تێگەیشتن لە بێدەنگیی پارتی
رێكان سەباح
میدیا و چەواشەكاری
لە ماوەی رابردوودا هەڵمەتی هەمەجۆر و نابەرانبەر و قین لەدڵی، نەك هەر تاوانباری مووچەبڕ و بودجەبڕی كوردستان حەشار دابوو، بەڵكو تۆمەت و رق لە حكوومەت بۆ ئاستی پارتێكی سیاسی بەرتەسك كراوە، بەشێوەیەك وەك ئەوەی "مالیكی، دەوڵەتی یاسا" كە تاوانباری شكستی سوپای عێراق و هێنانی داعش و جینۆسایدی شنگال بوون، لەوێیشەوە بۆ مووچەبڕ و بودجەبڕ هەنگاویان نا، بە بارزانی و پارتی وێنا كردووە، ئاخر ئەو جۆرە لە كاڵفامی و چەواشەكارییە میدیاییە، هەر تاقەتی دەوێت تۆ لەو دونیا بەرزەفڕە سیاسییەی پارتیدا خۆت بچەمێنیەوە و جوابی ئەو جۆرە لە چەواشەكارییە بدەیەوە، بۆیە ئەوە هۆكاری بێدەنگبوونی پارتییە لەمەڕ ئەو جووڵە سیاسییە نزمە لەئاستێكدایە كە رێككەوتنی سیاسی پولێكی قه‌ڵبی تێدایە، ناوی لێناوە پشتگیریی ریفراندۆم و سەربەخۆیی، بەڵام تەواوی جوهدی راگەیاندن و رێكخستنی خستووه‌تە بەره‌ی دژایەتیی جیابوونەوەی كورد و بەكەمزانینی گەلی كوردستان، راپۆرت و هەواڵی میدیاكانی هەر شایەنی ئەوەن بیانكەیە بەڵگەی مێژوویی بۆ ئەوەی دژایەتییان بۆ دەوڵەتی كوردستان و جیابوونەوەی كورد بخەیتە بەردەستی نەوەی پاشه‌ڕۆژی كوردستان.
تا بەغدا پایتەخت بێت مووچەبڕ و ئەنفالكراوی
جۆر فێركارییەكی هاوردەی دەرەوەی سنووری كوردستان كە هەڵگری"من دەوڵەتم ناوێت مووچەم نییە"، خراوەتە ناو بازاڕی بەگێلزانینی خەڵكه‌وه، رۆژانە بەدەیان كەسی رێكخستووكراوی نەیارانی پارتی ئەو قەوانە بێ پشوودان لێ دەدەنەوە، بەڵام سحری هەڵوەشاندنەوەی ئەو بەگێلزانینە، ئەوەندە ئاسانە كە كەسێك ئەگەر بە زەڕڕە لە دەرەوەی ئایدیۆلۆژی و میدیای چەواشەكار، سەیری ئەو رووداوە بكات، كە مووچەی تێدا بڕاوە، دەبێـت ئەوە بزانێت بەغدای مووچەبڕ پایتەختی ئەو وڵاتەیە كە تۆ تێیدا بێ مووچەی، تا ئەو بەغدایە پایەختت بێت مووچەبڕ و ئەنفالكراوی، كەوایە دەبێت ئەو خەڵكەی كوردستان بزانێت مووچە لە دەوڵەتدا جێگر و بەرجەسته دەبێـت، نەك لە پایتەختی مووچەبڕ و ئەنفالكراوی كورد.
