بیست و نۆ ساڵ بەسەر شاڵاوی جینۆساید و ئەنفال، ڕووداوێكی زۆر تراژیدیایی گەلەكەمان تێپەڕ دەبێت، لە ئاكامدا، زیاتر لە سەد و هەشتا ودوو هەزار ئافرەت، منداڵ، گەنج و پیری كوردستان بوونە قوربانی, زیندەبەچاڵ كران, بە هەزاران هاووڵاتی كوردیش شەهید كران، ئێستاشی لەگەڵدا بێ‌، تەرمی زۆر لەو شەهیدانە لە گۆڕە بە كۆمەڵەكانی باشوور و ناوەڕاستی عێراقدا بێسەروشوێنن. بە سەدان تاقانەی ئەنفال لە چاوەڕوانیدان و بەو هیوایەن رۆژێك لە رۆژان كەسوكارەكانیان بگەڕێنەوە. جینۆساید مەرگی لەسەرخۆی گەلێك بوو، ئەو مەرگە زیاتر لە دووسەد رۆژی خایاند و درێژ بووەوە بۆ ناو هەموو جومگەكانی ژیانی كورد، ئەوەشی بە ڕێكەوت لێی رزگار بوو، دەرد و مەینەتەكانی رۆژگار، بە شێوازێكی دیكە ئەنفالی كرد، ئەو تاوانە گەورەیە شوێنەواری خراپی لەسەر سەرتاپای ژیانی ئەو گەلە لە دوای خۆی دانا. شاڵاوی جینۆساید، یادێكی نیشتمانی گەورەیە، ئازارێكە هەرگیز تەواو نابێت، لە ماوەی رابردوودا، بەشێوازی جۆراوجۆر، چالاكی هەمەلایەن، لە شوێنی جیاجیای كوردستان، یادی ئەم تاوانە گەورەیە كراوەتەوە، بەڵام بۆ لەمەودوا، پێویستە فۆرمی كاركردن و یادكردنەوەی بگۆڕین، بۆیە پێشنیاز دەكەم:
یەكەم: كاتی ئەوەیە وانەی جینۆساید بخرێتە چوارچێوەی بەرنامەی خوێندنەوە.
دووەم: جینۆساید كەرەستەیەكی گرنگی بە دەوڵەتبوونە، پێویستە لێكۆڵینەوەی زیاتری لەبارەوە بكرێت.
سێیەم: ئەنجوومەنی نوێنەرانی عێراق وەك میراتكەرەوەی دەوڵەتی پێشووی عێراق، بە فەرمی داوای لێبوردن لە گەلی كورد بكات، هاوكات جەخت كردنەوە لە دەوڵەتی عێراق بۆ قەرەبووكردنەوەی ماددی و مەعنەوی كەسوكاری سەربەرزی ئەنفالكراوان.
چوارەم: لەسەر ئاستی لۆكاڵی كۆدەنگییەكی نەتەوەیی لەسەر جینۆساید دروست بكرێت. بۆ نموونە كە یادی تاوانی جینۆساید دەكەینەوە، لە یەك كاتدا، یادەكە هەموو شار و شارۆچكەكانی كوردستان بگرێتەوە.
پێنجەم: بەنێودەوڵەتیكردنی تاوانەكانی ئەنفال و جینۆساید. پێویستە هەوڵەكانی بە جینۆساید ناساندنی ئەنفال لەسەر ئاستی جیهانی بەردەوام بن و بگەنە ئەنجام. لۆبی و ڕەوەندێكی سیاسی كوردی بەهێز لە دەرەوەی وڵات سەبارەت بە مەسەلەی ناساندنی جینۆساید دروست بكرێت.
شەشەم: جوانترین و باشترین وەفاداری بۆ خانەوادەی ئەنفالكراوەكان، زیندانی كردن و سزادانی ئەو سەرۆك جاش و مەفرەزە خاسە و موستەشارانەیە، كە لە ئەنفالی بەدناودا بەشداریان كردووە، ئەگەرچی دادگای باڵای تاوانەكانی عێراق لە ساڵی 2007 فەرمانی دەستگیركردنی بۆ زیاتر لە 400 تۆمەتبار دەكرد، كە دەستیان لە تاوانی جنۆساید و ئەنفالدا هەبووە، بەڵام بەشێكی زۆر لەوانە تاوەكو ئێستا دەستگیرنەكراون.
حەوتەم: كاركردن لەسەر جینۆساید و ئەنفال تەنیا لە 14/4 نەبێت‌، بەڵكو كاركردن لەسەر ئەم پرسە، تەواوی‌ لایەنە جۆراو جۆرەكانی‌، باگراوەندە فەلسەفی‌، فیكری‌ و سیاسییەكەی‌، یەكێك بێت لە ئەركە بنەڕەتییەكانمان.