هندەك جاران د ژیانا ئاساییدا هەلوێستەك دروست دبیتن كە مرۆڤ دێ كارەكی كەتن و ئەو كار سەرناگریتن و یان ئەنجامێن وێ بەرۆڤاژی هزرا مرۆڤی دەردكەڤن هنگی دێ تاك پەنایێ بۆ هندێ بەتن كەس یان لایەن یان تشتەك دیتر بكەتە ئەگەرێ سەرنەكەفتنا خۆ. ئەڤ كارە د زانستێ سایكۆلۆژیایێ دا و بدیتنا دەروونناسیا فرۆیدی یا شرۆڤەكاری ناڤێ وێ هێجەگرتنە( التبریر یان rationalization) و وەك پێناسە بریتیە ژ ئیناندنا هندەك بەلگەیێن پەسندتر و نێزیك ل بیروباوەرێن كەسی ل شوینا بەلگەیێن لۆژیكی و دروست لدۆر وی كارێ ئەو هەلوێست تێدا دروست بووی. ئەڤ بەلگەیە ب باوەرا وی كەسی گۆنجایتر و هەژیترن و ئەڤ پرۆسێسە میكانیزمەكا نەستییە ( لاشعوری) و جیاوازە ژ درەوكرنێ. بڤی كاری تاك دێ ڕێز ل خۆگرتنا خۆ پارێزیتن و هیچ دەلیڤەیەكی بۆ هندێ كە بكەڤیتە بەر گەفێن پرسیار ژێكرنێ یان هەستا گۆنەهباریێ لنك دروست ببیتن ناهێلیتن. ئاستێ كەتوارێ د ڤێ میكانیزما بەرگرییا دەروونی دا گەلەك كێمە، لێ دگەل هندێ جۆرەكێ خۆ فریودانێ یا تێدا هەی و ژ ڤێ چەندێ یە كە مەترسیێ لسەر كەساتییا تاكی دروست دكەتن و ب تشتەك نەرینی دهێتە هژمارتن. و ئێكە ژ وان فاكتەرێن كە دبنە ئەگەرێ سەرنەكەفتنا تاكی د كار و چالاكی و ئەركێن سەرشانی خۆ. چ گۆمان تێدا نینە ئەڤ شێوازە ژی وەكی میكانیزمێن دیترێن بەرگرییا دەروونی بۆ مەبەستی پاراستنا تاكی ژ لۆمەهی و رەخنە و گازندەیێن خەلكێ و جڤاكێ دهێتە ئەنجامگرتن.
هەكەر ڤێ میكانیزمێ لسەر تیرۆریزمێ جێبەجێ بكەین دێ بینین كۆ تیرۆر بزاڤێ دكەتن بۆ كریارێن خۆ هێجەتگیریێ بكەتن و ب شرۆڤەكرنا كارێ خۆ لسەر بنەمایێ هندێ كە ل جیهانێ زۆرداری و كۆفر و خرابی یا هەی و هندەك كەسانان دڤێتن جیهانا ئیسلامێ و بۆهایێن وێ تێكبدەتن و ئیسلامێ ژناڤ ببەن، كار و كریارێن خۆ ب تشتەك و ئایدیۆلۆژیایەك دروست بدەتە نیاسین. ئەو ئەگەرێن شكەستنا خۆ و درست بوونا دەولەتا خەیالییا خۆ ژی بۆ هاریكاری نەكرنا خەلكێ بۆ وان و دژایەتیكرنا جیهانێ ددەنە زانین لدەمەكی كۆ ئەگەرێن لۆژیكی و دروستێن ڤێ چەندێ هەر ئەو رەفتار و تاوانێن دژی مرۆڤایانەتینە و ئەو ئایدیۆلۆژیایا ئەو پێ هزر دكەن بۆ مەبەستا پاراستنا ئایینێ ئیسلامێ هاتیە گۆڕێ ژ زیانێ پێڤەتر چ مفایەك نەگەهاندیە جیهانا ئیسلامێ. و پەنا برنە بەر ڤێ میكانیزما فرت و فێلا دەروونی ژی پشكەكە ژ وێ كەساتیا نائاسایی و لادرایێ تیرۆریستی كە نەشێتن لسەر بنەمایێ ئەگەرێن كەتوار كار و كریارێن خۆ ئاراستە و ئارمانجدار و شرۆڤە بكەتن.
• ئەڤ بابەتە یا ل رۆژناما (وار ) هاتیە بەلاڤكرن ل ژمارە (1397 ) ڕێكەفتی (26/8/2015) ل(6).