دبیتن د كاودانێن ئەڤرۆكە دا و ب هەلكەفتا بوونا تیرۆریزمێ ل دەڤەرێ و جیهانێ گەلەك جاران مرۆڤ هندەك پرسیاران ئاراستەی خۆ و یان كەسانێن دیتر بكەتن وەك نموونە تیرۆر بۆچی هەیە و بۆچی پەیدا بوویە و كێ دروستكرییە؟ و گەلەك پرسیارێن ژ ڤی بابەتی. راستە كۆ بەرسڤا ڤان پرسیارێن هۆسا دبیتن ئەگەرێ هندێ گرێ یەك ژ گرێ یێن بهێتە ڤەكرن، لێ وەك سایكۆلۆژیستێن هەڤچەرخ دبێژن پرسیارێن ژ جۆرێ بۆچی ...؟ بۆچی ...؟ چ بەرسڤ نینە و لدویڤچۆنا مرۆڤی بۆ ڤەدیتنا بەرسڤان بۆ ڤان جۆرە پرسیاران تنێ بۆ خۆدانێ وان سەرئێشانێ دروست دكەتن و بەس و وی ناگەهینیتە چ ئەنجامان. یا فەرە ئەم بزانین ئەڤرۆكە تیرۆریزم، ب هەمی نەرینی یێن خۆ ڤە، یا هەی و بوویە پشكەك ژ كەلتوورێ جیهانێ و دەڤەرێ. یا فەر نەئەوە ئەم ڕابین بگەڕهین لدویڤ پرسیارێن بۆچی ...؟ بۆچی...؟ بكەڤین و بگەڕهین. ئەم پێدڤیە دان ب هەبوونا دیاردەیەكا مەترسیدار بدەین و باوەر بكەین كە ئەڤ دیاردەیا جڤاكی یا ل گۆڕێ و یا بوویە ئەگەرێ تێكدانا هزراران هزرا هیڤی و خێزان و جڤاك و گۆند و باژێڕان. ئەڤرۆ مرۆڤایەتی پێدڤی ب هندێ یە بەرسڤا هندەك پرسیارێن دیتر بدەتن و هەر بڤێ چەندێ یە دێ شێتن زیانێن ڤێ بوویەرا نەمرۆڤایانە كێم بكەتن. پرسیارێن وەكی: دێ چەوا بەرگریێ ژ خۆ كەین؟ دێ چەوا ب كێمترین نرخ سیبەرا رەشا تیرۆریزمێ ژ سەر سەرێ خۆ لادەین؟ ئەڤ پرسیارە ئەو پرسیارن یێن كۆ بەرسڤا وان ئەڤرۆكە ب كێر مە دهێن. ئەڤرۆ هەمی جڤاكا كوردستانی پێدڤی ب ئێكگرتنێ یە. چەپلە ب دەستەكی ناهێتە لێدان. ئەڤرۆكە تیرۆریزم وەكی تەپكەكێ یا كەفتیە د ناڤ گۆڕەپانا كوردستانێدا و وەكی مارەكی یان دارئالینكەكێ یا خۆ د دارا ئازادییا كوردستانێ ئالاندی و پێدڤیە هەر تاكەك پێشمەرگەهەك بیتن د سەنگەرێ بەڕەڤانیكرن ژ كەلتوور و جڤاك و كوردستانێ. ئەڤ ئەركێ گران تنێ ب پشَمەرگەهی ناقەتیتن. راستە پێشمەرگەی، وەك سەرۆك بارزانی دفەرمووتن سێحرا تیرۆریزمێ شكاند، لێ ئەڤرۆكە چەند تیرۆرا ژ دەرڤەی سنوورێن كوردستانێ گەفەی ل مە دكەن هند ژی پێدڤییە ئەم هۆشیاری تیرۆریزما ناڤخۆیی بین. تیرۆریزما ناڤخۆیی تنێ نەئەوە ئانكۆ هندەك كەس لناڤ كوردستانێ تیرۆریزم بن، ئەڤە بەس ئێكە ژ گەلەك جۆرێن تیرۆریزمان و گەلەك ژی مەترسیدارە.
هەر گەنجەك دبیتن هەكەر دروست د پەیرەو و پرۆگرام و بەرنامێ ئایینێ پیرۆزێ ئیسلامێ نەگەهیتن، ژ ئالیێ تیرۆریزمێ ڤە بهێتە خڕاندن و ببیتە ئەلەمێنت و دەستەك بۆ دوژمنێن كوردستانێ. ئەڤرۆكە دەیباب د خێزانێدا، فەرمانبەر ل دام و دەزگەهێن میری و كەرتێ تایبەت، مامۆستایێن ئایینی و پەروەردەیی و ئەكادیمی ل مزگەفت و قوتابخانە و زانینگەهان پێدڤی ب هۆشیاری و هۆشیاركەریێ نە، هەم بۆ خۆ و هەم بۆ ئەو كەسێن دگەل وان دا كار دكەن یان لبەر دەستێن وان دخوینن، و پێدڤییە بۆ وان رۆهن بكەن كە ئەو بنەما و پرەنسیپ و هزرێن شاشێن تیرۆریزمێ ئایدیۆلۆژیایا هۆڤا خۆ لسەر ئاڤاكری نە ژ مۆسلمانێ شێعە و نەیێ سۆننە و نەكوردێ ئێزدی و مەسیحی و نەكەسەك جۆهی و كەس دیتر ناگریتن چونكی هەمیا باوەرییا ب مەزناتیا خۆدایێ مەزن هەی و نەبت پەرێستێن سەردەمێ ( جاهلیەتێ )نە، و سزادان و پاداشتكرنا وان و هەر مرۆڤەكی لسەر بیروباوەرێن وی ئەركێ وی خۆدایێ مەزن و دلۆڤانە، یێ كۆ فەرمایشتا ئافراندنا مرۆڤان لسەر بنەمایێ نەتەوە و رەنگ و گەل و زمانێن جۆداجۆدا د قۆرئانا پیرۆزدا راگەهاندی. ئەڤ سزادان و پاداشتكرنە نە د دەستێن تیرۆریزمێ دایە تاكۆ بڤێ هێجەتێ ب سۆتن و سەرژێكرنا مرۆڤان سزا بدەتن و یان ب بەلاڤكرنا بەرهەلاییا سێكسی وەك پاداشتەك لنك خۆ و ژ كیستێ خۆ حەلال كری، سەرەدەریێ دگەل پیڤەرێن پیرۆزێن ئایینی دا بكەتن. تێگەهاندنا نڤشێ نۆكە ژ ڤان راستییا ئێكە ژ ئەركێن هەرە سەرەكیێن جڤاكێ و نەخاسمە مامۆستایێن ئایینی و ئەڤ چەندە دێ بەرسڤا پرسیارێن كۆ ب ( چەوا ؟ ) یێ دەست پێدكەن دەن و باشترین دەرمان و چارەسەرینە بۆ هشك كرنا دارێ تیرۆریزمێ ل دەڤەرێ و جیهانێ.
• ئەڤ بابەتە یا ل رۆژناما ( ئەڤرۆ ) هاتیە بەلاڤكرن ل ژمارە (1696 ) ڕێكەفتی (5/8 /2015) ل(13).