چەرخێ بیست و ئێکێ ب سەدان ھزار ئاریشەیانڤە، چ ژیان بۆ مرۆڤاتیێ نەھێلان، و ھەمی ل ھیڤییا ئارامیێ و تەناھیێ و دەرگەھێن خێرێ بین دا ھندەک ژ خەم و خیالێن وان کێم ببن، لێ وەسا دەرنەکەفت. ل وی سەدەی ھێشتانێ ھۆڤترین مرۆڤێ ڤی سەردەمی " سەدامێ گۆڕ بگۆڕ" ھێشتان ساخ بی و نەسەکتی بی، " بن لادن" ھات، و ھێشتان جیھان ش مرنا وی ڕەحەت نەببی " ئەبوبەکر" ھات و ھزاران تاوانێن وەکی " ئالان" و " سەنا"یێ بۆ جیھانێ ب مزگینی ئینان. ئەم پشتا وی/ێ ناگرین یێ/یا بیە ئەگەرێ بڕینا دەستێ سەنایێ، بەلکۆ پێدڤی دبینین بھێتە سزادان، بەلێ پا ھەرێ تنێ ئەو بەرپرسیارە ژ ڤێ چەندێ؟ ڕاستە گەلەک بناس ھەنە بۆ وێ کارەساتێ، بەلێ بۆچی کەس بەحسێ ھندەک فاکتەران ناکەتن؟ گەلەک پسیارێن ھەین وەکی " بۆچی...؟" و کەس خۆ لێنادەتن. ڕاستە، نۆژدار و لدویڤ گازندە و ئەزموونا گەلەک کەسان، و وەکی عەلی وەردی ڤی تێگەھی بۆ ئەکادیمییان بکار دئینیتن و وەسا دبینیتن ھندەک ژ ئەوان خۆ گەلەک مەزن دبینن و دفن بلندن و د " برجێن بەلەک دا دژین"، وەسا دیار دبیتن ھندەک نۆژدار ژی دویر نین ژ ڤی ساخلەتێ کرێت و خۆمەزن کرن یا د ھندەکان دا ھەی، ھەرچەندە کە یێ ھەی ژی وەسا نینە و گەلەک خزمەتخۆشن، و ئەڤە ئاساییە ژزیشک وەسا بن، چونکی ھەکەر کەس نەزانیتن پێدڤی بوو نۆژدار ژ ھەر کەسەکی باشتر و پتر و زوویتر بزانن کە " مرۆڤ" بەرھەمێ "چپکەکا ئاڤا پیسە" نە تشەتەک دیتر و ژ عەسمانا ھاتیە، و ڤێجا دفن بلندییا ھندەک ژ وان، تنێ شاشییەکا ھزری و ژبیرکرنا ڕەسەناتییا خۆ، و ھندەک جاران بناسێ کارەساتێن وەکی ڤێ ژێ پەیدا دبن. بەلێ پا فەرە ژی بزانین و پسیار بکەین ئەرێ " کارەساتا سەنایێ" تنێ ژ ڤێ چەندێ چێبیە؟ ئەرێ کەس نابینیتن یێن ژ تۆخمێن داعش و داعشیێن ھەمەجۆر و ناسیۆنایست و دۆگماتی و مەژی ھشک و ھشکباوەر د ھەمی وان پسیاران و کارەساتان دا خۆ دووبارە دکەن؟ باشە مە گرتی ئەمریکا یان جۆھییان ئەبووبەکر بەغدادی چێکر و ھەیڤەکێ ڕھێن وی نەتراشین و ڤرَێکرە دەڤەرێ بۆ بازرگانییا چەکی، ئەڤێن کەفتینە دویڤ وی ژ کیڤە ھاتن؟ ئەو بخۆ نەوەسایە، بەلێ باشە پشکا ئێکەم یا ڤی فیلمی وان چێکر، کێ ئەو تەواوکر؟ کیژ ئەمریکی یان جۆھی چۆ ل ئەورۆپا و وەلاتێن عەرەبی و ( ١٠٠) وەلاتێن ئیسلامی و جیھانێ ئەو ھەمی ئینانە ڤێرێ و ئەڤ ئاگرە ل کوردستانێ ھلکر و ھزاران کەس کرنە قۆربانی، و یا دۆماھیکێ ژی " سەنا" یا بێتاوان بی؟؟!! و بیە خۆدانێ دەستەکێ بڕی، و ھەکەر پسیارا وی کەسێ تۆھەمتبار بکەی، دێ ئاشکرا بیتن ڕەوشا وی یا سایکۆلۆژی د بلندترین ئاستێ نالەباریێ و بەرھەمێ ڤێ قەیرانا ئابووری و سیاسییا بێ ڕامان، بوویە تا کار گەھشتیە ڤێ چەندێ. کی ژ ڤێ قەیرانێ بەرپرسیارە ھەکەر نە ململانێیا بازرگانێن دوو تەخێن شێعە و سۆننە نەبن؟ ئەوێن ململانێیا وان چ پەیوەندی ب ئایینی ڤە نینە و تنێ بەرژەوەندینە. باشە ھەکەر ئایین ئەگەرە، بۆچی ڤی ئایینێ پیرۆز ئێک ژ وەحشتی و ھۆڤترین نەتەوە ل جیھانێ، ئانکۆ " تەتەر " ل سیبیرییایا ڕۆسیایێ کرنە مرۆڤ و نۆکە د بەلاڤۆکێن خۆ دا " ڕێزگرتنێ و سوپاسداریێ" ب مەزنترین و سەرەکیترین و پێدڤیترین بھایێن خۆ دزانن (١ : ل. ٣)، و ھوین ژ ڤی ئایینێ پیرۆز چ تشتەکی فێرنەبین، و نزانن ڕێزێ لخۆ و خەلکێ و جیھانێ و "سەنایێ" بگرن، و نە فێربووینە سووپاسگۆزارییا یەزدانێ مەزن و دلۆڤان و محەمەدێ ئەمین (س) و قۆرئانا پیرۆز بکەن بۆ وێ کەرەما دگەل ھەوە کری و ھوین ژ نەھەیێ گەھاندنە گەلەک تشتان، بەلێ ھوین بەڵا خۆ ژ " سەنا"یێ و ... ھتد، ڤەناکەن؟ کی و چی ل پشتا ھەوەیە؟ ئەڤە چ سەروبەرە وە بۆ خۆ و جیھانێ دروستکری؟ ھوین بۆ کێ دکەن و کەسێ ھای ژ وە نینە؟ ھوین دێ کەنگی فێری ڤان دوو بھایان بن؟ دێ کەنگی فێر بن ڤەحەون دا دەستێن وەکی " سەنا" یێ نەھێنە بڕین؟ ژێدەر:
(١) Гуртунма, Т. И Шакиров, К. (٢٠٠٧). Введение: отдвая дань почтения пророку Мохаммаду, изд.-во "НОВЫЙ СОВЕТ", Москва.
*بسپۆرێ زانستێن پێداگۆگی و پەروەردەیی/فاکۆلتییا پەروەردە/ زانینگەھا زاخۆ