دیمانه‌كه‌ی مالیكی له (ئاوێنه) و چه‌ند سرنجێك
ئاسۆ عه‌لی فه‌ره‌ج
هه‌فته‌نامه‌ی (ئاوێنه)، به‌شێكه له‌و میدیا سێبه‌رانه‌ی خزمه‌ت به كۆمه‌ڵێك ئه‌جێندای دژ به كورد ده‌كات و زۆرجاریش خۆی هێناوه‌ته ئاست ململانێی هه‌رێمایه‌تیه‌كان و گوێینه‌داوه‌ته برینداركردنی هه‌ستی نه‌ته‌وه‌یی كورد، به‌تایبه‌تی ئه‌و كاتانه‌ی ئاستی ململانێی مه‌زهه‌بی و هه‌رێمایه‌تیه‌كان ده‌گه‌ن به توندی و ته‌واوی ئه‌و لایه‌نانه فه‌رامۆش ده‌كه‌ن، ئاوێنه‌ی ده‌رخستنی راستیه‌كانه له پێناو رۆڵی میدیا له كۆمه‌ڵگا و سیاسه‌ت، یا ئاوێنه‌ی گواستنه‌وه‌ی ژه‌هر و سیاسه‌تی دووربه‌ره‌كی نانه‌وه‌ی نه‌یارانی كورده.
له لاپه‌ڕه 3ی رۆژی سێ شه‌ممه‌ی 31ـی1ـی2017ی ژماره(563)ی ئاوێنه‌دا، دیمانه‌یه‌كی نوری مالكی سه‌رۆكی ئیتیلافی ده‌وڵه‌تی به‌ناو(یاسا) و جێگری سه‌رۆك كۆماری عێراق بڵاوكراوه‌ته‌وه.
ئه‌و سرنجانه‌ی پێویستن به گومانه‌وه له‌و دیمانه‌ی مالیكی له (ئاوێنه) بخرێته‌ڕوو ئه‌وه‌یه:
یه‌كه‌م: مالیكی له‌وه باش تێگه‌یشتووه، هه‌ندێك میدیا له كوردستان به‌هۆی هه‌ستی كه‌مزانینی خۆیان و ده‌ستپانكردنه‌وه‌یان بۆ هه‌ندێك پاره پشت له هه‌موو به‌هایه‌كی نه‌ته‌وه‌یی ده‌كه‌ن، بۆیه ئه‌مجاره هه‌فته‌نامه‌ی (ئاوێنه)ی به‌كارهێنا.
دووه‌م:مالیكی له رێگه‌ی میدیاكانی خۆیه‌وه به زمانی عه‌ره‌بی زۆر هه‌وڵیدا وه‌ڵامه‌كانی بگات به هه‌موو عێراقیه‌كان، به‌تایبه‌تی بۆ شه‌قامی كوردی، به‌ڵام به‌هۆی حه‌قیقه‌تی ناشیرینی ئه‌م پیاوه، كاریگه‌ری ئه‌وتۆی نه‌بووه، ناچار ئه‌م جۆره دیمانه‌یه به كوردی رێكخراوه.
سێهه‌م: ئه‌گه‌ر دیمانه‌كه رێكخراو نه‌بووبێت و مالیكی خۆی نه‌ویستبێ، هه‌رگیز (ئاوێنه) ناگات به نوسینگه‌ی مالیكی و دیمانه‌یه‌كی وا كورتكراوی له‌گه‌ڵ ئه‌نجام نادرێ.
چواره‌م: گومانێكی زۆر له داڕشتنی دیمانه‌كه هه‌یه، كه ئاماژه‌یه به‌وه‌ی (ئاوێنه) هیچ رۆڵێكی نه‌بووه ته‌نیا بۆی وه‌رگێڕاوه‌ته سه‌ر زمانی كوردی.
پێنجه‌م: ئه‌گه‌ر(ئاوێنه) سوودمه‌ند نه‌بێ له‌و ئیمتیازاتانه‌ی مالیكی ده‌یبه‌خشێته‌وه بۆ جوان نیشاندانی خۆی و كرده‌وه‌كانی، چۆن جورئه‌ت ده‌كات رووی كه‌سێك سپی بكاته‌وه، به ئاشكرا دژایه‌تی پێشكه‌وتنی هه‌رێمی كوردستان ده‌كات و بێڕێزی ده‌نوێنێ به‌رامبه‌ر قوربانیه‌كان و بیانوو ده‌هێنێته‌وه بۆ برسی كردنی خه‌ڵكی كوردستان؟
شه‌شه‌م: ئه‌وه‌ی كرۆكی دیمانه‌كه ببینێ و ورد ته‌ماشا بكات،(ئاوێنه) هیچ پرسیارێكی پێداگیریانه‌ی نه‌بووه به‌وه‌ی بۆچی بڕیارت دا مووچه ببڕی، له‌وه‌یاندا هێنده هه‌وڵی جوان نیشاندانی مالیكی و وێناكردنی هه‌ستی مرۆڤایه‌تی مالیكی نیشانداوه، هێنده خه‌می نه‌بووه به‌و قسانه‌ی مالیكی میلله‌تێك بریندار ده‌كرێت.
له‌باره‌ی خودی مالیكیشه‌وه، ئه‌وا ته‌نیا كورد نییه نه‌هامه‌تی چه‌شتبێ به‌هۆی سیاسه‌تی دیكتاتۆرانه‌ی ئه‌م پیاوه، به‌ڵكو شاهید ئه‌وه‌یه له‌سه‌رده‌می حكومڕانیه‌كه‌یدا ژماره‌یه‌كی به‌رچاو له كه‌سایه‌تی سیاسی، ئه‌كادیمیست، دكتۆر، كۆمه‌ڵایه‌تی، به تیرۆركردنێكی رێكخراو له ناوبراون و هه‌مووشیان به‌بڕیاردانی راسته‌وخۆی مالیكی بووه. جگه له به‌هه‌ده‌ردانی سه‌روه‌ت و سامانی گه‌لانی عێراق و ته‌واوی ئه‌و پێشێلكارییه به‌رچاوانه‌ی به‌رامبه‌ر به یاسا و ده‌ستوری عێراق ئه‌نجامیداوه.
ده‌بوایه(ئاوێنه) به‌كارێكی میدیایی بێلایه‌نیش بوایه، ئاماژه‌ی به‌و هه‌نگاوانه بكردایه به‌هۆی سیاسه‌تی مالیكه‌وه بوو گرووپێكی تیرۆریستی وه‌ك(داعش) سه‌رهه‌ڵده‌دات و مالیكی ده‌بێته هاوكار بۆ دڕندایه‌تی ئه‌و گرووپه، به‌ڵام له بنه‌مادا(ئاوێنه) ته‌نیا ئه‌ركێكی به‌رامبه‌ر به ده‌سكه‌وتێك، كه دڵنیام ئه‌ویش ئاشكرا ده‌بێ به ئه‌نجامگه‌یاندوه و ده‌قی دیمانه‌یه‌كی ئاماده‌كراوی نووسینگه‌كه‌ی مالیكی بۆ بێڕێزی كردن به كورد بڵاو كردۆه‌ته‌وه.
