ئیرۆ گەلەک بۆچون لسەر ھەبوونا دەولەتا کوردستانێ تێنە دان و ھەر کەسەک ژلایێ خۆڤە بۆچونا خۆ دبێژیتن و دەربرینێ دکەتن لێ مخابن تانۆکە ژی تاکەکەس ل کوردستانێ ھەیە بێ ی کو ژلایێ زانستی ڤە گرنگیا دەولەتا کوردستانی بزانیتن دەستپێشخەریا دەولەتا کوردستانی ناکەتن ژبەر مەرەمێن خو یێن تاکەکەسی و تایبەت ھندەک سیاسی و پارتین سیاسیێن کوردی ژبەر مەرەمێن خو یێن تایبەت و لبن فشارا دەولەتێن دەوروبەرن ئەوێن کۆ دژی ڕاگەھاندنا دەولەتا کوردستانێ نە , ژبەر ڤێ چەندێ مە دڤێتن لخوارێ ئاماژە ب گرنگیا ھەبوونا دەولەتا کوردستانێ بدەین ژلایێ دەروونی ڤە و کارتیکرنا ڤی لایەنی لسەر لایەنێن دیتر یێن ژیانێ:
سایکۆلۆژیا دەولەتا کوردستانێ: سایکۆلۆژی( دەروونناسی) زانستەکە گرنگیێ ددەتن ب ڤەکولینا کریارێن مێشکی و رەفتارێن مروڤی و ھەمی زیندەوەران. و دەولەت ئانکو مافێ سروشتی یێ ھەر مللەتەکێ یە ھەست ب ناسناما خۆ بکەتن لێ یا گرنگ دڤێرێدا مە دڤێتن ئاماژە پێ بدەین ئەوە کۆ پەیوەندیا دناڤبەرا ھەبوونا دەولەتا کوردستانێ و زانستێن دەروونناسی دایە, کۆ فاکتەرەک گرنگ و ھەستیار ڤان ھەردوو چەمکان پێکڤە گرێددەتن ئەوژی ئاسایشا سایکۆلۆژی( دەروونی) یە کۆ تێتە ھەژمارتن ب ئێک ژ پێداویستیێن مرۆڤی یێن ھەرە گرنگ و سەرەکی و فەرە ئەڤ پێداویستیا ئاسایشا سایکۆلۆژی بێتە تێرکرن داکۆ تاکەکەسێ کوردستانی ھەست ب ئارامیا خۆ یا دەروونی بکەتن بێ ی ھەبوونا مەترسیێن تیرورستی و دۆژمنکاری و ھەروەسا تا بشێتن بڕێکا تێرکرنا ئەڤێ پێداویستیا سایکۆلۆژی پێداویستیێن دیتر یێن ژیانێ وەکی داھینان و ریزگرتنا خویەتی و جڤاکی تیربکەتن ژبەر ڤێ چەندێ دەستڤەئینانا ئاسایشا سایکۆلۆژی گرێدایە ب ھەبوونا دەولەتا کوردستانێ ڤە. و یا دیارە کۆ نۆکە کوردستان یا د مەزنترین جەنگدا دژی تیروریستێن داعش لێ ب ھەبوونا دەولەتا کوردستانێ ئەڤ مەترسیە نامینیتن چونکی کوردستان دێ ب فەرمی بیتن ئەندام د یاسا و رێکخراوێن نیڤ دەولەتی دا بۆ دیرکەتن ژ ھەر مەترسیەکا تیروریستی لسەر کوردستانێ. و ھەروەسا ژلایەکێ دیتر ڤە بازرگانی تێتە ناڤکرن ب چەکێ چەرخێ نوی لەوما ب ھەبوونا دەولەتا کوردستانێ دێ ژ قەیرانێن دارایی دیرکەڤین ژ ئەنجامێ کۆ دێ ب فەرمی بینە ئەندام د ڕێکخراوێن بانکێن نیڤ دەولەتی دا و ھەروەسا ب ھەبوونا ئاسایشا سایکۆلۆژی ل کوردستانێ دێ ھەبوونا کۆمپانیێن بیانی زێدە کەتن و دێ دەرفەتا کاری بۆ تاکێ کوردستانی زیدە بیتن, ژبەر ڤێ چەندێ ھیڤیا مە ئەوە تاکێ کوردستانی د ھشیاربوونا دەروونی دا بیتن و پشتەڤان بیتن بۆ دەستپێشخەریا دەولەتا کوردستانێ.
*نزار عصمت علی: مامۆستایێ ھاریکار/ زانینگەھا زاخۆ/ پشکا دەروونناسیا گشتی/ تایبەتمەندێ دەروونناسیا گشتی( کلینیکی)*