پشتی فرۆیدێ بەرنیاس كەساتیا مرۆڤی بسەر سێ ئاستێن پێش هەست ( ما قبل الشعور ) و هەست ( الشعور ) و نەست ( اللاشعور ) دابەشكری، ڤیا بڤی رەنگی ژی لایەنێ سایكۆلۆژیایا مرۆڤی ژی دابەش بكەتن و ئەڤ چەندە كر و ئێك ژ پشكێن گرنگێن وێ ژی ئید ( Id یان هو ) یە كۆ بدیتنا وی هندەك سالۆخەتێن دیارێن وێ ئەوە كە نەستییە و چ پەیوەندی ب كەتواریڤە نینە و هیچ بهایەكێ نادەتە كەتواری، و بهایێن جڤاكی و بنەمایێن ئەخلاقی لبەرچاڤ ناگریتن، و بێی دوو و سێ یا لبن دەستهەلاتا بنەمایێ تام و چێژ وەرگرتنێ و چ سنوورەكێ لۆژیكی نانیاسیتن و عمبارەكە ژ ئارەزوو و هەستەوەر و هزرێن تەپەسەركری، و ژ هەمیا ژی گرنگتر وزەیا سێكسی د مرۆڤیدا هێزا خۆ ژ ڤی بەشی وەردگریتن ( كە فرۆیدی ناڤێ وێ ب لیبیدۆ دئینیتن ).
هەكەر كەساتیا تیرۆریستەكی بڤی پیڤەری هەلبسەنگینین دێ بینین ئەڤ كەساتییە ژ ڤی ئاستی زێدەتر دەرباز نابیتن و ناگەهیتە هەر دوو ئاستێن دیتر ( ئانكۆ ئێگۆ و سوپەر ئێگۆ ). د تۆپۆگرافیایا كەساتیا تیرۆریستیدا ب ئاشكرایی هەمی رەنگێن زالبوونا ئاست یان پشكا لیبیدۆی دهێتە دیتن و هەستپێكرن. ئەڤ كەساتیا ب هەمی رەنگانڤە بزاڤێ دكەتن كە د قۆناغا نەستیدا بمینیتن و نەگەهیتە ئاستێ هەستی و هەست ب كەتواری بكەتن و بۆ ڤێ چەندێ پشتا خۆ ب گەلەك شێوازان و ژ وان ژی بكارئینانا دەرمانێن بێهۆشكەر گرێددەتن دا هەمی دەمەكی د ئاستێ نەستی دا بمینیتن. ئاراستە و پیڤەر و بۆهایێن جڤاكی و بنەمایێن رەوشتی جهێ خۆ د ستراكتوورێ سایكۆلۆژیایا وی دا نینە. یا گرنگ لنك وی تام و چێژە كۆ ژ هەمی كریارێن هۆڤانە و دڕندانە وەردگریتن و گۆهدارییا هیچ پیڤەرەكێ ئاسایی و لۆژیكی ناكەتن.
بەلگە ژی بۆ ڤی َ چەندێ هەمی ئەو گۆهنەدانە ب ئەنجامێن نەرینیێن كار و كریار و بەرهەمێن وان كارانە كە هزاران قۆربانی و بێسەراوشوین و كاولكرنا سەدان گۆند و باژێرانە، كە تنێ پشكەكن ژ كریارێن كەساتیا تیرۆریستەكی، كە هیچ بۆهاییەكێ جڤاكی و لۆژیك و بنەمایەكێ رەوشتی و پیڤەرەكێ مرۆڤی وان پەسند ناكەتن. كەساتیا تیرۆریستی بزاڤێ دكەتن هەمی ئەو هزر و ئارەزوو و هەستێن ڤەشارتی و تەپەسەركریێن قۆناغێن جۆداجۆدایێن ژیانا خۆ یا رابردوو و تەژی كۆلەجەرگی برەنگەكێ وەكی رەفتارێن هۆڤانە دەرببڕیتن و د هەمان دەمدا ژ ئەگەرێ زالبوونا لیبیدۆی بسەر كەساتیا وی دا و بێدەستهەلاتیا ئێگۆ و سۆپەر ئێگۆ و ویژدانێ وی، هەمی دەمەكی یێ د هزرا هەڕفاندن و خرابكرن و تێكدان و كۆشتن و بڕین و تالانكرنێ بیتن كە هەمی ئەڤ كریارە نیشانێن بەرچاڤێن زالبوونا رەمەكێ مرنێ یە بسەر رەمەكێ ژیانێ، وەك فرۆید ئاماژەی پێددەتن.
قۆرتالبوونا كەساتیا تاكێ تیرۆریستی ژ ڤێ قۆناغێ و دەربازبوون ژ ڤی ئاستی و گەهشتن ب ئاستێن بلندتر، ئانكۆ ئێگۆ و سوپەر ئێگۆی، پێدڤی ب هندێ یە لدەستپێكێ ئەوی ویست و ئارەزوویا خۆ گۆهۆڕینێ لنك پەیدا ببیتن و پشتی هنگێ جڤاك ب هەمی دەزگەهێن خۆڤە هاریكارییا وی بكەن بۆ قۆرتالبوونا وی ژ قەید و بەندێن ڤی پشكا ئاست نزم ژ تۆپۆلۆژیایا سایكۆلۆژیایا كەساتیێ، و ڤێ چەندێ ژی پێدڤی ب پلانێن هەمە لایەنە و درێژماوەیە، كە ئێكەم قۆناغا وێ ژ خۆدێ وی دەست پێدكەتن.
• ئەڤ بابەتە یا ل رۆژناما ( وار ) هاتیە بەلاڤكرن ل ژمارە (1354 ) ڕێكەفتی (1 2/6 /2015) ل( 6 ).