕا. گۆتێ: پا یا دیتر ( سێیێ ) چ لێھات؟ وی ژی گۆت: خۆدێ من ھزرێن خوە کرن و زانی یا حیز دێ حیزاتیێ ھێلت و یا دز ژی، بەلێ من زانی یا دەڤدڕھای دێ مینتە وەسا و من ژ قەھرا دا وەکی تە لێکت. من ب ئاڤێ دا بەردا!
ڤێجا زەلامێن دەڤپیس و دەڤدڕھای ژی نەکێمن. ئەحمدی نژاد، سەرۆکێ بەرێ یێ ئیرانێ و پالێوراوێ نۆکە بۆ ڤی پۆستی جۆرەکێ وانە. خۆزی دلێ وی ژی وەکی سەروبەرێ وی یێ سادە و خاکی بایە. خۆزی ئەو ھەما ھندی سەری درێزیکێ وەکی زەردەشت، پێغەمبەرێ مەزنێ ئاریایی بایە. ڕاستی ھەکەر وەسا بایە دا تشتەک نموونە بیتن. بەلێ نەوەسایە. د ھەمی قۆناغا پۆستێ خۆ یێ بەرێ وی ب ئەزمانێ خۆ فۆبیایەک ل ڤێ جیھانێ ئاڤاکر و گاڤا دەڤێ وی زڤڕیبایە دا خەلک وەسا تێگەھیتن ھاھا نۆکە و بێھنەک دیتر دێ ئیران بسەر وەلاتێ ئیسرائیل دا گرت و شیر و پیر ھەمییا سۆژیتن و قەد و پەد کەتن ! ھەمی ئاخفتنێن وی ئەڤ ڕەنگێ پیس پێڤە ھەبی ! ھندەک دبێژن سیاسەت بی. بەلێ نزانم چ تۆڤ سیاسەتە ئەڤ حیشتەحیشتە ئیناندی جیھانێ. دەڤەکێ دڕھای کۆ ھەمیان ھزر دکر ھەکەر ( ئاخر زەمانەک ) ھەبت دێ لسەر دەستێ وی ڕابت. ڕەشەکێن وەھابیێن جیھانێ دگۆتن ئەوە ( یەعجووج و مەعجووج ). لێ ھەتا ڤێ گاڤێ ژی ئەز ژ ڤی تێگەھی نەپشتڕاستم کا چ تشتە بەلێ وان وەدگۆتن ! باشە ھەی ( مال میرات ) ئیسرائیل نە ( جیرانێ ) تەیە و نە ڕۆژەکێ بەرەک د تە وەرکرە، تە ئەڤ دەڤە ھندە ل وان شڕ کری. ھاھا دێ حنگەکێ ل تە دن توو تی و تی بچی و جیھانێ و تەڕ ھشک ژی د وی ئاگری دا سۆژی ! عەرەب بازرگانیێ ب کۆڕێن خۆ ل فەلەستینێ دکن و وان پف ددەن و ددنە کۆشتن، ئاغا ! تە خێرە؟!
بەلکۆ ئێک بێژت ما مە شۆل بڤێ چەندێ ھەیە و ئەز دێ بێژم نەبخۆدێ بەلێ ما ھوین نابینن دەڤپیسییا ئەحمەدی نژادی یا بیە نەخۆشییەکا سایکۆلۆژی و گەھشتییە گەلەک ژ ڕەشەکێن وی ل سوپایێ پاسداران و حزبۆلا و ... ھتد، و ھندە دێ وی دەڤێ پیس ل مە ڤەکەن ! ھەرچەندە وان ژ بیر نەکرییە ئەم نە ئیسرائیلین و نە عەرەبین، و بەس یێ شەقا کوردان ڤ دەڤێ وان کەتی ھێشتا تاما ... ژ دەڤێ وان تێتن و بسەر خۆڤە نەھاتینە. کورد ھند ( قەدرێ ) ھەڤالێ خوە دگرن ھندی وی یێ خوە گرتی ! بێگۆمان چیڕۆکا مەلا مەحموودی وانەک مەزنە بۆ وان بەلێ پا ب مخابنیڤە وان ئەو چیڕۆک نەدیتیە و نەخواندییە. باشە ھەکەر ئەو ڤێ جارێ ژی دەرکەفت و بی سەرۆک کۆمارێ ئیرانێ و فەعلا خوە نەھێلا و نەبیە شەنگە زەلام، کی دزانیتن دێ کیژ زەلام ئەحمەدی نەژادی ب ئاڤێ دا بەردەتن؟ *بسپۆرێ زانستێن پێداگۆگی و پەروەردەیی/فاکۆلتییا پەروەردە/ زانینگەھا زاخۆ