ئەم ساڵیش گەلی كوردی موسڵمان هاوكات لەگەڵ میللەتانی دیكەی موسڵمان لە جیهاندا پێشوازیی لە مانگی پیرۆزی رەمەزان دەكات، بە دڵنیاییەوە مانگی رەمەزان و بەڕۆژووبوون لەنێو گەلی كورددا هەرلەدێرین زەمانەوە بایەخێكی تایبەت و تەواوی خۆی هەبووە ، میللەتی موسڵمانی كوردستان لە خۆشی و ناخۆشیداو لە ئاوارەیی و دەربەدەری و لە هەبوونی و نەبوونیدا هەوڵیان داوە بەوپەڕی حورمەتەوە رێز لە مانگی پیرۆزی رەمەزان بگرن، ئەوەش بەڵگەی ئەو راستییەیە كە گەلی كورد بە خۆشەویستیەوە ئاینی پیرۆزی ئیسلامی وەرگرتووە و پەیڕەوی دەكات، لە راستیدا هیچ شتێك نەبۆتە رێگر لەبەردەم ئەوەی كە گەلی كورد پابەند نەبێت بە ئایینەكەی خۆیەوە یان ئەركە ئاینییەكانی خۆی جێبەجێ نەكات، بەڕۆژووبوونی نەتەوەی كورد لەگەڵ نەتەوەكانی دیكە جیاوازە، ئەو مانگە لەنێو كۆمەڵگەی كوردی وەك كەرنەڤاڵێكی خۆشییە و خەڵك زیاتر لەیەكدی نزیك دەبنەوە و هاموشۆی یەكدی دەكەن و برایەتی و تەبایی لەنێو خەڵكدا دێتە ئاراوە، لەم مانگەدا ئاشتیی كۆمەڵایەتی زیاتر بایەخی پێ دەدرێت و بەهێزتر دەبێت چونكە ئەگەر بە درێژایی 11 مانگی رابردوو ئەو ئاشتییە كۆمەڵایەتییە كەموكورتی تێكەوتبێت یان هاووڵاتیان هەستیان بە كەلێنێك كردبێت، ئەوا هاتنی ئەو مانگە پیرۆزە بە دەرفەتێك دەزانن بۆ ئەوەی پەیوەندیی كۆمەڵایەتی بەهێزتربكەن دەوڵەمەندەكانیش زیاتر هەوڵ دەدەن هاوكاری و یارمەتی هەژاران بدەن و ئاوڕیان لێ بدەنەوە، لەم دوو ساڵەی رابردوودا قەیرانێكی ئابووریی رووی لە هەرێمی كوردستان كردبوو بەڵام كاریگەریی نەبووە لەسەر تەبایی و خۆشەویستی و ئاوڕدانەوە لە نێوان پێكهاتەكانی كۆمەڵگەی كوردەواریدا، ئەوەی مایەی دڵخۆشی بوو لە رەمەزانەكانی رابردوودا ئەو خەڵكە موسڵمانە لە مزگەوتەكاندا هەموویان بە كۆمەڵ دووعایان بۆ برا پێشمەرگەكان دەكرد، ئەمە خۆی لەخۆیدا یەكێكە لە سیما هەرە جوانەكانی ئەو دوو ساڵەی رابردوو لە مانگی رەمەزاندا، دڵنیام ئەم ساڵیش هەر لە رەمەزاندا موسڵمانان داوا لە خوای گەورە دەكەن پێشمەرگە سەركەوتوو بێت و دوعای چاكبوونەوەی بە پەلە بۆ ئەو برا پێشمەرگانەش دەكەن كە بەهۆی شەڕی داسەپاوی تیرۆریستانی داعشەوە بریندار بوونە. خاڵێكی دیكە كە دەمەوێ لێرەدا جەختی لێ بكەمەوە ئەوەیە كە رۆژانە برا پێشمەرگەكانمان پرسیار رووبەڕووی مامۆستا ئاینییەكان دەكەنەوە لەبارەی ئەو ئەركە ئاینییەوە كە دەیانەوێت شان بەشانی ئەو ئەركە نەتەوەییەی كە پێیان سپێردراوە ئەنجامی بدەن، كە پرسیارەكەشیان پەیوەستە بەچۆنیەتی بەجێگەیاندنی نوێژەكانیان یان رۆژووەكانیان، من بە قەناعەتەوە دەڵێم پێشمەرگەی كورد لەگەڵ ئەو ئیمانە بەهێزەی كە بە خوای پەروەردگار