دروشمی قەبە و ناوەڕۆك بەتاڵ
كاتێك لە شاخ و دەربەردەری بووین، حزب و لایەنە سیاسییەكان پێشبڕكێیان بوو لە سەر دروشم و ئامانجی گەورەتر، هەتا دروشمیش ئایدیالی و گەورەتر بوایە، ئەوە زیاتر نیشانەی سیاسەتزانی و شۆڕشگێڕیتر بوو. ئەوانەی دروشمی هەر چوارپارچەی كوردستانی سەربەخۆ و گۆڕینی سیستمی سەرتاسەری دنیایان بەرزكردبۆەوە، هەموو خەڵكی دیكەیان لا خائین بوو، ئەوانەشی كە دروشمی مافی چارەنووسیان وەك لاستیك بەرزكردبووە، لای سەدام بە مافی هەڵپەڕكێ و گۆرانی مافی چارەنووسیان لێكدەدایەوە، لای گەلی بەشمەینەتی كوردستانیش بە مافی دەوڵەت، لەم سەرینەوە حەشریان بە پارتی و رێبازی بارزانی دەكرد، تەنانەت حزبی سیاسی واش هەبوو بەپێی بارودۆخ و بەرژەوەندییەكانی لە هەر كۆڕ و كۆبوونەوەیەكدا بە پێی ژینگەی سیاسی ئەو دۆخە دروشمیان بەرز دەكردەوە.
راشكاوانەتر ئەوكات گومرگ و باج لەسەر قسە و دروشمی سیاسی نەبوو، بۆیە هەموو لایەنەكان لافی مافی سەربەخۆیی و دەوڵەتی كوردستانیان لێدەدا، ئاسانترین رێگە بۆ ئەوەی خۆیانی وەك شۆڕشگێر پێ بناسێنن، پەلاماردانی بارزانیی نەمر و سەرجەم شۆڕشەكان كوردستان و بێڕیزی كردن بوو بە بەها و پیرۆزییەكانی كوردستان، هەربۆیە چەند دروشمی گەورەتریان بەرز بكردایەتەوە، ئەوا بێڕێزیكردن بە بارزانیی نەمر و مێژووی خەباتی گەلی كوردستان زیاتر دەبوو.
بیری نەتەوەیی و گەڕانەوە بۆ توراس
گرنگە لەو راستییە تێبگەین كە پێویستمان بە خوێندنەوەی هیچ پەرتووك و تیۆرییەك نیە بۆ ئەوەی بزانین ئایا گەلێك بەناوی گەلی كوردستان و نەتەوەیەك وەك نەتەوە بوونی هەیە، یان ئایا خاكێك بە ناوی كوردستان بوونی هەیە؟ بۆ وەڵامدانەوەی ئەم پرسیارانە ئایا دەبێت بگەڕێین بۆ ئەوەی بزانین تیۆرزانێك، یان نووسەرێكی بیانی، یاخود عەرەب و تورك و فارس، لە نێو دێڕەكانی نووسینێكدا بە هەڵە لەدەستیان دەرچووە و ناوی كورد و كوردستانیان هێنابێت؟ یان بگەڕێین بۆ ئەوەی بزانین ئایا بە پێی تیۆرەكانی ماركس و ماو و ئەنوەرخواجە ئێمە نەتەوەین یان نە؟ یان ئایا جەمالەدینی ئەفغانی و حەسەن بەننا و محەمەد عەبدە پێیانوایە ئەگەر ئێمە وەك دەوڵەت و نەتەوە بوونمان هەبێت و ددانمان پێدا بنێن، ئەوا ئەو زاتانە ئەمە بە جۆرێك لە خیانەتكردن لە ئامانجی گەورەی ئوممەتی ئیسلامی لە قەڵەم دەدەن، یاخود كارێكی رەوا دەكەن؟
