ئەركی لۆژیك ئەوەیە فێرمان بكات چۆن بیركردنەوەمان بەڵگەئامێز بێت، كەواتە دەبێ ئەو راستییەی بانگەشەی بۆ دەكەین، بیسەلمێنین و بۆ سەلماندنی هەموو راستییەك پەنا بۆ بەڵگە ببەین.
با پەكەكە و ئەرستۆ بكەین بە كەرەستەی گفتوگۆو بەڵگە، لە پێناسەی ئەرستۆییدا بەڵگەهێنانەوە پێویستی بە دوو پێدراو و ئاكامێكە، واتە دەرچوونی ئاكام لە دوو پێشەكییەكەوەیە و هەرگیز نابێت بەو جۆرە نەبێت.
ئەگەر كەسێك پاش بینینی هەموو قەلەڕەشەكانی دەوروبەری بەو ئاكامە بگات كە هەموو قەلێك رەشە، بە دۆزینەوەی قەلێكی سپی ئاكامەكەی پووچەڵ دەبێتەوە، بەڵگەهێنانەوەكەی نادروست دەردەچێت.
ئەم لۆژیك و یاریكردنە لە دنیای سیاسەت و شەڕی ئایدیاكاندا، كارەساتی هێناوە، پێوەندیی ئایدیاییانەی پارتە سیاسییەكانی كوردستان و سەردەستەیان پەكەكە، مێژوویەكی كارەسات ئامێزی بۆ كوردستان دروست كردووە، كە كەم و زۆر لە هەموو پارچەكان، ناخ و سەنتەری ماناكانی نیشتمانیبوون مایەپووچ دەكات.
لە لۆژیكەوە: هەموو پارتە سیاسییەكانی كوردستان نیشتمانپەروەرن، بۆ كوردستان و ئازادی و سەربەخۆیی خەبات دەكەن، ئەمە دەستەواژەیەكی هەمەكیی پۆزەتیڤە.
پارتە سیاسییەكانی كوردستان بۆ كوردستان و ئازادی و سەربەخۆیی خەبات ناكەن و دوورن لە مۆڕاڵی نیشتمانی، ئەمە دەستەواژەیەكی هەمەكیی نێگەتیڤە.
با لایەنگری پۆزەتیڤ بین، مامەڵەی پەكەكە، بە هەرسێ یاساكانی ئەرستۆ (خۆیەتی، ناكۆكی، لە ناوەند بەدەر)، وەربگرین.
یاسای خۆیەتی: شوناس یا ناسنامە، واتە ئەو شتە خۆیەتی و شتێكی تر نییە، هەموو شتێك وەك خۆی هەیە و خاوەن شوناسە، بوون بوونە و نەبوونیش نییە.
لە یاسای خۆیەتی پەكەكەدا، شوناسی تایبەتی بوونی خۆی هەیە، لە دەرەوەی ئەوە نەبوویە و، نەبوونیش نەبووە، پەكەكە دەشوناسێنێ و دەبووێنێ، كە نوێنەرایەتی ٥٠ ملیۆن كورد دەكات و، دەبێ ٥٠ ملیۆن لەژێر هەر ناو و حزب و شوناس و گرووپ و حزب و ئایین و مەزهەبێكدا بن، دەبێ لە كورەخانەی پەكەكەوە خۆیان ببیننەوە، تا ئەو شوێنە ئازادن كە لە سیدرەتولمونتەهای پەكەكە نزیك نابنەوە، ئەگەر وابوو ئەوا بە یاسای خۆیەتی شوناسی پەكەكە دەكەوێتە مەترسی و دەبێ پلان و پیلان لە دژیان لە ئارادابێ. هەروەك د. جەزا چنگیانی دەڵێ: (خەباتی پارتی كریكارانی كوردستان تەنیا لە باكووردا قەتیس نەما، گرفتی هەموو پارچەكانی كوردستان بوو بە ئەركی پ ك ك).
یان سەنتەری كوردستان باكوورەو، لە بەرامبەر ئەمە شوناسێك هەیە، دەبێ رۆژهەڵات و باشوور و رۆژئاوا خزمەتی باكوور بكەن كە ئەو ئاغاو بەگزادەش تەنیا شێخ پەكەكەیە. لە باكووریش نابێ هەناسەیەكی تر هەبێت، بە ناوی ئازادی و دیموكراسییەوە، ئەگەر شنەباش بێت، دەبێ بسڕدرێتەوەو ئیعدامی شۆڕشگێڕانەی بكرێ، رەشەباش بێت دەبێ جیهادی دژ بكرێت.
بە گوێرەی یاسای دووەم، ناكۆكی یان لە ناكۆكی بەدەر، بۆ یاسای یەكەم، بوون بوونە و نەبوونیش نییە، تەنیا یەك بوون هەیە و، ئەگەر باسی راستی هەبوویەكیش لە شوێن و كاتێكی دیاریكراودا بكرێت، ئەوا شوناسی هەبووە كە پۆزەتیڤ خۆی دەردەخات، یان خۆی بوونەو پۆزەتیڤە، لە پەیوەست بە یاسای دووەم، واتە بەگوێرەی یاسای دووەم، راستی هەبوویەك لە كات و شوێنێكی دیاریكراودا بەیەك شێوە (پۆزەتیڤ یان نێگەتیڤ) دەردەبڕێت، بێگومان ناكرێت دوو خەسڵەتی دژ وەستاوی بۆ دابنرێت.
