مە رۆژانە گۆه لێ دبیتن كۆ دەمێ پێشمەرگە لاشەیێن تیرۆریستان ل گۆڕەپانێن جەنگی دبینن ئاماژەی ب هندێ ددەن كە گەلەك ژ وان دەرمانێن بێهۆشكەر یێن بكار ئینای. گەلەك جاران ئەم ب خەلەتیڤە وەسا تێدگەهین كۆ ئەو ڤێ چەندێ دكەن و ڤان دەرمانان بكار دئینن چونكی داكۆ بڤی رەنگی نەترسن و ژ بەرۆكێن شەڕی نەڕەڤن. بەلێ ڤەكۆلین و ژێدەرێن زانستی و نەخاسمە یێن گرێدای ب ساۆكۆلۆژیایا پزیشكی بەرۆڤاژی ڤێ چەندێ دسەلمینن و نیشان ددەن. ئەڤ ڤەكۆلینە ڤێ ڕاستیێ نیشان ددەن كۆ گەلەك ژ ڤان دەرمانان ژ جۆرێن ئەكتیڤكەرێن دەروونی ( psychoactive drugs ) نە و كارتێكرنەكا مەزن لسەر لایەنێ مێنتالی ( ئەقلی ) مرۆڤی دكەن و مرۆڤی پترتر بەرەڤ تووندوتیژیێ پالددەن. ئەڤ ڤەكۆلینە نیشان ددەن كۆ ڕێژەیا پەنا برنە بەر تووندوتیژیێ لنك وان كەسێن ڤان جۆرە دەرمانان بكار دئینن چار جاران پترترە ژ كەسێن ئاسایی.
ئەڤ چەندە ڤێ ڕاستیێ ئاشكرا دكەتن كۆ رێكخراوێن تیرۆریستی ب وی ئاستێ ئاساییا تووندوتیژیێ یاكۆ ئەندامێن هۆڤ و دڕندانەیێن وان رۆژانە دگەل خەلك و بچویك و كەسێن سیڤیل و پێشمەرگەهی بكار دئینن، رازی نینە و بڕێكا بكارئینانا ڤان دەرمانێن بێهۆشكەر دڤێتن وان هندێ دیتر دڕندە و هۆڤ بكەن و ژ ڕێكا ئاسایی بوونێ لابدەن، و هەر ئەڤەیە كۆ ئەم دبینین ئەڤ مرۆڤێن وەك گیانەوەرێن دڕندە، بێی هیچ دلسۆزی و سۆزدارییەكێ، دڕندانەترین رەفتاران دژی هەر كەسەكێ بكەڤیتە د ڕێكا واندا بكار دئینن.
ژێدەر : [ 1 ] ابراهیم، ماجد موریس ( 2005 ). الإرهاب الڤاهرە و أبعادها النفسیە، گ. (1). دار الفارابی، بیروت، لبنان، (509)ص.
• ئەڤ بابەتە یا ل رۆژناما ( وار ) هاتیە بەلاڤكرن ل ژمارە (3134 ) ڕێكەفتی ( 4/6 /2015) ل( 6).