بەداخەوە رۆشنبیران و سیاسەتمەدارانی كورد، تەمەنێكی زۆری خەباتی ئەم گەلەیان بەفیڕۆدا لە پێناوی ئەوەی رەوایی خەباتی كوردستان لەم بیردۆز و هێڵە فیكرییانەوە هەڵبهێنجن، هەر بۆیە قەت لە بیری نەخۆشی و ژانی جەستەیی گەل و خاكی كوردستاندا نەبووین و ئەوەمان لەبیركردبوو ئەگەر كەسێك تەندروستی خراپ بێت و جەستەی ئازاری هەبێت، پێویست نییە پزیشكێك پێی بڵێت تۆ نەخۆشیت، بەڵكو نەخۆشی دیارە و دەبێت چارەسەر بكرێت، بۆیە هەر لەم راستەوە ئێمەش ئەگەر هەموو تیۆر و هێڵە فیكرییەكانی جیهان بە نەتەوە بمانناسێنن، یاخود نە، ئێمە هەر نەتەوەین و خاوەنی وڵاتی خۆمانین، بە پێچەوانەشەوە هەموو پەرتووكەكانی جیهان، هەر چوار وڵاتی ئێران و عێراق و توركیا و سووریا بە داگیركار بناسن، یان نەناسن، ئەوا گومانی تێدانییە هەر چواریان داگیركارن، مەرجەكانی كۆلۆنیالیزم بە سەر تورك و فارس و عەرەب، بچەسپێت، یان نە، ئەوا ئەم سێ گەلە كۆلۆنیالیستن، سیاسەتمەدار و رۆشنبیرانی كوردستان پێیان خۆش بێت یان نە، كوردستان كۆلۆنییە و خاكێكی داگیركراوە، گەلی كوردستان لە هەر چوارپارچە ژێردەستەیە و ئیرادەی ژێرپێ خراوە و پێویستی بە ئازادی و سەربەخۆییە، ئەوجا ئەم خەباتە لە پێناوی ئازادی و سەربەخۆیی لەگەڵ ئەو فیكر و چەمكە هاوردانە یەك دەگرێتەوە، یان نە، ئەوە كێشەی كورد نییە و چیتر ناكرێت كاتی گەلی كوردستان بە دروشمی هاوردە و نامۆوە بە خەسار بدرێت.
خەباتی نەتەوەیی و ئاستەنگەكانی تابوری پێنجەم
ئەم خەباتەی نەتەوەكەمان لە پێناوی ئازادی دەیكات، لە بەرامبەریدا دوژمنانی گەلی كوردستان دەستەوەستان دانەنیشتوون، بەڵكو لە ناو هەر چوار دەوڵەتی داگیریكاری كوردستان ئەگەر ناو و ڕواڵەتیشیان جیاواز بێت، ئەوا چەندین ژوورگەلی جیاجیان بۆ پێشگرتن لەم خەباتە دامەزراندووە، هەر لە ژووری پەلاماردانی سەربازی (ئەگەر بۆیان بچێتەسەر) تا دەگاتە ژووری گەمارۆی سیاسی و ئابووری و دارایی و.. تاد، لەمەش زیاتر دامەزراندنی ژووری تایبەت بە بڵاوكردنەوەی پڕوپاگەندەی ژەهراوی و شكاندنی متمانەی گەلی كوردستان بە دامودەزگا حكوومییەكان و هەتا بەكرێگرتنی هەندێك بەناو كورد تا وەك تابوری پێنجەم كار لەسەر رووخاندنی ورەی كوردستانییان بكەن، بەم شێواز و میتۆدە هەوڵدەدەن ئاراستەی گەلی كوردستان لە ئامانجە گەورەكە، كە بەدەستهێنانی ئازادی و سەربەخۆییە وەربگێڕن بەرەو ئاراستەی كێشە بچووكە ناوخۆییەكان.
