ئێك ژ وان میكانیزمێن بەرگرییا دەروونی یاكۆ ڕێبازا شرۆڤەكارییا فرۆیدی ئاماژەی پێددەتن كاردانەڤەیا بەرۆڤاژی(reaction formation)یە كە دبنەرەتدا ژ دوو قۆناغان پێكدهێتن. ل قۆناغا ئێكەمدا تاك پێدڤی ب دەستنیشانكرن و پاشڤەلێدانا رەفتار یان هزرەكێ یە و ل قۆناغا دویڤدا دەستنیشانكرن و بكارئینانا رەفتار یان بیروباوەر و هزرەك دژی وێ (ئەوا ل قۆناغا ئێكەم هاتیە دەستنیشانكرن و پاشڤەلێدان) یە، بۆ هندێ كە پرۆسێسا كاردانەڤەیی سەربگریتن.
بۆ رۆهنتركرنا ڤێ فرت و فێلا دەروونی دێ نموونەیەكێ ئینین. كەسەك هەبیتن كۆ مەیل و ئارەزوویەكا بێ قام و زێدەیا سێكسی هەبیتن، بەلێ نەشێتن ژبەر ئەگەرێن جڤاكی یان تایبەت یان هەر هۆكارەك دیتر وێ ب ئازادانە پراكتیك بكەتن، دێ ڕابیتن ب بكار ئینانا ڤێ میكانیزما بەرگرییا دەروونی و پەنایێ بەتە بەر هندێ خۆ مرۆڤەك دیندار و پاقژ و شەریف نیشان بدەتن و كە دبنەرەتدا دژی هزر و ئارەزوویا قۆناغا پێشترە. ئەڤە ئانكۆ ئەڤ میكانیزمە هندێ دگەهینیتن كە بریتیە ژ پەنابرنە بەر شێواز یان رەفتارەك بەرۆڤاژی یان دچی پالنەر و هزرا كۆ د ڤێ قۆناغێ یان د وێ جڤاكێ دا دەلیڤە بۆ دابینكرنا وێ نینە و یان ب پالنەر و خواستەك نەگۆنجای دهێتەهژمارتن. ئەڤ كارە ڕێكەكە بۆ هندێ ئەڤ تاكە خۆدێ خۆ ل بەرامبەر وێ نیگەرانی و شەپرزەیی و مەترسییا كۆ ژ هەبوونا هزرا ئێكەم و رەفتارێن پێڤەگرێدای بپارێزیتن و ل جهێ وێ رەفتارەك گۆنجای تر پێشكەش بكەتن.
یا دیارە ئەڤ میكانیزما سایكۆلۆژی جۆرە ساختەكاری و شێواندنا راستیێ و كەتوارییە چونكە وی نەچار دكەتن بەرۆڤاژی بیروبۆچۆن و هزر و ئارەزوویێن خۆ رەفتار بكەتن. ئەڤ چەندە و شێواندنە دبیتە ئەگەرێ هندێ ئەو گەلەك ژ لایەنێن دیترێن ژیانا خۆ ژی لدویڤ ڤێ چەندێ بگۆهۆڕیتن.
هەكەر ئەم چاڤەكی ب رەفتارێن هندەك كەسێن تیرۆریست دا بخشینین و ئاگەهداری ژیانا وان یا رۆژانە بین دێ بینین بكارئینانا ڤێ فرت و فێلێ و میكانیزما دەروونی ب ئاشكرایی د ژیان و كریار و رەفتارێن وان دا دبینیتن و تێبینی دكەتن. گەلەك ژ ڤان كەسێن پەیوەندی ب ڕێزێن تیرۆرێ دكەن ئەو گەنجن ئەوێن د گۆپیتكا گەنجاتیێ دا دژین و ئەڤ قۆناغە ئێكە ژ وان قۆناغێن هێزا لیبیدۆ و شیانا سێكسی د بلندترین ئاستێ خۆدانە و نەبوونا دەرفەتێ تێركرنا ڤی رەمەكێ بهێز و دژوار لناڤ جڤاكێن خۆ دا و ژ ئەگەرێن جۆداجۆدایێن ئابووری، سایكۆلۆژی، جڤاكی و .. هتد، وان نەچار دكەتن ل دژی ڤی رەمەكێ و تەپەسەركرنا وێ ڕێكەكا دیتر بگرنە بەرسینگێ خۆ، كە ل چاڤ ڤێ ئارەزوو و میل و پالنەری بسانەهیترە و ئەو ژی گرتنا ڕێكا ئایینی و پەیوەندیكرنە ب وان ڕێكخراوێن كە ئەڤ هزرە تێدا زالە و دشێتن بڕێكا كاردانەڤەیا بەرۆڤاژی ڤێ ئارەزوویێ لنك خۆ تێر بكەتن و بەلگە ژی بۆ ڤێ گۆتنێ ئەوە كە گەلەك ژ ڤان كەسان دگەل پەیدابوونا دەرگەهێ تێركرنا راستەوخۆ یا ڤی رەمەكی بناڤێن جۆداجۆدایێن وەكی "نیكاحا جیهادی" و ناڤێن دیتر، روویێ راستەقینەیێ خۆ نیشان ددەن و دەردئێخن ئەوان چەوا پەنایێ بۆ ڤێ ئاییندارییا درەوین و شێواندی بری و داكۆ برەنگەك ژ رەنگان جڤاكا دەوروبەری خۆ وەسا تێبگەهینن ئەو چەند مرۆڤێن پاقژ و دویرن ژ خۆشیا سێكسی.
• ئەڤ بابەتە یا ل رۆژناما (وار ) هاتیە بەلاڤكرن ل ژمارە (1403 ) ڕێكەفتی (3/9 /2015) ل(6).