هەیەتی، هەوڵدەدات لەگەڵ بەرگریكردن لە خاكی پیرۆزی كوردستان بەجوانترین شێوەش ئەركە ئاینییەكەی خۆی بەجێ بگەیەنێت، لە ساڵانی رابردووشدا ئەوەمان لەیادە كە برا پێشمەرگەكانمان بە تەلەفۆن پەیوەندییان بە مامۆستایانی ئاینییەوە دەكرد، یان لەو كاتەی كە مامۆستایانی ئاینی لە مانگی رەمەزاندا سەردانی بەرەكانی جەنگیان دەكرد، ئەوەش گەواهیدەری ئەوەیە كە هێزی پێشمەرگەی كوردستان بە بڕوایەكی نەتەوەیی و ئاینیشەوە بەرگری لە خاكی پیرۆزی كوردستان دەكات، چەندین پێشمەرگەمان بینی لە پێشەوەی سەنگەری بەرگری دژ بە تیرۆریستانی داعش نانی بەربانگی بۆ خۆی ئامادەدەكرد، هەرچەندە لیژنەی فەتوای كوردستان فەتوای ئەوەی داوە بۆ ئەو پێشمەرگانەی لە پێشەوەی سەنگەری بەرگریدان دەتوانن بەڕۆژوو نەبن، بەڵام هەندێكیان هەوڵی ئەوەیان دەدا كە هەر ئەركە ئاینییەكانی خۆیان بەجێ بگەیەنن، ئەمە واقیعێكە دەیسەلمێنێت كە پێشتریش برا پێشمەرگەكانمان لەژێر رەحمەتی تۆپ و فڕۆكەكانی دوژمن لە سەردەمی شۆڕشی مەزنی ئەیلول و شۆڕشی گوڵانی پێشكەوتنخوازدا هەوڵیان دەدا ئەو ئەركە بە باشترین شێوە جێبەجێ بكەن، ئەمڕۆش برا پێشمەرگەكانمان دەیسەلمێنن كە بەرگری كردن لە خاكی كوردستان رێگر نییە لە جێبەجێكردنی ئەركە ئاینییەكان پێچەوانەكەشی هەر راستە، بۆیە دەتوانم بڵێم ئەركی ئاینی و ئەركی نەتەوەیی هەردووكیان تەواوكەری یەكترن، لە ئێستاشدا پێشمەرگەی كوردستان كە بە دەستێكی ئاڵای كوردستانی هەڵگرتووەو بە دەستەكەی دیكەشی دەیەوێت بەرگری لە ئاینەكەی خۆی بكات چونكە تیرۆریستانی داعش هەوڵیان داوە بە توندترین و خراپترین شێوە زیان بە ئاینی ئیسلام بگەیەنن وئەم ئایینە پاكە لەكەدارو ناشیرین بكەن، بەڵام ئەوەی پێشمەرگە دەیكات جوانكردنی ئاینی پیرۆزی ئیسلامەو سەلماندنی ئەو ئاینە راستەقینەیە كە پێغەمبەری خوا بۆ ئێمەی موسڵمانی هێناوە.
هیوام وایە لەم مانگە پیرۆزەدا هەموومان هەوڵ بدەین گیانی تەبایی و یەكدی قبووڵكردن و یەكڕیزیی لە نێوانماندا پتەوتربكەین بۆ ئەوەی بە شێوەیەكی پراكتیكی و واقیعی بیسەلمێنین كە ئێمە هەم ئەركە ئاینییەكان جێبەجێ دەكەین و هەمیش ئەركە نەتەوەییەكانیش فەرامۆش ناكەین، بە تایبەتیش لە رۆژگاری ئەمڕۆماندا كە ئێمە هەنگاودەنێین بەرەو سەربەخۆیی كوردستان و سەركردایەتی سیاسیی كورد بیر لەوە دەكاتەوە كە خۆمان مافی چارەنووسیی خۆمان پیادەبكەین، بۆیە دڵنیام لەوەی كە مامۆستایانی ئاینی و نوێژخوێنان و رۆژووگران دوعا بۆ سەربەخۆیی كوردستان دەكەن، كە ئەم رەمەزانە دوایین رەمەزان بێت كە لە عێراقدا بمێنینەوە، بەڵكو رەمەزانی داهاتوو لە وڵاتێكی سەربەخۆ ئەو ئەركە ئاینییەش بەشێوەیەكی تەواو جێبەجێ بكەین.