پەكەكە ئەم یاسایەش هەر بەم رەهاییە وەردەگرێت، یان باشە، یان خراپ، نیوە پڕ و نیوە بەتاڵ نییە، واتە دەبێ یەكێكیان بێت و ئەوی تر نا.
چۆن عیرفانێ! یان دەبێ بۆ دنیا واز لە خۆشەویستەكەی بێنێ، یان بۆ خۆشەویستەكەی واز لە دنیا بهێنێت، نابێت هەردووكیانی پێكەوە هەبێت، یان هیچیانی نەبێت، پەكەكەش بە رەهایی چاك و خراپ ناتوانێ بوون و هەماهەنگی و بەرژەوەندیی هیچ پارچەیەك و هێزێكی سیاسی لە دەرەوەی بوونی خۆیدا بە هەبوو ببینێ.
لە بەرئەوەی لە دیدی پەكەكە باوونێك هەیە، كە تابۆیە و تەوتەم كراوە، ئیتر ئەم بوونە دەبێ وەك خۆی لە هەر كوێیەك قەتار و رەشماڵ هەڵبدات، ئازادە.
یاسای سێیەم ئەو واتایە دەبەخشێت كە راستی هەبوویەك، ئەمە یان ئەوەیە و نابێت شتێك بێت لە نێوانیاندا، واتە لە نێوان دوو ئەگەردا تەنها دەبێ یەكێكیان بێت، دەرگاكە یان دەبێت كراوە، یان داخراو بێت، نیوە داخراو، یان نیوە كراوە نییە!
پەكەكە بوون و بەردەوامی لە مانابەخشینی رەها بە خۆی و رەتكردنەوەی ئەوانی تردا دەبینێ، بەرژەوەندی و شوناسی لای خۆی پلە یەكە و، بوونی هەر بەرژەوەندییەك كە شوناس بداتە ئەوی تر، چەندیش رەوا بێت، نابێت هەبێت، چونكە لای ئەو بوونێك هەیە، ئەویش دەبێت هەبێت كە پەكەكە و لە دەرەوەی یاسا و لە سەرووی یاسایە و، بوونێكی تر، واتە نەبوونی ئەو.
ئەم یاسایانە ئەگەر بۆ بیركردنەوە گرنگن، بەڵام لە فۆڕمە رووتكراوەكەیاندا، وەكو (ئەوە هەیە)، (ئەوە هەیە، یان نییە) و، (ئەوە دەبێت هەبێت، یان نەبێت) باشتر گشتگیرییەكەیان دەسەلمێندرێت، هەندێك جار لە حاڵەتە كۆنكرێتییەكەیاندا تووشی كێشەمان دەكەن، دەكرێ جیاوازتر بیر لە راستییەك بكەینەوە.
قسەمان لە سەر ئەوە نییە كە ئەرستۆ بەم لۆژیكانە چ خزمەتێكی پێشكەش كردووە، چ گۆڕانێكی لە فەلسەفە و یاساو سیاسەتدا كردووەو، دواتر ئەم یاسایانە لە دنیای فەلسەفەدا چارەنووسیان چییە، قسەكە ئەوەیە كە پەكەكە هەڵگری عەقڵییەت و دەقی سیاسی و فیكری شمولی و دۆگما و رادیكاڵ ئایدیایە سەبارەت بە بیركردن و كاركردن لە خۆی و ئەوی تر. سەرچاوەی هەموو دیدو رێكخراوو ئەكتە تیرۆریەكانیش ئەم دوالیزمەی كوفرو ئیمانە.
بە یەك دێڕ لەم لۆژیكەی سەروەڕا پەكەكە دەڵێ: بۆ من كوردستان بۆ كوردستانییانە، پەكەكەش كوردستانییە! كەواتە هەموو شوێنێكی كوردستان بۆ پەكەكەیە، دەتوانێ بڕیار بدات، سیاسەت بكات، شەڕ بكات، كلكایەتی بكات، چەكداری بكات، گرووپ و كۆمەڵ دروست بكات، تەڤگەر بێنێ و ببات، كێشە بكات، چاكە بكات، خراپە بكات، ئەو هاوكیشەیەكی نەگۆڕی یاسایی هەیە كە خۆی بەڕەوای دەبینێ و تەنها بۆ ئەویش رەوایە!
پەكەكە چۆن بیردەكاتەوە دەبێ واز لەو لۆژیكە بهێنێ: كە چ زیان بێت بۆ بەغداو تاران و دیمەشق ئەوە بۆ ئەویش زیان و كارەساتبارە، بەپێچەوانەوەش لە خزمەتی پڕۆژەی سێ دەوڵەتی داگیركەردا بێت بە كۆنفیدڕاڵی دیموكراسی و دژە دەوڵەت – نەتەوە پێمانبناسێنێت!!