ل دەڤەرێ دوو كێشەیێن هەرە مەزن یێن هەین كە گەلەك جاران كورد ژی تێكەفتیە و سەرباری هندێ زیان یا ژ كوردبوونا خۆ دیتی، پترتر ژی زیان یا ژ گەرمییا ڤان دوو ئاریشەیان دیتی و نەخاسمە ئێك ژ وان. ئێك ژ ڤان دوو ئاریشەیان كێشەیا دناڤبەرا شێعە و سۆننەیان كە دیرۆكا وێ بۆ دەمەكێ دویرودرێژ و پترتری هزرا سالان دزڤڕیتن و ئاریشەیا دیتر ژی ئەوە یاكۆ دناڤبەرا عەرەب و جۆهیا هەی و ژ سالێن چلان وەرە یا گەهشتیە بلندترین ئاستێ خۆ و چەندین جەنگێن خویناوی ژێ دروست بووین.
هندەك جاران مە كوردان یا ڤیای خۆ د ڤان جۆرە ئاریشەیا هەلقۆرتینین و نەخاسمە ژی هندەك جاران ئەكادیمی و رۆشنبیرێن مە بێدەستی یا ڤیای پشتا لایەنەك ژ ڤان لایەنان بگرن، بێی هندێ هزرێ د هندێدا بكەن كە ئەڤ چەندە دێ كاریگەرییا خراب لسەر كەساتیا كوردی كەتن.
ئەڤرۆكە رەنگڤەدانا ململانێیا شێعە و سۆننەیا خۆ د ململانێیا عەرەبێن سۆننە و توركان و دگەل بەرەیێ شێعە كە نوێنەراتیا وان عەرەبێن شێعە و فارسێن ئیرانێ دكەن، دا دبینیتن. مە لڤێرێ نەڤێتن پشتا هیچ ژ ڤان لایەنان بگرین، چونكی كێشەیا كوردی و كوردستانیان بابەتەك جۆدایە ژ هەر دوو ڤان لایەنان، هەرچەندە مە كوردان گەلەك قۆربانیێن د ڤێ ململانێدا داین، بێی هندێ مە بڤێتن بسەلمینین كە كیژ لایەن ژ وان راستە و حەقە و كیژ نەحەق و خەلەت. كارتێكرنا هندەك نڤیسەرا و لبن كارتێكرنا كەلتوورێ عەرەبێن سۆننە هندەك جاران یا ڤیای گەلەك سالۆخەتێن خراب بدەنە پال ڤی یان یێ دیتر، و ئەڤ هەمی هیچ دەردەكی دەرمان ناكەتن و تنێ بەرپێیێن مە خلۆلە دكەتن دا بكەڤینە د داڤێن ململانێیا شێعە و سۆننەیاندا.
ژلایەك دیتر ڤە كێشەیا عەرەبی-جۆهیانە، كە مە لڤێرێ نەڤێتن ئاماژەی ب هندێ بدەین و پشتا هندەكان بگرین و بێژین ئایا جۆهی لسەر هەقن كە كەڤنترن و خۆدانێ فەلەستینێ نە چونكی پشتی كۆ موسا ( س ) پەیامبەرێ جۆهیان نەتەوەیێ خۆ ژ دەستێ زۆردارییا فیرعەونی قۆرتالكرین و خۆدایێ مەزن ئەڤ وەلاتە ب دیاری دایە وان دا تێدا ب ئارامی و تەناهی و خۆشی بژین یان بێژین كۆ ئەرەبێن بیابانی لدەمێ كۆچەراتا هاتووچۆیا فەلەستینێ دكرن و ئایا كیژ بەری كێ خۆدانێ وی وەلاتی بوویە، هیچ مفایەكی ناگەهینیتن، و نەخاسمە هندەك ئەكادیمی و رەوشنبیرێن كوردستانێ هندەك جاران د پەرتووكێن زانستیێن قوتابیان دا و دگۆتنا دیرۆكا ئیسلامێ ناڤێ هندەك كەسێن جۆهی وەك كەسێن بەلبەلكەر و ئاژاوەگێڕ كە دناڤبەرا مۆسلماناندا ناكۆكیێ و نەتەباییێ دروست دكەن، ددەنە زانین، و ئەڤە زیانەكا مەزنە ل كەساتیا تاكێ كوردی دهێتە دان، و نەخاسمە هەكەر ئەڤ پەرتووكە هندەك ژ وان ژێدەران بن یێن كۆ قوتابی وەك ژێدەرێ زانستی پشتا خۆ پێڤەگرێددەتن و كەساتیا وی لسەر بنەمایێ ڤان ژێدەران دهێتە ئاڤاكرن.
چ گۆمان تێدا نینە ئەڤ ژێدەرە كارتێكرنێ لسەر هزروبیروباوەرێن خواندەڤانان دكەت و ژ ڤێ چەندێ یە كە د دەیناندنا پرۆگرامێن خواندنێ یا فەرە ئەڤ چەندە لبەرچاڤ بهێتەگرتن و بۆ ئاڤاكرنا كەساتیا قوتابیەكێ كورد و بشێوازەكێ بێدەستی یان بدەست وی تێكەلی ڤان جۆرە ئاریشەیا بكەین كە ئایا فارس یان جۆهییا چ دگەل عەرەبان هەیە یان بەرۆڤاژی.
ئەم د ڤێ قۆناغا هەستیارا دیرۆكیدا پێدڤی ب كەساتیەكا كوردینە كە ستراكتوورەكێ جڤاكیێ وەسا هەبیتن ل شوینا هزركرن د ئاریشەیێن خەلكا دیتر و بەرژەوەندیێن وان، دەمەكی د خەما خۆ و نەتەوەیێ خۆ دا بیتن و ل بیرا وی بیتن هەكەر خەلكا دیتر بۆ مە چ قەنجی نەكریە و بەلكۆ زیان ژی ل مە داینە، بەلێ ئەم دێ وەسا بین كۆ وەكی باب و باپیرێن مە گۆتی:" هەكەر گۆڵ نەبیت دڕكیش مەبە"، بەلێ ئەزموونا كەساتی و دیرۆكیا مە نیشان ددەتن كە كورد هەم گۆلە و هەم ژی نابیتە دڕك و ستری و د چاڤێ كەسێ ڕاناچیتن، تنێ ئەو كەس نەبن یێ بەلا خۆ ژێ ڤەنەكت و نەخۆشیان بۆ دروست بكەتن. ئەم هەمی دەمەكی ژێدەرێ دلۆڤانیێ بووینە دگەل گەل و نەتەوەیێن دیتر و هەكەر بدرێژاهیا دیرۆكێ مە غەدر ل كەسێ كربیتن ژی خەلكێ یا ب مە دایەكرن، بەلێ جارەكا دیتر ئەم نابینە ئالاڤەك د دەستێن كەسێدا دا زۆرداریێ ل گەل و نەتەوەیەك دیتر بكەین چونكی مە باوەرییا ب بۆهایێن دیمۆكراسی و یەكسانی و دادپەروەری و جیاوازیێن نەتەوەیی و تاكی هەی.
• ئەڤ بابەتە یا ل رۆژناما ( وار ) هاتیە بەلاڤكرن ل ژمارە ( 1334 ) ڕێكەفتی ( 24 /5 /2015) ل( 6).