گومانی تێدا نییە كە هەرێمی كوردستان وەك هەر حكومەتێكی ئەم جیهانە كەموكورتی و گەندەڵی تێدایە، نادادپەوەری لە هەندێك بواردا دەبینرێت و لە رووی ئیداریشەوە كەموكوڕیی بەرچاومان هەیە، بەڵام داگیركارانی كوردستان لە رێگەی خۆیان و دەستوپێوەندە بەناو كوردەوە ( تابوری پێنجەم) بە زەقكردنەوەی ئەم كەموكوڕییانە، دەیانەوێت دزی و گەندەڵیی گەورە وەك دزینی خاكی نیشتمانی كوردستان لەبیر كوردستانییان ببنەوە، ئەمە لە كاتیكدا دزینی ئیرادەی گەلی كوردستان بریتییە لە گەندەڵی گەورە و داگیركردنی نیشتمانی گەلێكە و پێشێلكردنی بەها و مێژووی ئەو گەلەیە، بۆیە پێویستە ئێمەی كوردستانی زۆر وریابین و لێنەگەڕێین پرس و كێشە گەورەكە لە بیر كوردستانییان بەرنەوە و بە كێشەی بچووك و لاوەكی سەرقاڵمان بكەن. دەبێت قەناعەتی تەواومان بەوە هەبێت كە هەر چوار دەوڵەتی فارس و تورك و عێراق و سووریا لە سەر بنەمای گەندەڵی دامەزراوان، لە بەر ئەوەی ئیرادە و خاكی گەلانی دیكەیان دزیوە و داگیریان كردووە، لە هەمووشی شەرمەزاریتر ئەوەیە سەروەت و سامانی گەلی كوردستانیان دزیوە و بە پارەی ئەو سەروەت وسامانە كردوویانەتە چەك و بۆمب و لە دژی ئێمە بەكاریان هێناوە، یان بە لەسێدارەدان و ئاسیمیلاسیون و عەرەباندن، وەڵامی داواكاری ئێمەیان داوەتەوە. بۆیە لێرەوە پێویستە گەلی كوردستان ئەولەوییەتی خۆی دەستنیشان بكات، ئەولەوییەتی ئەم قۆناخەش دامەزراندنی دەوڵەتی كوردستانە، با جارێ دەوڵەتی خۆمان دابمەزرێنین، ئەوجا كەموكورتییەكانی ناوخۆ بە گرتنەبەری سیستەم و رێكاری گونجاو چارەسەر دەكەین. لە ماوەی چارەكە سەدەی رابردووی دەسەڵاتداری كوردستاندا، ئەوە سەلمێنرا كە خراپترین حكومەتی كوردستان لە باشترین داگیركار بۆ گەلی كوردستان باشتر و بەبەزەییترە.
ئێستا لە گۆڕەپانی سیاسیی كوردستاندا، بۆ چارەسەری پرسی كوردستان دوو دیدو بۆچوون و دوو بەرە هەیە، یەكەمیان بەرەی رزگایخوازی كوردستان و دووەمیان بەرەی رزگارینەخوازی كوردستان، بەرەیەك ئیدعای ئەوە دەكات كێشەی گەلی كوردستان كێشەی هاووڵاتیبوون و دیموكراسی و بوونی سێ چوار وەزیرە لە ناو حكومەتەكانی عەرەب و تورك و فارسدا! پیێانوایە كێشەی كوردستان كێشەی ئازادكردنی زمان و هەڵپەڕكێی كوردی و هەبوونی ناسنامەیە لە یەكێك لەو چوار دەوڵەتەدا!! ئەم بەرەیە پێیانوایە ئەگەر ئەنكارا و بەغدا و دیمەشق و تاران دیموكراسی بن، ئیتر كوردستان كێشەكانی چارەسەر دەبن، ئەم بەرەیە هەمیشە خۆی وەك ئۆپۆزسیۆن لەم وڵاتانە وێناكردووە، ئەركی گەلی كوردستانیان لە گۆڕینی حكومەتێكی خراپی ناوەند بە حكومەتێكی باشتر و چەسپاندنی دیموكراتی بچووك كردۆتەوە.