پەكەكە و رەفزكردنی دەوڵەت
بنەمای رەفزكردنی دەوڵەت ئەگەرچی لە خەونی بەكۆمەنیزمی كۆمەڵگەوە دێت كە پەكەكە ناوی لێناوی كۆمەڵگەی ئاپۆچی، بەڵام لە بنەڕەتدا پەكەكە لە چەپییشدا سەراوژوور هەنگاو دەنێت، پەكەكە پێی وایە كۆمەڵگایەی "كۆمەنیزم" بە بەچەكداربوونی كۆمەڵگا و هەر لە سەرەتاوە كاركردن بۆ دوورخستنەوەی كۆمەڵگای لە جیهانی سەرمایەداری بەرهەمدارە، رەخنەی پەكەكە لە هێزە چەپەكانی تر لەوەوە دێت، "هێزە چەپەكانی تر پێیان وایە، هەستی چینایەتی هەلومەرجی شۆڕش بۆ پرۆلیتاریا دێنێتە بوون، شۆڕش لە پاش هەلومەرجی شۆڕش دروست دەبێت، پاشان دەسەڵاتی دیكتاتۆری پرۆلیتاریا دروست دەبێت و ئینجا كۆمەڵگای (كۆمەنیزم) دروست دەبێت، كە تێیدا هەموو مڵكی تایبەت هەڵدەوەشێنێتەوە، بە خێزانیشەوە. بەڵام پەكەكە پێیوایە بەم شێوەیە ناتوانرێت كۆمەنیزم بەرهەم بێت، دەبێت هەر لە سەرەتاوە بێ شۆڕشی پرۆلیتاریا و دیكتاتۆریی پرۆلیتاریا، كۆمەڵگای كۆمەنیزمی دروست ببێت، تاك لەگەڵ هەلومەرجی كۆمەنیزم و كۆمەڵگایەتی لە هەڵوەشاندنەوەی خێزان و دەوڵەت و ئایین و نەتەوە و سەرمایەداری و دەسەڵاتداری لەناو كۆمەڵگا دەست پێ بكەین، بۆیە پەكەكە لێرە دەكەوێتە بەردەم دژایەتیی دەوڵەتی كوردی؛ چونكە دەوڵەتبوون لەگەڵ كۆمەڵگای ئاپۆچی ناكۆكیی قووڵی هەیە، بنەمای مڵكایەتیی تایبەت پێش دەخات، كەوایە پەكەكە لەو روانگایەوە ئاراستەی رێكخستنی خۆی دەكات بۆ دژایەتیی دەوڵەتی كوردستان، بەڵام ئایا ئەوە كڕۆكی دژایەتیی دەوڵەتی كوردستانە؟؟ بێگومان نەخێر. ئەگەر وابێت پێش دژایەتیی دەوڵەتی كوردستان دەبا پەكەكە هاوشان لەگەڵ ئۆپۆزسیۆنی نەیارانی بەشار ئەسەد هاوشان با بۆ هەڵوەشاندنەوەی دەوڵەتی سووریا، هەمان شێوە بۆ عێراق و ئێران و توركیایش راستە. بەڵام پەكەكە دژایەتیی ئەو دەوڵەتانە ناكات و بەڵكو دژی هەڵوەشاندنەوەی ئەو دەوڵەتانەشە بۆچی ئەوە با بۆ خوێنەر لێبگەڕێین؟
سلێمانی شامی شەریف نییە
پارتی بەهیچ شێوەیەك لەگەڵ دوو ئیدارەییدا نییە، هەموو كاتیش ئەوە ئامانجی دەبێت كە سلێمانیی خۆشەویست لە هەرێمی كوردستان جیا نەكەنەوە، بەڵام ئەوەی لە سلێمانی دەبینرێت، لە پاش رێككەوتنە سیاسییەكە، باس باسی رێككەوتنە كە بە پێناسەكردن تاكڕەوە پارتی كۆتایی دێ و دەخرێتە ڕوو، بێئەوەی كەسێك بڵێت ئەرێ كاكە خێرە ئێوە بەردەمی خۆتان نابینن؟ سلێمانی خۆ وڵاتی شامی شەریف نییە، كە تێیدا هەموو شتێكی 6 بە 6 بێت، ئەگەر خزمەتگوزاری لە سلێمانی لە پەنجا ساڵ دوای هەولێر گەیشتە 25 ساڵ، ئەوكات قسە بۆ قسەكەرەكان دەبێت لەسەر دهۆك و هەولێر قسە بكەن، ئەگەر توانرا جێگای پارتی و هێزی تر لەناو دەزگای ئەمنی و ئیداری لەو شارەدا كرایەوە، بە كامل دەسەڵات، ئەوكاتە حەقیان دەبێت باسی هەولێر و دهۆك بكەن، بەڵام قوربان ئێوە جار بەردەمی خۆتان ببینن ئینجا بڵێن ئەو نانە بەو كەبابە.
