تەپەسەركرن و رەفتارێن تیرۆریستی
د.نەسرەدین ئیبراهیم گۆلی*
هندەك بسپۆر د وێ باوەرێ دانە كە ئەڤ شێوازە ژبەر هندێ كۆ لسەر ئاستەكێ هەستی دهێتە جێبەجێكرن، لەوما ب میكانیزمەكا بەرگریكرنا دەروونی یا راستەقینە ناهێتە هژمارتن. ئەڤ شێوازە پێدڤی ب ئیگۆ (ego) یەكێ بهێزە و تێدا بسانەهی ئەزموون و ململانێ و بیرهاتنێن رابردووی دهێنە سەر ئاستێ هەستی، و ب هاریكارییا وێ هەڤسەنگییەك دناڤبەرا پالنەرێن هەستی و نەستی( اللاشعوری) یێن كۆ دگەل ئێك د ململانێ دانە دروست دبیتن.
دیارە سروشتێ كارێ ڕێكخراوێن تیرۆریستی و ئەو سەرەدەرییا ئەو دگەل هەڤدۆ دكەن تاكێ تیرۆریست نەچار دكەتن كە پترتر پەنایێ بۆ ڤی جۆرێ فرت و فێلا دەروونی ببەتن. بەلگە ژی بۆ ڤێ گۆتنێ ئەوە كە سیستەمێ كاری د ڤان ڕێكخراوان دا دخوازیتن كە ئەوێن پلەدار و سەركردەنە بشێوەیەكێ نەمرۆڤایانە فەرمانێ ل ئەوێن خوارێ و لبندەستێ خۆ بكەن و د ڤان جۆرە فەرماناندا كەساتیا وان ژی بشكێنن و ئەوێن بندەست ژی ژبەر ترسا خۆ بیتن یان ژبەر بەرژەوەندیێن نەرەوایێن ڤێ رَێكخراوێ بیتن نەچاری هندێ بن پەنایێ ببەنە بەر تەپەسەركرنا هزر و بیروباوەرێن خۆ یێن كۆ ژ ڤی جۆرێ سەرەدەریكرنێ دروست دبن و ناهێلن ئەڤ تەپەسەركرنا د بزاڤ و گۆتار و كریارێن وان دگەل سەركردەیێن خۆ دەربكەڤیتن و ئەڤ تەپەسەركرنە وەكی كەلەكا بەرا دكەڤنە سەر ئێك و عۆمبار دبن، و ل شوێن دژی سەركردێن خۆ دەربكەڤن دێ ل جهێن دیتر و ل دژی خەلك و كەسێن دیتر وەكی ئاگرەكی دەركەڤیتن و د شێوازێ رەفتارێن هۆڤ و دڕندانە خۆ نیشان بدەن و گەلەك رەفتارێن ژ ڤی بابەتی دشێتن لسەر بنەمایێ ڤێ میكانیزما بەرگرییا دەروونی بهێتە شرۆڤەكرن، كە د ڕێبازا سایكۆلۆژیایا شرۆڤەكارییا فرۆیدی دا، وەك زاراڤەیێن زانستی هاتینە ناڤ گۆڕەپانا سایكۆلۆژیایێ دا. هەتاكۆ دبیتن ناڤەكێ دیترێ ڤێ میكانیزما فرت و فێلا دەروونی یا خۆكۆنترۆلكرن و زالبوونا مرۆڤی بسەر هەلچۆنێن خۆ دا، بناڤێ داقۆرچاندن ژی بهێتە نیاسین.
• ئەڤ بابەتە یا ل رۆژناما ( وار ) هاتیە بەلاڤكرن ل ژمارە(1385 ) ڕێكەفتی (10/8 /2015) ل(6).