بەڵام بەرەیەكەی دیكە كە بەرەی رزگاریخوازییە، قەناعەتی وایە كێشەی كوردستانییان، هاووڵاتیبوون و بەدیموكراتیبوونی ئەم چوار پایتەختە نییە، هەروەها ئەم بەرەیە ئەوە رەتدەكاتەوە كە كاری كوردستانییان تەنیا ئەوە بێت حكومەتێكی داگیركاری بگۆڕێت بۆ حكومەتێكی داگیركاری دیكە و سەروەت و سامانی كوردستان بدزێت و تاڵانی بكات، ئەم بەرەیە كە ئێستا پارتی و بارزانی رێبەرایەتی دەكەن، دەڵێن كێشەی ئێمە هەموو ئەوانەی سەرەوە نییە، بەڵكو كێشەی ئێمە ناسینی خاكی كوردستان و ددان نانە بە خاوەنداریەتی گەلەكەی لەسەر خاكەكەی، كێشەی كوردستان ئەوە نییە سەرۆك كۆمار كورد بێت، یان كورد نەبێت، هەر بۆ نموونە سەرۆكی ئێستای كۆماری ئازەربایجان و سەرۆكی پێشووتری توركیا و ئێستای عێراق كوردن، بەڵام مەحروومییەتی گەلی كوردستان و كێشەكانمان هەمان كێشە و گرفتی سەدساڵی رابردوون. لە سەد ساڵی رابردوودا سەڕەرای قەدەغەكردنی زمان و چاند و كەلتووری كوردستانییان، بەڵام ئەوە زمانی كوردی هەتا ئێستاش لانیكەم لە زمانی فارسی و توركی خاوێنترە، هەڵپەڕكێ و گۆرانیی كوردی، وێڕای ئەوەی قەدەغەش كراوە، بەڵام جوانتر دەگوترێت و پیادە دەكرێت.
كێشەی سەرەكی لەوەدایە كە سیستەمی داگیركاری ئەم چوار وڵاتەی كوردستانیان بە سەردا دابەشكراوە، ئەوەیە رێگەنادەن كوردستانییان هیچ ماف و ئازادییەكی جددیی خۆیان پیادەبكەن و بەكاری بهێنن، تەنانەت ئەگەر هەموو ستافی حكومەتەكانی فارسی و توركی و عەرەبی، هەمووشیان كوردبن، ئەمەش لەبەر ئەوەی سیستمەكە داگیركارییە، دەبێت لەو داگیركارییە رزگارمان بێت و قەتیش بە ئەندازەی ئێستا ئەم ئامانجە بەو شێوەیە نزیك نەبۆتەوە.
كەواتە ئەم واقیعە پێمان دەڵێت: ئەم دووبەرەیە لە ململانێدان، ئەو بەرەی پارتی دیموكراتی كوردستانە، لە رووی هەرا و هۆسەی راگەیاندنەوە كەمینەیە، بەڵام لە رووی جەماوەری و كۆبوونەوەی هەموو پێكهاتە و نەتەوە و ئاییینە جیاوازەكان و جەماوەرییەوە، پشتیوانی زۆربەی زۆری گەلی كوردستانی هەیە و هەموو گەلی كوردستان ئامانجیان سەربەخۆییە و پشتیوانی سەربەخۆیی و هێڵی فیكری بارزانی دەكەن.
كوردستان وەك پێگەیەكی ستراتیژی
بۆ ئایندەی رۆژهەڵاتی ناوەڕاست
گومانی تێدا نییە ئێستا رۆژهەڵاتی ناوەڕاست لە سەروبەندی گۆڕانكارییەكی زۆر گەورە و خێرادایە، نەخشەی سیاسی و كۆمەڵایەتی و ئابووریی بەشێك لە وڵاتانی ئەم ناوچەیە گۆڕانكاری ریشەیی بەخۆیەوە دەبینێت. ئاشكرایە لە رووی ئابووری و سیاسی و جوگرافییەوە، رۆژهەڵاتی ناوەڕاست وەك دڵی جیهان پێناسە دەكرێت، هەر لایەن و دەوڵەتانێك بتوانن كۆنتڕۆڵی رۆژهەڵاتی ناوەڕاست بكەن، ئەوا دەتوانن هەژموونێكی گەورە بەسەر بەشێكی گەورە لەم جیهاندا بەدەست بهێنن.
