یه‌كێتیمان چۆن گۆڕی پارتیش ئاوا ده‌گۆڕین
سووره مه‌رگه‌یی
یه‌كێتیه‌كان ئه‌وه قسه‌ی من نییه، نه‌وشیروان مسته‌فا و گۆڕانخواز و هه‌ڵسووڕێنراوه‌كانی وا ده‌ڵێن: یه‌كێتی گه‌نده‌ڵه، دز و جه‌رده‌ن، درۆ و دریاویان هه‌یه، درۆكان به‌تاڵ ده‌كه‌ینه‌وه و دراوه‌كه‌شیان لێده‌ستێنینه‌وه، ده‌یانبه‌ینه به‌رده‌م دادگا و قووتی خه‌ڵك و سامانی گشتیان له گه‌روو دێنینه‌وه ده‌رێ، مام جه‌لال داهاتۆته‌وه و پێڵاوی ئه‌تاتورك ماچ ده‌كات، مردووه و له به‌فرگردا هه‌ڵیان گرتووه.
ئێستا كه له‌گه‌ڵ یه‌كێتی رێككه‌وتووه یان راستتر بڵێم یه‌كیان گرتۆته‌وه، نه‌وشیروان مسته‌فا ده‌ڵێ: به‌و رێككه‌تنه هاوسه‌نگی هێز له كوردستان و ناوچه‌كه ده‌گۆڕین، گۆڕانخوازانیش ئاگربه‌ستی جه‌نگی جنێوفرۆشیان راگه‌یاندووه و كورد گوته‌نی له‌گه‌ڵ گه‌نده‌ڵ و دز و جه‌رده‌كانی ناو یه‌كێتی (به زارێك ده‌خۆن و به... ده‌ڕین) به‌ڵام سه‌رم له پارتی سووڕماوه، بۆچی لێناگه‌ڕێ نه‌وشیروان مسته‌فا چۆنی یه‌كێتی گۆڕی پارتیش ئاوا بگۆڕێ، ئه‌وكات نه‌وشیروان مسته‌فا به‌و گۆڕینه‌ی ده‌توانێ هاوسه‌نگی هێز له جیهاندا بگۆڕێ.
