رێككه‌وتن و یه‌كگرتن و یه‌كگرتنه‌وه
سووره مه‌رگه‌یی
ئه‌گه‌ر رێككه‌وتن بێ! ئه‌وا دووره له هه‌موو بنه‌ما سیاسی و یاساییه‌كانی رێككه‌وتن، چونكه هه‌ندێ خاڵ له رێككه‌وتنه‌كه‌دا هه‌ن یه‌كتریان له كۆت و به‌ندێ كردووه، به‌ڵام گریمان رێككه‌وتن بوو، نه‌وشیروان مسته‌فا له دوای جیابوونه‌وه‌ی له یه‌كێتی ده‌یگوت: درۆ و دراویان به ده‌سته‌وه ماوه، لێره‌دا پرسیار ئه‌وه‌یه: ئایا نه‌وشیروان مسته‌فا له‌و رێككه‌وتنه‌دا له درۆ و دراوه‌كه چه‌ندی به‌ركه‌وتووه؟
ئه‌گه‌ر یه‌كگرتن بێ! ئه‌وا نه‌وشیروان مسته‌فا له دوای جیابوونه‌وه‌ی له یه‌كێتی و دامه‌زراندنی بزووتنه‌وه‌ی گۆڕان، سیاسه‌تی به دێوه‌زمه كردنی یه‌كێتی و خۆ به فریشته كردنی گرته‌به‌ر، له‌وه‌ش پرسیار ئه‌وه‌یه: ئایا دێوه‌زمه و فریشته یه‌كده‌گرن؟ بێگومان ئه‌گه‌ر حاڵه‌تێكی وا ناوازه رووبدا و دێوه‌زمه و فریشته یه‌كبگرن، ئه‌وا گوێدرێژ به په‌یژه‌دا سه‌ر ده‌كه‌وێ، ئه‌ی كه وایه به‌و یه‌كگرتنه یه‌كێتی بۆته فریشته؟ یان له بنه‌ڕه‌تدا نه‌وشیروان مسته‌فا دێوه‌زمه بووه و به فێڵ و بۆ گه‌وجاندنی خه‌ڵك دێوجامه‌ی به فریشته بوونی كردبووه سه‌ری.
ئه‌گه‌ر یه‌كگرتنه‌وه‌ش بێ! ئه‌وا كاتێ نه‌وشیروان مسته‌فا له یه‌كێتی هاته‌ده‌ر و بزووتنه‌وه‌ی گۆڕانی درووست كرد، هه‌موو ئه‌و دۆسته دێرینانه‌ی له‌گه‌ڵی نه‌چوونه ناو گۆڕان به گه‌نده‌ڵ و دز و تاڵانچی ناوی ده‌بردن و بانگه‌شه‌ی ئه‌وه‌ی ده‌كرد بیانباته به‌رده‌م دادگا، ئێستا ئه‌گه‌ر له‌گه‌ڵ یه‌كێتی یه‌كبگرێته‌وه چی گۆڕیوه و كێی داوه‌ته دادگا و وه‌ڵامی بۆ هه‌ڵسووڕاو و گۆڕانخوازان چی ده‌بێ؟!
له هه‌رسێك حاڵه‌ته‌كه‌دا ئه‌و راستییه‌مان ده‌ستكه‌وت كه نه‌وشیروان مسته‌فا له كوێ ده‌ستی پێكرد، له هه‌مان شوێن سه‌ری هێنایه‌وه‌ده‌ر، بۆیه ده‌توانین بڵێین: هاتوهاواری جیابوونه‌وه‌و چاكسازی و گۆڕانكاری، دووباره هه‌راوزه‌نای رێككه‌وتن و یه‌كگرتن و یه‌كگرته‌نه‌وه، لای نه‌وشیروان مسته‌فا یه‌ك مانا و یه‌ك واتای هه‌یه، ئه‌ویش دژایه‌تی كردنی پارتی و تۆڵه كردنه‌وه‌ی ئه‌و شكستگه‌له‌یه كه له‌سه‌ر ده‌ستی ئه‌و حزبه به‌سه‌ری هاتوون، به‌ڵام پێویسته په‌ند له مێژووی شكسته‌كانی وه‌ربگرێ و ئه‌و راستییه باش بزرانێ، كه هاتوهاواره‌كه چه‌ندی له خۆزگه‌كه‌ی هێنایه‌دی، هه‌راوزه‌ناكه‌ش هه‌ر ئه‌وه‌نده‌ی له‌و خۆزگه نه‌گریسه‌ی نزیك ده‌كاته‌وه.
سوێنه: ئه‌و ده‌فره له گڵ درووست كراوه‌یه كه له كۆندا (كه‌شك)یان تێدا ده‌سوونه‌وه