لەم جوگرافیا گرنگەدا، كوردستان بە حوكمی شوێن و پێگە جوگرافییەكەی خۆی بۆتە دڵی رۆژهەڵاتی ناوەڕاست، هەر بۆیە ئەم هەموو پیلان و توانا سەربازی و ئابوورییە خراوەتەگەڕ بۆ ئەوەی كوردستان هەر بە ژێردەستەیی بمێنێتەوە، ئەم چوار وڵاتەشی كە كوردستانیان بەسەردا دابەشكراوە، گرنگی خۆیان لە بەردەوامی داگیركاری كوردستاندا دەبیننەوە، بۆیە ئەگەر كوردستان وەك قەوارەیەكی سیاسی و دەوڵەتێكی هاوچەرخ لەدایك بێت، ئەوا بایەخ و گرنگی ئەو چوار دەوڵەتەش دەپووكێتەوە.
لە ئێستادا دەرفەتێكی زۆر لەبار و زێڕین بۆ كوردستان هاتۆتەپێشەوە بۆ ئەوەی بە خەون و هیوای سەربەخۆیی بگات و كۆتایی بە گرنگییە ناڕاست و دروستكراوەكەی ئەو چوار دەوڵەتە داگیركارە بهێنێت، ئەم بەشەی باشوور كە بە زۆر بە عێراقەوە لكێنراوە، ئێستا دەوڵەتێك بە ناوی عێراق بوونی نەماوە و بە كردەیی لە بەریەك هەڵوەشاوەتەوە، سووریاش چیدیكە دەوڵەتێكی یەكگرتووی خاوەن سەروەری نییە، حكومەتی بەعسی سووریا كە بە حیساب حاكمە، وەك هەر حزب و میلیشیایەكی دیكە كە لە سووریا بوونیان هەیە، تەنیا لەسەر بەشێكی خاكی سووریا حوكمڕانی دەكات. توركیا كە پێشتر گیرۆدەی هەڵەی فاشیزم بوو، ئێستا هەم بە فاشیزم و هەمیش بە تیرۆری ناوخۆ شەتەك دراوە و هەوڵدەدات لەم شەڕەدا بە مایەی خۆیەوە لێی دەربچێت، ئێران لە لێواری تەقینەوەیەكی گەورەدایە و بە دەستێوەردان لە عێراق و یەمەن و سووریا و لوبنان و ئەفغانستان، رۆژ لە دوای رۆژ زیاتر لە مەترسی داڕمان نزیك دەبێتەوە، ئەم بارودۆخە ئەگەر بە وردی بخوێندرێتەوە، ئەوا دەگەینە ئەو راستییەی كە چیتر ئەم دەوڵەتانە ناتوانن وەك جاران ببنە مەترسی لەسەر گەل و خاكی كوردستان، لە باشترین حاڵەتدا دەتوانن لە ژێر ناو و كراسی كوردایەتی و لە رێگەی هێزە ناوخۆییەكانی كوردستانەوە گێچەڵ بە كوردستان بفرۆشن. خۆشبەختانە شەقامی سیاسیی كوردستانیش زۆر بە وریایی و وردبینییەوە سەیری هەڵوێستەكان بكەن و سەڕەرای برسێتی و شەڕی داعش، بەڵام بە تێگەیشتن لە راستی بارودۆخەكە هاوكاری و یارمەتی حكومەتی هەرێم و هێزی پێشمەرگەی كوردستانیان كردووە.
