بدرێژاهییا هزاران سالان كورد لبن پۆستال و زەبر و زەنگ و زۆرداریێ ب پێشكەشكرنا هزاران قۆربانییان، ئەڤرۆكە یا گەهشتیە ئاستەك ژ گەشەكرنا سیاسەتێ كە یا شیای ب ڤێ سیاسەتێ و نەخاسمە ئەو حۆنێرا سەرۆك مەسعۆد بارزانی و هەروەسا مێرخاسێن پێشمەرگە دگێڕن، ب دەهان وەلاتان بگەهیننە ( قەناعەتەكێ) كە دان ب هەبوون و سیاسەت و مێرخاسی و مرۆڤدۆشتی و ئاشتیخوازی و مەزلۆمیەت و هەژیبوونا ڤی نەتەوەی بدەتن. ئەوا لڤێرێ جهێ داخێیە خۆدێ تاكێ كوردە و هەمی جاران ئەڤ ترسە خۆ ل دلێ تاكێ كوردی ددەتن نەوەك جارەك دیتر ئەم تووشی خەلەتیا باب و كالێن خۆ ببین و جارەك دیتر كریارەكێ بكەین و ڕەفتارەكێ ئەنجام بدەین و خۆ د دیرۆكێدا شەهمزار بكەین و ببینە ئەگەر ئەڤ دەستكەفتا ئەڤرۆكە جارەك دیتر ژ دەست بچیتن. ئەڤ ترسە لنك تاكێ كوردی یا بوویە فۆبیایەك و وەك تارماییەكێ و سیبەرەكا ڕەش گاڤ بۆ گاڤێ خۆ لبەر چاڤێن مە دكەتە ڕەشەك و بیرا تاكێ كورد ل هەمی ڕۆژ و سال و هەیڤێن تەحل و دژوار دئینیتن. تشت و لایەنێن كۆ ژ هەمیا پترتر ڤێ ترسێ لنك تاكێ كوردی زیندی دكەن ئەو پارت و لایەن و كەساتینە ئەوێن لبن كارتێكرنا هەستا لاوازا نەتەواتی و بەرژەوەندیێن تەسكێن كەساتی و دلڕەقی و زكڕەشییا خۆ ڕابووین و پشتا خۆ دایە گەلێ خۆ و بینە پشتەك بۆ دوژمنان و دەم بۆ دەم وەكی " گۆرگی و گیسكێ هەیاسی" خۆ نیشانی مە ددەن و ناهێلن نانەك خۆش د گەوریا مە دا بچیتە خوارێ و دلێ دوژمنان هندا دیتر شاد بكەن. هەرچەندە كە ئەم بیرا وان دئینین هندی مالا بارزان ساخ بن ناهێلن ئەڤ خەونا وان نەحەز و نەیاران بهێتە دی، و هەروەسا ژی هەتا هێزا پۆلاینا تاكێ كوردی و پێشمەرگێ قەهرەمان هەیە گەلەك مەزنترە ژ وان كەسان لێ دیسانێ وەكی مەزن دبێژن " ژ وی بترسە یێ ژ خۆدێ نەترسیتن". بەلێ سەرباری هەمی ڤێ ترسێ ژی ئەڤ هۆزانا خوارێ خەون و ویست و داخوازی و هیوا و ئۆمێد و باوەر و سۆزا هەر تاكەكێ كوردێ ب شەرەفە ل كوردستانێ، یێ كۆ خۆ بەرامبەر دیرۆكێ و مرۆڤایەتی و كوردستانیان و ئاییندەی ب بەرپرس دزانیتن و سۆزێ ددەتن ب مان و نەمانێ ژی بیتن لسەر ڤێ سۆزی بمینیتن و بمریتن:
د پەیڤــم بۆ تــە ئــەی كــوردستان
ئەی جهێ مێرخاس و عەگید و شێران
ئــەز نینم نــۆكــە و تــو هــەر یا هەی
نزانم ژی كا ئەز مایمە یان ژی نەمایمە لبیران
****
لێ ئەوا ئەز دزانم تویی یا د مینی د هزران
چونكی تویی لاندكا دەیك و زارۆك و پیران
لــێ هـەكـەر ئـەڤـرۆكە ئەز نەساخم و نینم
كار ل هەبوونا تەناكەتن، یێن هەین ب هزاران
****
ئەوێن ژپێخەمەت پاراستنا تە ژ دل و جان
خـۆ فـیدا دكـەن و ژتـەڕا دكـەنـە قۆربان
ژبـەركۆ تویی هـەمـی تشت و خـواسـت
لەوما ژتەڕا بوونە قۆربان ب سەدان و هزاران
****
هـەكـەر تـوو نەبـی چ مفایە ژ من ڕا مان
سینگێ خۆ ددەمە بەر گۆللە و فیشەك و تۆپان
دزانـم هـەكـەر ئـەز هەبـم ژی لـێ نـینـە
بێی ئاخا پیرۆزا تە دار و بەرێن تە هیچ ڕامان
****
ئاخا دیاكۆ و هووەخشتەری و گەلەك پاشایان
لسەردەمێ گۆتی و میتانی و میدی و كاسیان
ئـۆرارتـۆ و ئـیلامـی و ئـەشكانـی و ساسانیا
وەلات و نیشتمانێ بهەڤڕاگەهشتنا كوردستانیان
****
جارەك دن پەیمانێ نوی دكەم بهەمی دل و ڤیان
پشتی نەبوونا تە من نەڤێتن هیچ مان و چ ژیان
ئاوازێ دخوینم لسەر بەر و دار و چیایێن تە
هنگی ددەتن گیان و مان و ژیانا من دەنگ و ڕامان
****
پشتی سـەدان هـزار سال و هـەیڤ و ڕۆژان
هەر توویی دێ مینی لبـیرێ و مینی لبەر دلان
توویی دێ مینی و بێژی نەیار و دوژمن و دۆستا
خۆڕاگرە و مێرخاسە ل دەشت و چیایان و سەرملان
****
كـوردە ئـاگـرە و بەرە و ژ ئاسنیە و ژ بەران
دێ مینیتن و خۆگریتن لبەر نەیار و دوژمنان
دیــرۆكــێ ئـەڤ ڕاستیـە یــا سـەلـمانـدی
كورد یێ مای ل ڤی وەلاتێ یێ دبێژنێ كوردستان
*مامۆستایێ ئەكادیمی/بسپۆرێ زانستێن پێداگۆگی و سایكۆلۆژی/زانینگەها زاخۆ
زاخۆ
15/1/2016