سایكۆلۆژیایا جڤاكی پویتەی ب بابەتێ جەنگێ سایكۆلۆژی ددەتن وەك ئێك ژ بابەتێن زێندی یێن جەنگی ل ئەڤرۆكە و سەردەمێن كەڤن دا. هەر قۆناغەك ژ قۆناغێن نەتەوە و وەلاتێن جۆداجۆدا شێوازێن جیاوازێن بۆ زالبوون بسەر یێ بەرامبەری خۆ دا بكار ئینای كە ئێك ژ وان شێوازان شەڕێ دەروونی بوویە كە نەوەك جەنگێن دیتر ب تۆپ و تفەنگ و گۆللە و تیر و كەوانان دهێتەكرن، بەلكۆ فرت و فێل و گۆتگۆتك و ئاخفتن و چیرۆكەكا درەوین و نووچەیەك خەلەت و راگەهاندنەك چەواشەكری ڤی كاری دكەتن و گۆڕەپانا وێ ژی نە ئاخا دوژمنی یە بەلكۆ دل و دەروون و كەساتیا تاكێ جڤاكێ و خەلكێ سیڤیل و سەربازن كە دكەڤیتە بەر ئارمانجا ڤان كەرستە و ڕێكێن جەنگێ دەروونی.
هەرچەندە رۆسی جەنگێ دەروونی ب هەر كارەك سیاسی یان سایكۆلۆژی كە بۆ مەرەما هەڕفاندنا مۆرالا دوژمنی و بێهێزكرنا وی د جەنگی دا و نەچاركرنا وی بۆ تەسلیم بوونێ و دەركەفتن ژ بەرەی جەنگی، ددەنە پێناسەكرن، لێ د ڤان جۆرە جەنگێن دەروونی دا شێوازێن لەشگەری، ئابووری، ئایینی ژی دهێنە بكار ئینان و ئەڤ چەندە گرێدایە ب سروشتێ دوژمنی ڤە كە ئایا دێ شێتن لدویڤ كیژ شێوازی مەزنترین كارتێكرنێ د وێ جڤاكێ دا بكەن و ئەو جڤاكە خۆدان كیژ خالا لاوازیێ یە هەتاكۆ بشێن د وی دەرگەهی دا بهێنە ژۆر و بسەر وی دا زال ببن. وەك دیارە شێواز هەر چەوا بیتن گرنگ ئەوە كە مەبەستا سەرەكی یا هەر جەنگەكێ دەروونی كارتێكرنە لسەر مۆرالا جڤاكا سیڤیل و پێشمەرگەی و هێزا لەشگەرییا وێ جڤاكێ و لاوازكرنا وان و دروستكرنا هەست و هزرێن نەرینی و خراب و شاش بەرامبەری خۆدێ خۆ و هێزا دەستهەلاتدار و لەشگەری و دروستكرنا جۆرەكێ سەقایێ بێ باوەریێ و نەمانا هەستا نەتەوەیی و نیشتمانی بەرامبەری دۆزا رەوایا خۆ و نەتەویا خۆ و لدۆماهێكێ ژی گۆهۆڕینا رەفتارێن مرۆڤی بەرڤ نارەزایی دەربڕین یان ڕەڤین و سستی و خاڤی د بەرگریكرن ژ خۆ و جڤاك و ئاخ و نیشتمانێ خۆیە.
بەلاڤكرنا زانیارییەكا نەراست ژ كاودانێن ئابووری، لەشگری، سیاسی، ئایینیێ جڤاكەكێ، ڤەگێڕانا چیرۆكەكا درەوین لدۆر كەسەكی یان سەركردەیەكی، بەلاڤكرنا سەرهاتیەكا بێ بنەما لۆر كەسەكی و بێبەختیكرن ل وی، هنارتنا هندەك كەسێن كرێ گرتی بۆ ناڤ جڤاكێ بۆ بەلاڤكرنا وێنەیێن گرێدای ب چالاكیێن دوژمنی دناڤ خەلكێدا، بەلاڤكرنا ترس و پرس و بەرهەلایێ دناڤ جڤاكێدا، ب هەر شێوازەكێ زارەكی یان بڕێكا ئەنترنێتی یان مۆبایلێ یان هەر دەزگەهەك و كەنالەكێ بیتن، پشكەكە ژ سەدان شێوازێن جەنگێ سایكۆلۆژیێ كۆ دوژمن دگەل لایەنێ بەرامبەر دا بكار دئینیتن دا بشێتن مەزنترین زیانێ بگەهینیتە هزر و مێنتالیتە و هەست و سۆز و بیروباوەرێن وان و ڕێكێ بۆ سەركەفتنێن لەشگەری خۆش بكەتن.
د بەرنگاربوونا جەنگێ سایكۆلۆژی ژی پێشمەرگە یان كارمەندەكێ ئاسایشێ بتنێ نەشێتن چارەسەركەر بیت بەلكۆ یا فەرە هەر تاكەك د جڤاكێدا، بێی جیاوازییا رەگەزی و ژی و ئایین و مەزهەب و پیشە و پلە و پایەیا جڤاكی و سیاسی و ئایینی، خۆ بەرامبەر پاراستنا ئاسایشا كوردستانێ ب بەرپرسیار بزانیتن و دگەل دیتن یان هەستپێكرن ب شێوازەك ژ شێوازێن جەنگێ سایكۆلۆژی بزویترین دەم ئاگەهداری لایەنێن پەیوەندار بكەتن، داكۆ دویڤدا چۆنا راستی یان نەراستیا بابەتی بهێتەكرن یان ئەو كەسێ پێڕادبیتن بهێتەكرن و ڕێكارێن پێدڤی بهێتەكرن و بزاڤ بۆ چارەسەركرن و نەهێلان یان لاوازكرنا زیانێن وێ بهێتەدان. دەزگەهێن راگەهاندنێ مەزنترین چەپەرێن بهێزن كە دشێتن بڕێكا بەلاڤكرنا زانیاریێن دروست بەرسڤا چەواشەكارییا دوژمنی بدەتن و هەول و بزاڤێن وان بۆ دلساركرنا جڤاكێ و تاك و پێشمەرگەی پوچەل بكەتن. هەبوونا لیژنەیەكا بسپۆر و شەهرەزایان بۆ ڤێ چەندێ گەلەك گرنگە بۆ هندێ لدەمێ بەلاڤبوونا هەر شێوازەك ژ شێوازێن شەرێ دەروونی بزاڤێ بكەتن خەلكێ د راستیا بابەتی بگەهینیتن و نەهێلیتن ئاستێ باوەری بخۆ بوونێ لنك پێشمەرگەی و هەر تاكەكێ جڤاكا كوردستانێ بهێتە خوارێ و زیانێ بگەهینیتە بەرژەوەندیێن كورد و كوردستانیان.
• ئەڤ بابەتە یا ل رۆژناما ( ئەڤرۆ ) هاتیە بەلاڤكرن ل ژمارە (1685 ) ڕێكەفتی (12/7 /2015) ل(13).