كێشە و قەیرانەكان
سەربەخۆیی كوردستانمان لەبیر ناباتەوە
بەرەی رزگارینەخوازی كە بیانوو و ئاستەنگ بۆ پرۆسەی سەربەخۆیی دروست دەكەن، ئیدعای ئەوە دەكەن لەبەر ئەوەی سوپامان یەكنەخراوە و سیستەمی ئابووریمان كەموكورتی تێدایە و كەرتی كشتوكاڵمان وەك پێویست نەبووژاوەتەوە و نەوتیش بەشی ژیان ناكات، هەروەها لەبەر ئەوەی سیستمی پەروەردە و تەندروستیمان كەموكورتی هەیە و.. تاد، ئەوا ئیتر دەبێت پرۆسەی سەربەخۆیی پەكبخەین و نابێت سەربەخۆیی رابگەیەنین، لە راستیدا ئەمانە هەموویان بیانوو هێنانەوەن بە مەبەستی ئاستەنگ درووستكردن بۆ سەربەخۆیی و بۆ ئەوەیە كوردستان نەگاتە ئامانجی خۆی. لە كاتێكدا هەموو دەوڵەتە پێشكەوتووەكانی جیهان كەم تا زۆر بەشێك لەو كێشەو گرفتانەیان هەیە، بۆیە ئەگەر بە قسەی بەرەی رزگارینەخوازی كوردستان بێت، دەبێت 100 ساڵی دیكەش چاوەڕێ بكەین هەتا ئەو كێشە و كەموكورتییانە چارەسەر دەكەین، ئەمەش لەبەر ئەوەی ئەو كێشە و گرفتانە پێویستییان بە پیلانی ستراتیژی درێژخایەن هەیە و بە شەو و رۆژێك چارەسەر ناكرێن، لە كاتێكدا ئەم بەرەیە ئەوە دەشارنەوە كە كوردستان بەم رەوشە نالەبارەی خۆشیەوە هێشتا لە زۆر رووەوە لە زۆر وڵاتی سەربەخۆی ئەم جیهانە بارودۆخی باشترە.
بە پێچەوانەی ئەوانەی ئیدعای ئەوە دەكەن كە نامانەوێت وڵاتێكی سەربەخۆی وەك سۆماڵمان هەبێت، ئێمە سەربەخۆیی كوردستان بە هیچ شتێك ناگۆڕینەوە و كوردستانیش سۆماڵ نییە و هەموو توانا و ئیمكانیەتێكی مرۆیی و سروشتی تێدایە، هەتا بە سەربەرزی و خۆشگوزەرانی لەم دەوڵەتە سەربەخۆیەدا بژین. لەم دەوڵەتە سەربەخۆیەدا تەنیا شتێك كە پێویست بێت ئەولەوییەتی پێبدرێت، ئەوەیە سیستەمێكی رێكوپێك دابنرێت و كادری دڵسۆز و هەڵیبسووڕێنێت، كە خۆشبەختانە هەردووكیان لە كوردستاندا قورس نابن. لەلایەكی دیكەوە، ئەگەر باس لە دابەشكردنی عێراق دەكەن، دیارە ئەوە ئێمە نین كە عێراق دابەش دەكەین، بەڵكو ئەوە عێراق و عێراقییەكانن كە دابەشی دەكەن. پرسیار لێرەدا ئەوەیە ئەگەر ئەم واقیعی هەڵوەشانەوەی عێراقە كە ئێستا بوونی هەیە، لە سەر ئاستی نێودەوڵەتی ددانی پێدا نرا، ئایا دەبێت ئێمە بە دوای داگیركارێكی دیكەدا بگەڕێین بۆ ئەوەی بێت و كوردستان داگیربكاتەوە، یان دەبێت جوامێرانە چاكی لێ بكەین بەلادا و ئەو دەرفەتەی هاتۆتە پێشەوە بیقۆزینەوە و جاڕی سەربەخۆیی بدەین؟
لایەنێكی دیكە كە دەیكەنە ئاستەنگ بۆ سەربەخۆیی كوردستان، پرسی كاراكردنەوەی پەرلەمانی كوردستانە، لە كاتێكدا كاراكردن و كارابوونی پەرلەمان گرێدراوە بە سەربەخۆیی كوردستانەوە، نەك راگەیاندنی سەربەخۆیی ببەسترێتەوە بە كاراكردنەوەی پەرلەمانێك كە بزووتنەوەی گۆڕان و هەندێك لایەن شكۆیان شكاند و كردیانە مەیدانێك بۆ گەمەی هەرزەكاران، پەرلەمان لەناو وڵاتێكی سەربەخۆ مانای هەیە، نەك لە وڵاتێكدا كە حكومەتی ناوەندی (بەغدا) حیساب بۆ هیچ بریارێكی ناكات، هەروەها كاتێك سۆڤیەت هەڵوەشایەوە ئەو 16 دەوڵەتەی لە دایكبوون، هیچ كامیان لە پەرلەمان و لە چوارچێوەی پرۆسەی ریفراندۆم سەربەخۆییان رانەگەیاند.
