رێككه‌وتنی یه‌كێتی و گۆڕان هه‌ر پارتی نیگه‌ران نه‌كردووه
سووره مه‌رگه‌یی
كاتێ نه‌وشیروان مسته‌فا له یه‌كێتی جیابۆوه بانگه‌شه‌ی ئه‌وه‌ی ده‌كرد كه جیابوونه‌وه‌كه‌ی خێری خه‌ڵكی تێدایه، كه‌چی ئاژاوه‌گێڕیه‌كانی 17ی شوباتی به‌رده‌ركی سه‌را و هه‌ڵكوتانه سه‌ر باره‌گا و به كوشتدانی كوڕی خه‌ڵكی لێكه‌وته‌وه، ئێستا كه له‌گه‌ڵ یه‌كێتی رێككه‌وتۆته‌وه نه‌وشیروان مسته‌فا دووباره ده‌ڵێ: رێككه‌وتنه‌كه‌مان خێری خه‌ڵكی تێدایه، واتا ئاژاوه‌گێڕیه‌كی تر و خوێن رشتنێكی تر، جا پارتی له‌وه نیگه‌رانه هه‌مان خواستی جیابوونه‌وه‌كه له پشت رێككه‌وتن و یه‌كگرتنه‌وه‌كه‌یه. میژووش ئه‌و راستیه‌مان پێده‌ڵێ: كه هه‌موو جیابوونه‌وه و رێككه‌وتنێكی نه‌وشیروان مسته‌فا ئاژاوه‌گێڕیه‌كی به‌دوای خۆیدا هێناوه، جیابوونه‌وه‌ی له یه‌كێتی ئاژاوه‌گێڕیه‌كانی 17ی شوباتی به‌رهه‌م هێنا، رێككه‌وتنی گه‌ڵ پارتیش ئاژاوه‌گێڕیه‌كانی مانگی 10ی ساڵی رابردووی لێكه‌وته‌وه، جیا بوونه‌وه‌ی له یه‌كێتی و رێككه‌وتنی له‌گه‌ڵ پارتی و لێكه‌وته‌كانی به‌ڵگه‌ی سه‌لمێنه‌ری ئه‌و راستیه‌ن، كه‌واته پارتی له قۆناغێكی هه‌ستیاری وه‌ك ئێستادا كه كوردی له دوا ئامانجه‌كانی نزیك كردۆته‌وه هه‌قیه‌تی نیگه‌ران ببێ، چونكه به‌و رێككه‌وتنه‌ش ئاشووب و ئاژاوه‌گێڕیه‌كی تر ده‌خاته سه‌ر خه‌رمانی ئاشووب و ئاژاوه‌گێڕیه‌كانی رابردووی.
نیگه‌رانیه‌كی تری پارتی له‌وه‌دایه خاڵ و به‌نده‌كانی ناو ریككه‌وتنه‌كه‌ی نێوان یه‌كیتی نیشتیمانی و بزووتنه‌وه‌كه‌ی نه‌وشیروان مسته‌فا، جوونه‌وه‌ی ئه‌و هاوهه‌ڵوێسته سیاسی و په‌رله‌مانیه‌یه كه كوده‌تاكه‌ی 23ی حوزه‌یرانی ساڵی رابرووی ناو په‌رله‌مانی لێكه‌وته‌وه، درێژه پێدانی ئه‌و هاوهه‌ڵوێستیه‌ش رێككه‌وتنه‌كه ده‌كاته به‌ربه‌ست له‌به‌رده‌م پرسی گشتپرسی و هه‌نگاوه‌كانی راگه‌یاندنی سه‌ربه‌خۆیی كوردستان، جا ئه‌گه‌ر پارتی وه‌ك حزبێكی نه‌ته‌وه‌یی كه له پێناو هێنانه‌دی ئامانجه نیشتیمانیه‌كان و دامه‌زاندنی ده‌وڵه‌تی كوردی دامه‌زرازوه، به رێكه‌وتنێكی وا نیگه‌ران نه‌بێ، ده‌پرسین به‌چی نیگه‌ران ده‌بێ؟!
هه‌ر پارتی له‌و رێككه‌وتنه نیگه‌ران نییه، له‌ناو یه‌كێتی و بزووتنه‌وه‌ی گۆڕانیش كه‌سانی دڵسۆز به‌ده‌نگ هاتوون و له‌مه‌ولاش به‌ده‌نگ دێن، كاك مه‌لا به‌ختیا و چه‌ند ئه‌ندامێكی تری مه‌كته‌بی سیاسی و سه‌ركردایه‌تی یه‌كێتی ده‌نگی نیگه‌رانیان به‌رز كردۆته‌وه، چونكه ئه‌وانیش له‌وه گه‌یشتوون كه ئه‌و رێككه‌وتنه ئامانجی كه‌سی له پشته، هه‌رچی هێرۆ ئیبراهیم ئه‌حمه‌ده ده‌یه‌وێ به‌و رێككه‌وتنه هه‌ڕه‌شه له كوتله و باڵ و نه‌یاره‌كانی خۆی بكات ناو یه‌كێتی، هه‌رچی نه‌وشیروان مسته‌فاشه ده‌یه‌وێ به‌و رێككه‌وتنه هه‌م هه‌ڕه‌شه له پارتی بكات و هه‌میش شكسته سیاسیه‌كانی خۆی پێ په‌رده‌پۆش بكات و دڵسۆز و كوردپه‌روه‌رانی ناو بزووتنه‌وه‌كه‌شی پێ بترسێنێ، به‌ڵام چۆن له رابردوودا جیابوونه‌وه و یه‌كگرتن و ئاژاوه‌گێڕیه‌كانی تریان دادی نه‌داون، ئه‌م رێككه‌وتن و یه‌كگرتنه‌وه‌یه‌ش دادیان نادا و خۆزگه‌ی باڵاده‌ست بوونیان به‌سه‌ر پارتی به گشتی و خانه‌واده‌ی شۆڕشگێڕ و كوردپه‌روه‌ری بارزانی نه‌مردا ناهێنێته‌دی.