لێرەدا دەمەوێ ئاماژە بە خاڵێكی دیكە بكەم ئەو بەڕێزانەی كە بەڕۆژوو نابن لەبەر هەر هۆكارێك یان ئەو برا مەسیحییانەی كە لەگەڵ ئێمەدا دەژین دەبێ هەڵوەستەیەكیان لەسەر بكەین ساڵانە هەست دەكەین رێز لە بەڕۆژووەكانی موسڵمانان دەگرن ئەوەش بەڵگەی ئەوەیە كە پێكەوە ژیانی ئاینی لە ئاستێكی زۆر باشدایە لە هەرێمی كوردستان، كە پێكهاتە ئاینییەكان لەكاتی راپەڕاندنی ئەركە ئاینییەكاندا هەوڵدەدەن كە بێ رێزیی بەرامبەر نەكەن، بۆ نموونە بینیمان ساڵی رابردوو برا مەسیحییەكان كە خوانی رۆژووشكاندنیان بۆ برا موسڵمانەكان ئەنجام دەدا، ئەوە لێكنزیكیی ئەو پێكهاتە ئایینییانە دەسەلمێنێت كە لە كوردستاندا هەیە، چونكە ئەو پێكهاتە جیاوازییە ئاینییانە بە قەدەری خوا لەسەر ئەم خاكەی كوردستان دەژین، بۆیە پێویستە رێز لە یەكدی بگرین، هەر پێكهاتەیەكی ئاینی بە ئازادییەوە مومارەسەری سرووتە ئاینییەكانی خۆیان بكەن، نابێ ئەوەشمان لەبیربچێت كە هەرێمی كوردستان بە گشتی و شاری هەولێریش بە تایبەتی لە هەموو شارەكانی دیكە زیاتر بە رووی جیهانی ئيسلاميدا كراوەیە كە زیاتر لە 37 قونوسڵخانە و نوێنەرایەتیی وڵاتانی عەرەبی و ئیسلامی و دەوڵەتانی دیكەی جیهانی لێیە، رۆژانە خەڵكێكی زۆریش لە دەرەوە سەردانی هەرێمی كوردستان دەكات، بۆیە چەند دیمەنی جوانی مانگی رەمەزان لە زیندووكردنەوەی شەوانی رەمەزان بە تەبایی و برایەتی و هێمنی بەسەرببەین، ئەوە گەورەترین وەڵامە بۆ دوژمنان و ناحەزانی كورد كە رۆژانە لێرەو لەوێ هەوڵدەدەن گیروگرفتمان بۆ دروست بكەن، گرنگ ئەوەیە ئێمە ئەو ئەركانەی مانگی رەمەزان چ بەرۆژ یان بە شەو بێت بۆ بەدەستهێنانی رەزامەندیی خوای گەورەو بۆ بەدیهێنانی برایەتی و تەبایی نێوانمان بەدی بێنین، لە هەمان كاتیشدا رۆڵی دیارو بەرچاوی دەزگا ئەمنییەكانیش لەیاد نەكەین كە ئەوانیش بە شەونخونییەكی تەواوەوەو بەدرێژایی مانگی رەمەزان پارێزگاریمان لێ دەكەن تا سرووت و ئەركە ئاینییەكانمان لەو مانگەدا چ ئەنجامدانی تەراویح یان لەیلەتولقەدر بێت بەشێوەیەكی ئازادو لەژێر چەتری ئەمن و ئاسایش ئەنجام بدەین، هیواخوازم هەموومان پێكەوە بە برایەتی و تەبایی بتوانین ئەو ئەركە ئاینییە جێبەجێ بكەین و هەوڵ بدەین نموونەی پێكەوەژیان و یەكدی قبوڵكردن بەجێ بگەیەنین.
* سەرۆكی یەكێتیی زانایانی ئاینی ئیسلامیی كوردستان

--------------------------------------------------------------
سپۆت
ئەمڕۆ برا پێشمەرگەكانمان دەیسەلمێنن كە بەرگری كردن لە خاكی كوردستان رێگر نییە لە جێبەجێكردنی ئەركە ئاینییەكان پێچەوانەكەشی هەر راستە، بۆیە دەتوانم بڵێم ئەركی ئاینی و ئەركی نەتەوەیی هەردووكیان تەواوكەری یەكترن

رەمەزان لەنێو كۆمەڵگەی كوردی وەك كەرنەڤاڵێكی خۆشییە و خەڵك زیاتر لەیەكدی نزیك دەبنەوە و هاموشۆی یەكدی دەكەن و برایەتی و تەبایی لەنێو خەڵكدا دێتە ئاراوە، لەم مانگەدا ئاشتیی كۆمەڵایەتی زیاتر بایەخی پێ دەدرێت و بەهێزتر دەبێت

دڵنیام لەوەی كە مامۆستایانی ئاینی و نوێژخوێنان و رۆژووگران دوعا بۆ سەربەخۆیی كوردستان دەكەن، كە ئەم رەمەزانە دوایین رەمەزان بێت كە لە عێراقدا بمێنینەوە، بەڵكو رەمەزانی داهاتوو لە وڵاتێكی سەربەخۆ ئەو ئەركە ئاینییەش بەشێوەیەكی تەواو جێبەجێ بكەین.

نابێ رۆڵی دیارو بەرچاوی دەزگا ئەمنییەكانیش لەیاد بكەین كە بە شەونخونییەكی تەواوەوەو بەدرێژایی ئەم مانگە پارێزگاریمان لێ دەكەن تا سرووت و ئەركە ئاینییەكانمان لەو مانگەدا بەشێوەیەكی ئازادو لەژێر چەتری ئەمن و ئاسایش ئەنجام بدەین