كاتێك لینین شۆڕشی ئۆكتۆبەری 1917ی راگەیاند، چاوەڕێی نەكرد هەتا هەموو دنیا دەبنە كۆمونیست، ئینجا كۆمارەكانی سۆڤیەت رابگەیەنێت، بەڵكو هەر لەگەڵ ئازادبوونی یەكەم شار، لینین دەوڵەتی شوراكانی راگەیاند، لە كوردستانیش نابێت چاوەڕێ بین هەر چوار پارچەی كوردستان پێكەوە بڕیاری سەربەخۆیی بدەن، بەڵكو لە كام پارچە دەرفەت هاتەپێشەوە دەوڵەتی سەربەخۆ رابگەیەنین، هەر كەس و لایەنێكیش رێگری لەوە بكات كە گوندێك، یان شارێكی كوردستان بێتە پاڵ كوردستانی ئازاد بەر نەعلەتی مێژوو و گەلی كوردستان دەكەوێت.
كەشف بوونی دیوی ناوەوەی
سەردانی گۆڕان و یەكێتی بۆ بەغدا
لە سەرەتادا بەو جۆرە ئەو سەردانەی 26ی حوزەیرانی 2016یان خستەڕوو، بەوەی دەچن ناوەڕۆكی رێككەوتنەكەیان بۆ لایەنە عێراقییەكان روون دەكەنەوە، بەڵام دەركەوت بۆ پیشاندانی هەڵوێستی خۆیان بووە لەسەر پرسی ریفراندۆم و سەربەخۆیی بۆ بەغدا...! بەپێی ئەو قسانەی كە لەلایەن شیرین رەزا و شوان داودی و حەنان فەتلاوی و نوری مالیكی و ئەوانی ترەوە دزەی كردووە، ئەم هەڵوێستەی ئەوان لەسەر پرسی سەربەخۆیی و ریفراندۆم بە جۆرێك شەقامی ناڕازی كردووە كە خەڵكی سلێمانی پێیانوایە، چوونی 50 ساڵ لەمەوپێشیان بۆ بەغدا لە چاو چوونی ئەمجارەیان بۆ بەغدا، ئەوا چوونی ئەمجارەیان و هەڵوێستەكەیان، هەڵوێستی 50 ساڵ لەمەو پێشی ئەوانی سپی كردۆتەوە.
بۆیە ناكرێت و نابێت ئەم دەرفەتەی بۆ سەربەخۆیی هاتۆتەپێشەوە لە دەست بدرێت، ئەوانەشی تا دوێنێ پێیانوابوو پرسی سەربەخۆیی بۆ موزایەدەی سیاسییە، داواكراون بۆ موزایەدی سیاسی بێنە مەیدانی سەربەخۆیی، بە پێچەوانەی ئەو كەس و چاودێرانەی لە چوونی ئەم شاندەی گۆڕان و یەكێتی بۆ بەغدا سەریان سوڕماوە، من ئەو كاتە سەرم سوڕدەما ئەگەر ئەم شاندەیان لە بەغداوە سەری دەرنەهێنایە، چونكە ئەمە ئەنجامی ئاسایی سیاسەتكردنیانە، بەڵام خۆشبەختانە رای گشتی كوردستان سەربەخۆیی دەوێت، نەك ژێردەستەیی، ئەوانەی لە رقی بازرانی دژی سەربەخۆیین، ئەوا ئەگەر ئەوان و تەنانەت منداڵێكی ئەم كوردستانە سەربەخۆییمان بۆ مسۆگەر بكات، ئێمە جیا لەوەی پشتیوانی دەكەین، زۆر سوپاسیشی دەكەین.