بدیتنا سایكۆلۆژیایا فرۆیدی هەر كەسەك گەلەك جاران نەچار بیتن و مفای ژ هندەك میكانیزمێن فرت و فیل یان بەرگرییا دەروونی وەربگریتن تشتەك نەئاساییە و ئاماژەیەكە بۆ هەبوونا ئێش و ئازار و تێكچۆنەكا سایكۆلۆژیك. جێگۆڕكی ئێكە ژ وان شێوازێن هندەك كەس پەنایێ بۆ دبەن، كە تێدا كەسەك بشێوەیەكێ نەستی(لاشعوری) نەچار بیتن ئارمانجەكێ یان تشتەكێ خۆشتی لنك خۆ، یێ كۆ د هەمان دەمدا هیچ ئۆمیدەك بۆ بدەستڤەئینانا وێ نینە، دگەل تشتەك یان ئارمانجەك دیتر بگۆهۆڕیتن. چ پێ نەڤێتن ئەڤ دوو تشتە و ئارمانجە د هندەك خالێن هەڤپشك دا وەكی ئێكن و لێك نێزیكن. لێ ئەگەرێ وێ كۆ ئەو پەنایێ بۆ ڤێ میكانیزمێ دبەتن بۆ هندێ دزڤڕیتن كە هندەك ئاستەنگ ناهێلن ئارمانجا ئێكەم بدەستڤە بهێتن، لەوما ئەڤ كەسە پەنایێ بۆ بگۆهۆڕێ ( بەدیلێ ) دیتر دبەتن و بڤی رەنگی ئەڤ میكانیزمە جێبەجێ دبیتن.
هاوشێوەی ڤێ فرت و فێلا دەروونی د سیستەمێ هزری و بۆهایێ تیرۆریزمێ دا دهێتە دیتن كۆ لدەمەكی كە د هزرا خۆ دا مەزن تەماشەی رەفتارا خۆ یا سیاسی دكەتن و ئارمانجەك مەزن تێدایە كە ئەو ژی خیلافەتا ئیسلامی لسەرتانسەری جیهانێیە، لێ ژبەر ئاستەنگێن جۆداجۆدا هزرا خۆ یا دایە سەر خیلافەتەكا بچویكتر و ل دەڤەرەكا بچویكتر یا جۆگرافی دا، و ل هەمان دەم كۆ ئەو بۆ ڤێ خیلافەتا مەزن ئاستەنگان دبینن بەلێ ژبیرا خۆ دبەن كە رەفتارێن وان یێن دڕندانە دژی جڤاك و نەتەوەیێن جۆداجۆدا دێ مەزنترین بەربەست و ئاستەنگ بیتن د ڤێ ڕێكێ دا. چ گۆمان تێدا نینە ڤێ ئارمانجا بچویك هندەك خۆشیا دایە دل و دەروونێ تیرۆریزمێ، لێ " خیارە ژ تویتكی دیارە" كۆ ئەڤ ئارمانجە ژ بەرئەگەرێن سەری سەرناگریتن و ئەڤ میكانیزما بەرگرییا سایكۆلۆژی لنك تیرۆریزمێ ئەنجاما وێ تنێ شكەستنە.
• ئەڤبابەتە یا ل ڕۆژناما (وار ) هاتیە بەلاڤكرن ژمارە (1416 ) ل ڕێكەفتی (22/9 /2015) ل. ( 6 ).