تیرۆریست و یاسایا خۆیەتی
February 7, 2016
وتار و بیروڕا
![تیرۆریست و یاسایا خۆیەتی](https://gulanmedia.com/public/old_images/nusaran/unname4d.jpg )
هەكەر ئەم تەماشەی دیاردەیا تیرۆرێ بكەین و بڤێ یاسایێ كەساتیا تیرۆریستان بپیڤین چ گۆمان تێدا نینە دێ بۆ مرۆڤایەتیێ خویا بیتن كە ژدەیكبوونا وێ هەلەیەكا مەزن و دیرۆكییە. هزركرن د هندێدا كە كەساتیا هەمی تیرۆریستان ب سروشت و زگماكی خرابە، ناگۆنجیتن دگەل لۆژیك و بنەمایێن زانستیێن سەردەم. تیرۆریست ژی مرۆڤەكە وەك هەر مرۆڤەك دیتر دەمێ دهێتە سەر ڤێ جیهانێ لاپەرەیەكا سپییە و ل ئەنیا هیچ كەسەك ژ وان مۆهرا تیرۆریستبوونێ و خرابیێ نەهاتیە لێدان، بەلكۆ ژینگەها مرۆڤی و جڤاكێ و خێزانێ و قوتابخانە و دەزگەهێن راگەهاندنێ وی دگۆهۆڕن و دكەنە مرۆڤەك تیرۆریست و تەژی كەرب و كینە و لادای و خۆنەویست و دوورەپەرێز و دوژمنێ مرۆڤایەتی و شارستانیەت و كەلتوور و مەزهەب و ئایین و نەتەوە و نەژادێن دیتر كرین. بەرۆڤاژی ڤێ لۆژیكا كلاسیك و لدویڤ بنەمایێن زانستێن پەروەردەیی و سایكۆلۆژی یێن نوی، مادەم ئەڤ مرۆڤە ئافراندیێن ژینگەهێنە، كەواتە دەلیڤە یێ هەی گەلەك ژ وان بهێنە گۆهۆڕین و چارەسەر ببن و بهێنە سەر ڕێكا راست، بەلێ هەكەر ڤێ چەندێ ئاستەنگ هەبن، دبیتن ڕێكێن دیتر بۆ ڤێ چەندێ هەبن. ئەم دبینین چەندین جاران ڤان ڕێكخراوێن تیرۆریستی گەلەك كەسێن كۆ دناڤەرۆك و نەراستیا پەیاما ڤان ڕێكخراوێن تیرۆریستی گەهشتین و دڤێتن كە خۆ ژ ئاگرێ وان قۆرتال بكەن، دهێنە گۆللەبارانكرن و ئەڤە ئاستەنگەك مەزنە لبەردەم پرۆسێسا گۆهۆڕینێ، چونكی هندی كەسەك دناڤ ڤان ڕێكخراوێن تیرۆریستیدا بیتن و ژ سنوورێ دیتن و كارتێكەرییا وان دویر نەكەڤیتن نەشێتن ژ قەید و بەندێن هزری یێن وان قۆرتال ببیت.
لێ جڤاك دشێتن ب ڕێكێن دیتر وەكی بلندكرنا ئاستێ ژیارێ و تەناهیێ و خزمەتگۆزاریێن ساخلەمی و پەروەردەیی كاربكەتن بۆ پێشگیریكرن ( وقایە ) ژ چۆنا تاكێن جڤاكێ بۆ ناڤ ڕێكخراوێن تووندرۆ و تیرۆریستی. فەیلەسۆفێ مەزن ڤیكتۆر هۆگۆ دبێژیت " هەر قوتابخانەیەكا دهێتە ئاڤاكرن زیندانەك دهێتە دائێخستن "، و ئەڤە نیشانەكە ژ هندێ قوتابخانە و پەروەردەكرن رۆلەكێ مەزن د پێشگیری و چارەسەركرنا تاوانێ و تاوانباران دگێڕیتن. ئەڤ كەساتیێ تیرۆریستی بەرهەمێ پەروەردەیەكێیە كە تێدا هندەك كەسێن ویژدان مری بەردەوام پستەپستێن لبن گۆهێن گەنج و قوتابیان دخوینن و هەمی جیهانێ لبەر چاڤێ وان ب " كافر " دهژمێرن.
لەوما هەكەر دەزگەه و سەنتەرێن پەروەردەیی و راگەهاندن و ئایینی زارۆك و گەنج و قوتابیان لسەر بنەمایێ ڤیانا بەرامبەر و بیروباوەرێن جیاواز و نەژاد و نەتەوە و ئاینێن دیتر پەروەردە بكەن، چ گۆمان تێدا نینە دێ ئەڤ كەسە فێری مرۆڤدۆستی و ڕێزگرتن ل ئایین و نەتەوەیێن دیتر بیتن و بچاڤەكێ مرۆڤایانە تەماشەی ڤێ ژیانێ كەتن و ژ وێ هۆڤاتیا تیرۆریست تێدا دژیتن و پەروەردە دبیتن دویر دكەڤیتن.
• ئەڤ بابەتە یا ل رۆژناما ( ئەڤرۆ ) هاتیە بەلاڤكرن ل ژمارە( 1670) ڕێكەفتی (21/6/2015) ل(13 ).