بۆھا و زانستێ بۆھاناسی( علم القیم ) ئێکە ژ ئەوان بابەتێن زانستێن فەلسەفێ و دەروونناسیێ گەلەک پویتەی پێددەن، بۆھایا ھەمی سەردەمەکی جھەک تایبەت لدەڤ مرۆڤایەتیێ ھەبووینە و داکۆکیا لسەر ھاتیەکرن و سەنگەکێ تایبەت یێ ھەبووی و دێ ھەبیتن. ھژمارا بۆھایێن مرۆڤایەتیێ گەلەکن و گۆتارەک ھۆسا کۆرت تێرا ئاماژە پێدان ب ھەمیا ناکەتن.ئەڤرۆکە لدەمەکی کۆ ئەم یێن د جەنگەکێ دژوار دا دگەل وێ تیروریزما وەک سەرۆک مەسعۆد بارزانی دفەرمووتن: "لپێش جیھانێڤە پێشمەرگە جەنگێ تیروریزمێ دکەتن" ، پێشمەرگەی ب ھەبوونا بۆھایەکی جوان و مرۆڤانەیێ و ھەستا بەرپرسیارەتیێ کوردستان و جیھان حێبەتی کر. ھەر چەندە ھندەک دوژمنێن دەرەکی و نەیارێن نافخۆیی ئەڤرۆکە کاردکەن بۆ ھندێ جارەک دیتر کوردستانێ بئێخنە بن ڕکێڤا ئەوان دەولەتێن زۆردار و مەژی ھشک، ئەڤرۆکە پێشمەرگێ قەھرەمان و گیان لسەردەست بزاڤێ دکەتن ب سەرپەرشتیا سەرۆک مەسعۆد بارزانی ئەڤێ خەونا دوژمنان ساخ بن ئاخ بکەتن، وئەڤە مەزنترین وزەیەکە ل ھەر وەلات و دناڤ ھەر گەل و نەتەوەیەکێ دا ناھێتە دیتن. لدەمەکی کۆ زانستێن وەکی زانستێ لەشکەری و سایکۆلۆژیایا لەشکەری ھەبوونا شیانێن شەھرەزایی و ھۆستایی و چەکەکێ باش ب ئێک ژ پێدڤیاتیێن سەرکەفتنێ د ھەر جەنگەکی دا ددەتە زانین بەلێ د ھەمان دەم دا ھەر ئەڤ زانستە گرنگییا ڕۆلێ مۆڕالا شەرکەران ژبیرناکەتن، ئەو مۆڕالا ئەڤرۆکە دناڤا پێشمەرکێ قەھرەمانێ کوردستانێ دا د بلندترین ئاستێ خوە دایە ھەروەسا بناسە و فاکتەرەکێ مەزنێ ھەمی ئەوان سەرکەفتنا بوویە یێ کۆ ئەڤی لەشکەرێ ئاشتیخواز و بەڕەڤانیکەر بسەر دوژمنێن مینا داعشێ و ژبەری ھنگێ ژی بەعسا فاشیستی و شۆڤینی و ڕژێما سەدامێ گۆر ب گۆر ب دەستخۆڤە ئیناندی. ئەڤ مۆڕالا بلند ژ کانیا وێ ھەستا پاقژ و بۆھایێ مرۆڤدۆستی و نەتەوەپەرێستی و نیشتمانپەروەری و ئاشتیخوازانە ئاڤێ ڤەدخۆتن، یا پێشمەرگەی ھەی ئەو ژی ھەستا بەرپرسیارەتیێ یە بەرامبەر تاک و کەساتیا کوردستانی و کوردستانێ بخۆ. ھەمی کەسێ ئەڤ ھەستە لدەڤ نینە. لدەمەکی کە ئەو ئەڤێ حنێرێ دکەن و لبەر سینگێ مەزنترین دوژمنێ مرۆڤایەتی و شارستانیەتێ ڕاوەستیاینە ھندەک نەحەزێن ل ئەڤێ کوردستانا پیرۆز داھۆلێ بۆ دوژمنان لێددەن و دڤەناندینە کادێ دۆژمنێن گەلێ کوردستانێ فیتیەکێ بۆ ئەوان لێدەتن داکو ئەو وەکی سەگەکێ(گۆرگەکێ) ھار بەرببنە گیانێ کوردستانێ. ئەڤ کەسێن دویر ژ بۆھایێن ڕەسەنێن کوردەواری و مرۆڤایەتی ل خوە و کوردستانێ و سەرکردایەتیا وێ ب ھێجەتن و د بنەرەتدا ئەو ب خوە یێن تووشی نەساخیێن دەروونی یێن مینا فۆبیایێ و پارانۆیایێ بووین و ھیچ دەرمانەک ئیشا ئەوان تەنا ناکەتن مەگەر تنێ ئاژاوەگێڕی و نەخۆشکرنا کوردستانێ و دل و دەروونێ ئاکنجی یێن وێ نەبیتن. ئەوان پێ نەشەرمە کا ھێشتان ڕۆندکێن دەیک و خویشک و ژنێن شەھیدێن پێشمەرگە ھشک نەبوویە و ئەوان نەشەرمە ژ ڤێ ھەستا جوان و مێرخاسییا پێشمەرگەی کە مەزنترین دیارییا کۆ خۆدایێ مەزن دایە وان و ئەو ژی گیانە گۆری ئاخا پیرۆزا کوردستانێ دکەن و ناھێلیتن شەرەف و کەرامەت و نامیسا مە کوردستانیان بکەڤیتە دەستێ نەیاران و ئەڤ مرۆڤە بدەست ھەمی کەس و دەمەکی ناکەڤن، بەلێ چ بکەین بۆ دوژمنێن دەرەکی و نافخۆیی ھەکەر چاڤێن وان ب کوردستانێ ناڕابیتن. بەلێ بکۆراھییا چاڤێن وان دوژمن و نەیاران شێرەکۆڕێن کوردستانێ و پێشمەرگێ گیانفیدا کاروانا بدەولەتبوونا کوردستانێ یا بڕێڤە چونکی مێرخاس ژ کوردستانێ خلاس نەبووینە و نەخاسمە ئەڤرۆکە سەرۆکەکێ وەکی سەرۆک بارزانی سەرپەرشتیا بەرۆکێن شەڕی دژی تیرۆرێ و تیرۆریزمێ دکەتن.
* زانینگەھا زاخۆ /فاکۆلتیا پەروەردە /پشکا دەروونناسی یا گشتی
*ئەڤ بابەتە ل رۆژناما ئەڤرۆ ژمارە (١٨٥٧) ل ڕێکەفتی (١٤/٤/٢٠١٦) ل بەرپەڕێ (١٣) ھاتیە بەلاڤکرن.