دلپیسیی لسەر ئاستێ خێزانی و تاكی ئێكە ژ گیروگرفت و ئاریشەیێن سایكۆلۆژی كە دوژمنێ پەیوەندیێن ئەلەمێنتێن سەرەكیێن خێزانێیە و بەردەوامییا وێ لجەم هەر ئێك ژ ڤان دوو كەسان هەكەر لسەر هیچ بنەمایەكێ ڕاستەقینە نەبیتن د ماوەیەكێ درێژ دا زیانەكا مەزن ل خێزانێ بگشتی و زارۆكان ب تایبەتی ددەتن و خێزانێ بەرەڤـ ئاقارەكێ نەدیار و هەلدێرێ هاژۆتن. پشكەكا مەزن ژ ئەگەرێ سەرهلدانا وێ لجەم تاكی، چ ژن بیتن و چ زەلام، ژ پەروەردەیەكا خەلەت دناڤـ خێزانێدا یان لبن كارتێكرنا دەیك و بابەكێ نەتێگەهشتی كە دبنەڕەتدا ئەڤـ جۆرە رەفتارە یێن لجەم وان هەین سەرێ خۆ هەلددەتن. هەلبەت ئەزموونا رابردوویا هەر ئێك یان هەر دووك ڤان كەسا ژی بێ بەهر نینە د دروستكرنا ڤێ چەندێ لجەم تاكێ بەرامبەر.
ئەڤـ كێشەیە نەك تەنها لسەر ئاستێ تاكی و خێزانی، بەلكۆ لسەر ئاستێن مەزنتر و نەتەوەیی و سیاسی ژی ب ئاشكرایی دهێتە تێبینیكرن. نموونەیا هەرە دیارا وێ ل دەڤەرێ دلپیسییا نەتەوەیێن دەردۆرێن كوردانە ل هەمبەر نەتەوەیێ كوردی و مافێن ڕەوایێن كوردستانیانە. بۆ ماوەیێ چەندەها سەد سالانە نەتەوەیێ كوردی بدەست جۆرەها زۆرداری و ستەمێن بچویك و مەزن دبیتن لسەر دەستێ وەلاتێن دەوروبەر، كە ئەگەرێ وێ ژی تەنها كوردبوونا مەیە، كە ڤان وەلاتا نەڤێتن دان ب مافێن ڕەوایێن مە و كەلتوور و فەرهەنگ و زمان و بوونا مە بدەتن و ژ پێخەمەت بەرژەوەندیێن بێ بنەمایێن ئابووری و سیاسی و كەلتووری هەمی بزاڤەكێ دكەن تاكۆ ببنە بەربەستەك لبەردەم گەهشتن ب هیوا و ئارمانجێن خۆ. ئەڤـ دلپیسییا ئەڤ وەلات و نەتەوەیە، وەكی ژانەكا دەروونی، تێكەفتین و ژ ئەگەرێ هەمی جۆرێن دژایەتیكرنێ و دوژمنكاریێ بەرامبەر نەتەوەیێ مە بۆ خۆ ب ڕەوا دبینن، هەكەر چی ئەگەرێن جیاوازێن رامیاری و ئابووری و ئایدیۆلۆژیكی یێن لپشتێ، لێ د هەمان دەمدا بۆ تێگەهشتن و تێگەهاندنەكا خەلەت ژ نەتەوەیێ مە و بنیات و ستراكچەرێ تاكی و جڤاكی و بۆها ئاراستەیێن وێ دزڤڕیتن كە پشكەك ژ ڤێ خەلەت تێگەهشتنێ بۆ وێ پەروەردیا خەلەتە كە هندەك كەس و لایەن و پارت و ڕێكخراو و دەزگەهێن ڕاگەهاندنێ و بۆ مەرەمێن سیاسی پێ ڕادبن و بڤی ڕەنگی تاكێن جڤاكێن خۆ ب ئاڤا ڕەشا دلپیسیێ ئاڤددەن و وان لسەر بنیاتەكێ خەلەت پەروەردە دكەن و پێدگەهینن كە ل دەمێن جیاواز دا و نەخاسمە ژی گاڤا دەستهەلات دكەڤیتە د دەستێن ئێك ژ ڤان تاكا دا رەفتارێن وی لسەر ئاستێ مەزن و سیاسی بەرامبەر ئەوێن دیترێن دژی نەتەوەیێ مەنە و هەمان خەلەتی و دلپیسیێ دووبارە دكەن یاكۆ ئەوێن پێشی وان ئەنجامداین.
پەروەردەیەكا ڕاستەقینە و دگەلدا ژی تێگەهشتن ژ رەوایەتییا مافێن گەلێ مە و ئارمانجێن رەوا و كەلتوور و فەرهەنگ و بۆهایێن جڤاكا مە یا كوردەواری لجەم تاكێن ڤان وەلات و نەتەوەیا، و دەستهەلگرتن ژ هندەك یان گەلەك بەرژەوەندیێن تایبەت و هزركرن د بەرژەوەندیێن گشتی و دەڤەرێ جیهانی، و داننان ب مافێن ڕەوایێن گەلێ كورد، ئەو چارەسەرینە یێن كۆ ئەڤ وەلاتە دشێن شوینوارێن ڤێ دلپیسیێ و دلڕەشیێ ژناڤ خۆ و ژ دل و دەروونێ تاكێن خۆ پاقژ بكەن و نەهێلن نەتەوەیێ كوردی و جیهان ژی ب ئاگرێ دلپیسییا وان بسۆژیتن.
• ئەڤ بابەتە یا ل رۆژناما ( ئەڤرۆ ) هاتیە بەلاڤكرن ل ژمارە (1664) ڕێكەفتی (15/6/2015) ل(13 ).