هەكەر مرۆڤایەتی د سەردەمانەكی دا جڤاكەك كشتوكالی و لسەر بنەمایێ نێچیرێ دژیا، لسەردەمێ ئەڤرۆكەدا یێ د قۆناغەكا دیرۆكیدا دژیتن كە ناڤێ وێ جیهانیبوونە. زانست وەكی كەلەكێن بەری یێن ڕەزەكی رۆژ ل پەی رۆژێ یێ بلندتر لێدهێتن و ئەڤ چەندە لەزگینیێ دخوازیتن د فێربوون و زانینیێ دا. هەكەر لسەردەمێن كەڤن كار و پیشە كێم و سنوورداربوون، لێ بجیهانیبوونێ هزاران پیشە و كارێن دەرئێخستین كە نە هێدی بشێوەیەكێ كلاسیكی و وەكی جاران ب دەست و پلا بڕێڤە دچیتن و ب ملا دهاتە بڕێڤەبرن، بەلكۆ ئەڤرۆكە مێنتالیتە ( ئەقل ) سەرپشكێ هەمی كار و پیشەیانە. یا وەلێهاتی ئەو ماوەیێ بۆ خواندنێ د ژیانێ دا بۆ مرۆڤی هاتیە دەستنیشانكرن تێرا كۆمكرنا هەمی وان زانیاری و داتا و پێدایان ناكەتن، چونكی زانست و تەكنەلۆژیا وەكی بریسیێ یا لەزگین لێهاتی. وەرار و گەشەیا مرۆڤی لسەردەمێ بجیهانیبوونێ یا بوویە ئێك ژ ساخلەتێن جیهانی و " هەلی بابێ وی " خۆ د ڤێ ڕاستێدا پێش بئێخیتن. ئارمانجا پەروەردە و فێركرنێ لسەردەمێ نۆكەدا ژ هەر سەردەمەكی زێدەتر پێدڤڤاتی یا ب پێگەهاندن و گەشاندنا كەساتی یا مرۆڤی هەی. وەرار و گەشەیەك لسەر بنەمایێ دروستكرنا ویستا بەردەواما فێربوون و فێرخوازیێ لنك مرۆڤان، و هەستكرن ب دەمی و ڕێزگرتن ل وێ وەك هێما و نیشانەك ژ لەزگینیا گۆهۆڕینا جڤاكی و جیهانی، و هەستكرن ب هاونیشتمانیبوون د جڤاكا لۆكالی و جیهانیدا، و پێگەهشتن لسەر بنەمایێ روانگەهەك كویر و هویر بۆ بابەتان و پیڤانا وان ب پێڤەرێن مێنتالی و بابەتیانە و دروست و لۆژیكانە، و بەرز و بلندكرنا ئاستێ باوەری بخۆدێ خۆ هەبوون وەك بنەمایەكێ پێشكەفتنێ و د هەمان دەمدا ڕێزگرتن ل خۆد و خۆدێن دیتر و بۆهایێ وان وەك بنەمایەكێ كەلتوورێ بجیهانیبوونێ، و دیتنا رۆلەكێ دیار د ئاڤاكرنا نۆكە و ئاییندەدا و لسەر بناغێ رابردووی، و باوەری ب كەلتوور و فەرهەنگێ جیهانی هەبوون و دژایەتیكرنا هەر بیروباوەر و ئایدیۆلۆژییایەكا رادیكالی و كەڤنەپەرێست و هاندەر بۆ خۆپەرێستیێ و دەمارگیریێ و تووندرەوی و دكتاتۆرییەتێ و دۆگماتیزم و مەژی هشكیێ و دژایەتیكرنەكا بێ بنەما.
ئەڤە و لدەمەكی كە جیهان ل هێڤیێ یە پەروەردە و فێركرن مرۆڤایەتیێ لسەر ڤان بنەمایا پەرەوەردە بكەتن و پێبگەهینیتن تیرۆرێزما جیهانی تازە ب تازە یا بەرێ خۆ ددەتە هندێ زارۆكێن جیهانێ لسەر بنەمایێن نەدروستێن پەروەردەیی فێری بێزەڤەرترین كریارێن مرۆڤایانە بكەتن و وان وەكی رۆبۆتەكێ دەستكرد پەروەردە بكەتن بۆ مەرەمێن پیس و كرێتێن خۆ و میمۆریێ پاقژێ وان ب میمۆرییەكێ تەژی كەرب و كینە و دوژمنكاریانە و ترسناك پڕبكەتن و بگۆهۆڕیتن تا ل ئاییندەیدا ب بۆهایێن وەكی خۆ پەقاندن و سەربڕین و كۆشتن و هەڕفاندن و وێرانكرن و زیندەب چالكرنا مرۆڤان و تاوانێن سێكسی ئاڤ بدەتن. ئەڤەیە ئەو قوتابخانەیاتیرۆریزمێ دڤێتن زارۆكێ سەردەمێ بجیهانیببونێ تێدا پەروەردە بكەتن و ئاگرێ شەڕی ل دەڤەرێ هندا دیتر خۆش بكەتن و بهێلیتن.
• ئەڤ بابەتە یا ل رۆژناما ( ئەڤرۆ ) هاتیە بەلاڤكرن ل ژمارە (1723 ) ڕێكەفتی (13/9 /2015) ل(13).