د سایكۆلۆژیایا شرۆڤەكارییا فرۆیدی دا تێگەهەك یێ هەی و گەلەك جاران دووبارە دبیتن و بریتیە ژ لكاندن( اسقاگ یان projection) كە وەك پێناسە بریتیە ژ هندێ كە كەسەك سالۆخەتێن نەرینی و خرابێن خۆ بدەتە بال كەس یان كەسان و لایەنێن دیتر، و بەردەوام وان ب هەلگرێن ڤان سالۆخەتێن نەرینی و خراب ددەتە نیاسین. شرۆڤەكرنا سایكۆلۆژی یا ڤێ چەندێ بڤی رەنگی یە كە هەبوونا ڤان هزر و بیروباوەر و سالۆخەتێن نەرینی لنك ڤی تاكی هەستەكا نەخۆش و گۆنەهباریێ و نیگەرانی و شەپرزەیێ دروست دكەتن لەوما بۆ قۆرتالبوون ژێ هەستا گۆنەهباریێ و نەخۆش تاك بزاڤێ دكەتن برەنگەكی خۆ ژ وان قۆرتال بكەتن كە ئێك ژ وان ڕێكان لكاندنا وان سالۆخەت و هزر و بیروباوەرانە ب كەس یان كەسانێن دیتر. لسەر ئاستێ جڤاكی دبینین كەسەكێ ساختەكار خەلكا دیتر تۆمەتبار دكەتن كە ساختەكار و دزن، لدەمەكی كە ئەو بخۆ وی كاری دكەتن.
لسەر ئاستێ ڕێكخراوەیی دێ بینی ڕێكخراوەك تیرۆریستی بەردەوام خەلك و لایەن و وەلاتێن دیتر ب زۆرداری و نەیەكسانی و نەدادپەوەریێ و دەركەفتن ژ سنوورێ یاسا و پرەنسیپێن ئایینی و شەریعەتی تۆمەتبار دكەتن، لدەمەكی كە دهێتە تێبینیكرن و دیتن پترترین ڤان سالۆخەتێن نەرینی و خراب وەسا ب قایمی و زەحفی لنك ڤان ڕێكخراوێن تیرۆریستی هەین كە یێن بووینە پشكەك ژ ناسنامە و پێكهاتەیا ستراكتوورێ كەساتیا وان، و بێی ڤان سالۆخەتێن نەشرین و پیس ڤان ڕێكخراوا هیچ بوون و ناسنامەیەك و بزاڤ و چالاكییەك دیتر نینە. هەبوونا ڤێ میكانیزما بەرگرییا دەروونی لنك تاكی و لایەنەكی ئاماژەیەكا ئاشكرایە بۆ مەترسیداربوون و لاوازییا وەرارا رەوشتی و ویژدانی و جڤاكی و سایكۆلۆژیا وی كەسێ گەلەك پەنایێ بۆ ڤێ میكانیزما فرت و فێلا دەروونی دبەتن.
• ئەڤ بابەتە یا ل رۆژناما ( وار ) هاتیە بەلاڤكرن ل ژمارە (1415 ) ڕێكەفتی (21/9 /2015) ل(6).