ڤێ میكانیزما بەرگری و فرت و فێلا دەروونی دێ ب چەند نموونەیێن ئاسایی شرۆڤە و رۆهن كەین. فەرمانبەرەك ل دەزگەهەكا میری ژ لایەنێ بەرپرسێ خۆ هێتە لۆمەكرن و سزادان، ول ڤێرێ چونكی ئەڤ فەرمانبەرە نەشێتن رووی ب رووی بەرپرسێ خۆ ببیتن، دێ كۆل و قەهرێن خۆ ئینیتە مال و ژەهرا وێ بسەر خێزانا خۆ دا ڤالە كەتن، یان هەمان ئەڤ فەرمانبەرە دێ خۆ ل فەرمانبەرێن دیترێن دگەل یان لبن دەستێ خۆ توورەكەتن و تۆلا خۆ ل وان ڤەكەتن.
د سایكۆلۆژیایێ دا گۆهۆڕینا ژێدەرێ هەلچۆنێ ژ ژێدەرێ سەرەكیێ خۆ، كۆ دبیتن بهێتر ژی بیتن، بۆ بابەت یان كەس یان تشتەك دیتر ب میكانیزما ڤەگۆهاستن( التحویل یان displacement) دهێتە نیاسین. لێ ئەوا د ڤێ میكانیزمێ دا بەرچاڤە ئەوە كۆ ئاست و ڕێژەیا ئێش و ئازارێ د وی جهێ هەلچۆن بۆ دهێتە ڤەگۆهاستن كێمترە ژ ژێدەرێ ئێكەم و یێ سەرەكی، و هەرچەندە ئەڤ ژێدەرە دهێتە گۆهۆڕین، لێ ناڤەرۆك و ئارمانج، كۆ هەما خۆ ڤالەكرن و دەربڕینە، ناهێتە گۆهۆڕین.
هەكەر ئەم بچاڤێ ڤێ میكانیزمێ تەماشەی كریارێن تیرۆریزمێ بكەین دێ ب رۆهنی و ئاشكرایی بینین كە ئێك ژ ئارمانجێن تیرۆریزمێ تۆلڤەكرنە ژ رۆژئاڤا و پێشكەفتن و گۆهۆڕینا كۆ ئەڤ پێشكەفتنە بوویە ئەگەرێ وێ د سیستەمێ بۆهایێ جیهانی و ئابووری و سیاسەت و جڤاكێ دا بگشتی، لێ ژبەر هندێ كۆ دەلیڤە بۆ ڤێ چەندێ و تۆلڤەكرن ژ رۆژئاڤا و نەخاسمە پشتی ئێرشێن ( 11) سپتەمبەرێ و كریارێن تیرۆریستی یێن پشتی هنگێ ل ئەورۆپایێ یا كێمتر و بزەحمەتتر لێهاتی، لەوما تیرۆریزم ژ نەچاری بزاڤێ دكەتن بابەتێ ئێڕشێن خۆ بۆ بابەت و جهەك و لایەنەك بەردەستتر و نێزیكتر ڤەگۆهێزیتن و ئەڤ چەندە ل وەلاتێن جێگیرێن دەڤەرێ وەكی ئۆردن و سعۆدیا و وەلاتێن كەنداڤا فارسی بزەحمەتترە، و دمینیتن جهەك و ئەو ژی ئەو جه و وەلاتن یێن كاودانێن سیاسی تێدا نەجێگیر و شەپلینە. لەوما دێ بینی ڤان ڕێكخراوێن تیرۆریستی سنوورێ كار و چالاكیێن خۆ یێن ڤەگۆهاستین و ل شوینا سەرژێكرن و سۆتنا ئەمریكی یان بەریتانیەكی دێ ڤێ چەندێ دگەل كوردەكی یان كرسیتیانەكی یان كەسەكێ دیتر ل ڤێ دەڤەرا نەجێگیر دا كەتن.
پیادەكرنا ڤێ دڕنداتی و هۆڤاتیێ لسەر ڤی تاكی و بابەتەێ دووهەم بۆ تیرۆریزمێ بسانەهیتر و كێم مەترسیترە و دگەل هندێ دا ژی ژ تێهنا وێ كەرب و كینە و هەلچۆنا خراب ل دژی ژێدەر و بابەتێ ئێكەم ژی كێم ناكەتن. د ڤێ میكانیزمێ دا تیرۆر مە ژ وان و وان ژ مە دهژمێریتن و ئەڤ چەندە پالدەرێن وی تێر دكەن و تنێ ئاراستەیا وێ بەرەڤ ئارمانجەك بەردەستتر و بسانەهیتر دگۆهۆڕیتن.
• ئەڤ بابەتە یا ل رۆژناما ( وار ) هاتیە بەلاڤكرن ل ژمارە (1413 ) ڕێكەفتی (17/9 /2015) ل(6).