دهێتە گۆتن جارەك ژ جاران سیارەك بڕێكەكێدا دچۆ، د نیڤەیا ڕێكێ و ل چۆلاهیەكێ گەهشتە كەسەكێ لسەر ئەردی درێژ ببوو. سویاری هزركر ئەڤـ كەسە تەنگاڤە و یان بریندارە یان كەسەكە پێدڤی ب هاریكاریێیە. هاتە خوارێ و ل وی نێزیك بوو، دیت یێ ساخە و بسەرێ ئەزمانی داخوازێ ژ سویاری دكەتن كە وی دەینیتە سەر پشتا هەسپێ خۆ، چونكی ئەوی چ هێز نەمایە و یێ ژ كاس كەتی. جوامێرێ خۆدانێ هەسپی تەخسیری نەكر و ب دلەكێ پاقژ هندەك ئاڤ دایێ و دەیناندە سەر پشتا هەسپێ خۆ. بەلێ نزانیتن زەلامی بەختێ خۆ یێ ل وی قۆلپاندی. دەمێ سویار بی و باش جهێ خۆ كری پێیێن خۆ لبن زكێ هەسپی دان و هاژۆت و كارێ ڕەڤینێ كر. خۆدانێ هەسپی ما حێبەتی، لێ سەر هندێڕا گازی زەلامی كر و گۆتێ : " وەرە من هەسپ نەڤێتن، و بلا بۆ تە بیتن. بەس بۆ من تشتەكی بكە .. ". زەلامێ لسەر پشتا هەسپی پیچەكێ هاتە نێزیكتر. خۆدانێ هەسپی گۆتێ : " تە هەسپ بر، ببە، تە پیرۆز بیت. بەلێ توو بخۆدایێ مەزن كەی نەبێژە خەلكێ تە چەوا ئەڤ هەسپە یێ بری. چونكی هەكەر ئەوان گۆه ل ڤێ چەندێ ببیتن هێدی كەسێ باوەری ب كەسێ نامینیتن و رەحمێ ب ڕێبوارا نابەتن".
ئەڤ چیرۆكە پەند و وانەیەكە بۆ تیرۆریزما جیهانی كە دروستكرنا دەولەتێ كرییە هێڤێنێ خوینڕێژییا خۆ. لێ بلا ئەو خۆ ل گێلی نەدەن كە هەكەر ئەو ژ ئەگەرێ ئایدیۆلۆژیایەكا تووندرۆوانە یان پەروەردەیەكا خەلەت یان لبن كارتێكرنا هەر فاكتەرەك و فشارەكێ و ب هەر هێجەتەكا هەبیتن تووشی ڤڤان هەمی كریارێن نەمرۆڤایەنە دبن، بلا هیچ نەبیتن ڕەحمەكێ ب هندەكێن دیتر ببەن و ڤان كریارێن نەشرین و كرێت و دژی مرۆڤایانە نەكەنە بەنیشتۆك و وەكی وانەی پێشكەشی هندەكێن دیتر بكەن دا بۆ وان ژی نەبیتە وانەیەك و ئەو ژی ژ بها و نۆرم و داب و نەریتێن جڤاكی و مرۆڤایانە دویر بكەنە مامۆستا و پیشەنگێن خۆ. ئەڤ جۆرە كەسە ئاستەنگێن مەزنن لبەر پێشكەفتنا گەل و وەلاتان. چونكی دبنە قوتابخانەیێن تێكدانا رەوشتێ مرۆڤایەتیێ د جڤاكێدا. هەر قۆناغەك ژ قۆناغێن شارستانیەتێ هندەك گەل و نەتەوە هەوجەداری راپەرین و شۆرەشان بووینە و هەكەر راپەرین و شۆرەش بڤی دەست و داری بیتن یێ كۆ تیرۆریزمێ د ڤان چەند سالێن بۆری دا نموونەیا وێ پێشكەشی جیهانێ و دەڤەرێ كرین هێدی نڤشێ ئاییندە دێ شۆرەش و راپەرینا ل خۆ حەرام كەتن و هەتا هەتایە دێ لبن زۆرداری و زۆلمێ بن تاكۆ توشی هاوشێوەیێن تیرۆرزمێن وەكی داعش و ئەلقاعیدەی نەبن.
• ئەڤ بابەتە یا ل رۆژناما ( ئەڤرۆ ) هاتیە بەلاڤكرن ل ژمارە (1698 ) ڕێكەفتی (9/8 /2015) ل(12).