پشتی بانگێشتكرنا وەلاتێن ئێكگرتیێن ئەمریكا یاكۆ ئاراستەی سەرۆكێ هەرێما كوردستانێ هاتیەكرن و ئەو ژی بۆ مەبەستا رۆینشتن دگەل كاربدەستێن ڤی وەلاتی، خالەكا وەرچەرخان د سایكۆلۆژیایا سەركرداتیا ئەمریكی دا دهێتە هەستپێكرن كە ئەو ژی گەهشتن ب وێ باوەرێ یە كە ئەو وەلاتێ بناڤ عێراق یاكۆ ل چارێكا ئێكەما سەدێ بیستێ و برەزامەندییا بەریتانیا و چەند وەلاتێن دیترێن ئەورۆپی هاتیە دەیناندن، یا لسەر بنیاتەكێ خەلەت و خاڤ هاتیە ئاڤاكرن، و بەلگە ژی بۆ ڤێ چەندێ ئەزموونا ڤی وەلاتییە هەر ژ دەستپێكا دەیناندنا وێ و هەتا نۆكە ژی هیچ جۆرە ڤەحەویانەك ڤێ نەكەفتیە و بەردەوام یا د ئاگرێ ململانێ و جەنگ و چەندەها جۆرێن كێشەیێن دەرەكی و نافخۆییدا سۆتی.
ئەڤرۆكە و پشتی نێزیكی هەشتێ سالان ژ هنگی وەرە وەلاتێن وەكی ئەمریكا هزرێ د هندێ دا دكەت كە یا فەرە ئەڤ وەلاتە سەر ژ نوی بهێتە ئاڤاكرن و دبیتن ئێك ژ گرنگترین قۆناغێن ڤێ پرۆژەی ئاڤاكرنا دەولەتا كوردی بیت كە گەهشتن ب وێ قۆناغێ چەندین ئاستەنگێن مەزن دكەڤنە د ڕێكا وێ دا، كە یا ژ هەمیا مەزنتر هەبوونا كۆمەكا بۆهایێن شۆڤینی و خۆپەرێستانەیە كە یێن لنك دوژمنێن كوردستانیان هەی.
بۆهایێن شۆڤینیێن وەكی حەزا زالبوون بسەر كورد و كوردستانیان، نەڤیانا ژبەرئێكچۆنا ( وەتەن عەرەبی) یان عێراقا عەرەبی، هەستا خۆ ب مەزنتر زانین ژ كورد و كوردستانیان لنك حكۆمەتا ناڤندی، هزرا د خزمەتا عەرەب و عەرەباتیێ دا بوونا كوردان و نەتەوێن كوردستانێ، هزرا بمنەت زانینا ئیسلامكرنا كوردستانیان و بێی هندێ كە بیرا وان بیتن ئەڤ ئاینێ پیرۆز بێی جیاوازی یا بۆ هەمی مرۆڤایەتیێ هاتیە خوارێ و نەك تنێ یا عەرەبانە، بۆهایێن دیكتاتۆرخوازیێ، بۆهایێ دەیناندنا بەرژەوەندیێن خۆ بەری یێن خەلكا دیتر و بەلكۆ ژی گۆهنەدان ب وان، ڤیانا خۆسەپاندن لسەر كوردستانیان، كە هندەك جاران و ل گەلەك قۆناغان و نەخاسمە لسەردەمێ دەستهەلاتا دیكتاتۆریەتا بەعس و سەدامێ گۆڕ ب گۆڕ خۆ د نكۆلی لێكرن ژ بوونا كوردان و بەلكۆ ژی ب عەرەب زانینا وان و حاشا لێكرن ژ رەسەناتی و سەربخۆبوونا وان یا نەتەوەیی و .. هتد، كۆمەكن ژ وان بۆهایێن شۆڤینینە كۆ بكویری جهێ خۆ د ڕه و ڕیشالێن ستراكتوورێ كەساتیا تاكێ دەستهەلاتدارێن حكومەتا ناڤندی دا ڤەكرین و مێنتالیتەیەكا شۆڤینی و دیكتاتۆریانە ژێ دروستكری كە هەمی دەمەكی دژی بۆهایێن رەسەن و پیرۆز و جوان و مرۆڤدۆستانە و ئازادیخوازی و تێهنیێ دانپێدانا جڤاكییا خەلك و نەتەوەیێن دیتر بۆ كورد و كوردستانیان و گەلەك بۆهایێن دیترێن گەلێ مە ڕوستیای و نەهێلای دارێ ڤان بۆهایا سەرێ خۆ هەلبدەت و بێهنا خۆ بخۆشی و ئازادی هەلكێشیتن. یتەیا هشك و دۆگماتی دەها كارەسات و تاوانێن مەزنن ل دژی كورد و كوردستانیان كە دۆماهیك تاوانا هەرە مەزن ژی نەمەردییا ڕێكخراوا تیرۆریستانەیا داعشێ بوو كە د بنەڕەتدا رەنگڤەدانا سیاسەت و پرۆژەیێن شۆڤینیێن دەڤەرێ بوویە، كە دژی كوردستانیان هاتە پیادەكرن و هزاران قۆربانی و شەهید لدویڤ خۆ هێلان. ئەڤ مێنتالیتەیا شۆڤینی و دژایەتیكرنا بۆهایێن مرۆڤدۆستانەیێن كوردەواری بوونە بنیاتێ ژبەرئێكچۆنا دیوارێن حكومەتا ناڤندی و ڕزین و خراب بوونا وێ و هزركرن د سەرژنوی ئاڤاكرنا وێ لسەر هندەك بۆهایێن سەردەمیانە كە بگۆنجن دگەل جیهانا هەڤچەرخ و دیمۆكراتیك.
• ئەڤ بابەتە یا ل رۆژناما ( ئەڤرۆ ) هاتیە بەلاڤكرن ل ژمارە (1659 ) ڕێكەفتی (4/6/2015) ل(13 ).