ئاسایشا سایكۆلۆژی وەك پێناسە بریتیە ژ هەستكرنا تاكی ب ئارامی و تەناهییا دەروونی بێی كارتێكرنا هیچ فاكتەر و گڤاشتنەكا دەرەكی كە مەترسیێ لسەر ڤێ تەناهیێ بكەت. و وەك ژ ڤێ پێناسە و پێناسەیێن هاوشێوە دیار دبیت فاكتەرێن دەرەكی رۆل و كارتێكرنەكا بەرچاڤ دگێڕن د دابینكرن و مسۆگەركرنا ئاسایشا دەروونی. ئەڤ فاكتەر و بناسێن دەرەكی دبیت فاكتەرێن مرۆڤی و جڤاكی بن یان ژی فیزیكی و كۆنكرێت بن. فاكتەرێ مرۆڤی وەك چەوا هەبوونا دوژمن و نەیار و گرووپ و لایەنێن دژایەتیكەر گرنگن د تێكدان و شەپرزەكرنا جڤاكێ بگشتی و سایكۆلۆژیایا تاكی نەخاسمە، هند ژی فاكتەرێن مادی و كۆنكرێت د كارتێكەرن د دروستكرن یان تێكدانا ئارامی و ئاسایشا دەروونی.
ئێك ژ وان فاكتەرێن كۆنكرێت كە گەلەك گرنگە د بەرهەڤییا تاكێن جڤاكێ ژ ئالیێ ئاسایشا دەروونیڤە لایەنێ ئابووری و نەخاسمە ژی كشتۆكالییە. كوردستان وەك جهەك جیۆپۆلیتیك ژبلی كۆ ژ لایەنێ پەترۆلێڤە گەلەك زەنگینە، ب هەمان ئەندازە ژی ئاڤ و خاك د ژیانا جڤاكێ بگشتی و دیمۆگرافیایا وێ دا كارتێكەرە، و دبیتن پشكەكا مەزن ژ وێ زۆردارییا ل كوردستانیان دهێتەكرن بۆ ڤان سێ تەخێن زێڕین، ئانكۆ: ئاڤ، ئاخ و پەترۆلا وێ بزڤڕیت.
لایەنێ كشتۆكالییا كوردستانیان هەمی دەمەكی بارەكێ مەزن ژ ئاسایشا سایكۆلۆژیایا تاكێ ڤی جهی یا هەلگرتی، لێ ئەڤ لایەنە پشتی دەستهەلاتا ڕژێما گۆڕ ب گۆڕا بەعسا فاشی و تێكدانا پترتر ژ ( 4500 ) گۆند و باژێڕۆكێن وێ و هەروەسا پشتی ڕاپەرینا گەلێ مە و سەرهلدانا جەنگێن نافخۆیی و زالبوونا سیستەمێ مووچەی قۆناغەك خراب دەستپێكر، و كار گەهشتە هندێ كە ئەو چەند خەلكا ل گۆندان ژی دژیان بەرێ خۆ بدەنە باژێڕان یان ژی بەهرا پترتریا وان دەست ژ كارێ كشتوكالیێ بەردەن و ئەڤە مەزنترین گۆرزێ كۆژەك بوویە ل ستراكتوورێ ئاسایشا سایكۆلۆژیایا كوردستانیان و ئەڤ ڕاستیە هنگی بەرجستە و بارز بوو كە لڤان سالێن دۆماهیكێ حكومەتا ناوەندی جەنگەكێ ئابووری-سایكۆلۆژی ل دژی كوردستانیان ڕاگەهاند و پیادەكر و ئاستێ ڤێ نەئارامیێ و نەبوونا ئاسایشا سایكۆلۆژی هندێ دیتر بلندتر بوو. هەرچەندە كۆ ئەڤە ئەزموونەك تەحل و دژوار بوو و دیار بوو كۆ مووچە نەهەمی تشتەكە و ئەگەر ئەم وەكی جاران نەزڤڕینە سەر لایەنێ كشتوكالی و ئاستێ ئاسایشا خۆراكییا كوردستانێ بلند نەكەین هەمیشە دێ ئاسایشا سایكۆلۆژییا تاكێ كوردستانێ دبن مەترسی و گەفێن دوژمناندا بیت، و ئەڤ چەندە لسەر دەمێن جۆداجۆدا یا دژی كوردستانیان هاتیە جێبەجێكرن و مە ئەزموونەكا بێ وێنەیا د ڤی بواریدا هەی و نەخاسمە دگەل رژێما بەعسی دەمێ ڤیای ب هەمی شیانڤە ڕه و ریشالێن ڤی لایەنێ گرنگ ل كوردستانێ هشك بكەتن چونكی ب باوەرا وێ ستونەكێ خۆڕاگرییا نەتەوەیێ كورد د سەردەمێن جیاواز دا بوویە.
پشتی وان ئاستەنگێن حكومەتا ناوەندی د سیاسەتا خۆ بەرامبەر پەترۆل و مووچەیێ هەرێما كوردستانێدا دروستكرین و پشتی وی جەنگێ نەخوازرایێ تیرۆریستێن داعش بسەر مە دا سەپاندی، بڕیارا قەدەغەكرنا ئینانا هندەك بەرهەمێن كشتوكالی و گیانەوەرێن وەك مریشكا ژ دەرڤەی كوردستانێ ئێكە ژ وان پێنگاڤێن مەزن بوویە كە حكومەتا هەرێما كوردستانێ بۆ زڤڕاندنا پرستیژا كشتوكالی ل كوردستانێ و ئاسایشا خۆراكی و لدویڤدا ژی ئاسایشا سایكۆلۆژیایا هەڕفتیا كوردستانیان دای. چونكی ئەڤ هەر دوو جۆرێن ئاسایشێ پێكڤە گرێداینە و هەكەر پلانێن درێژخایەن بۆ بهێنە داڕشتن بێگۆمان نەك تەنها مسۆگەركەرێ ئاسایشا سایكۆلۆژییا تاكێ ئەڤرۆكەیە، بەلكۆ دەستگرتنەكە بۆ نڤشێن ئاییندە، یێن كۆ بێگۆمان، وان ژی بەهر یا د هەمی خێر و بێرا ڤێ كوردستانێدا هەی.
• ئەڤ بابەتە یا ل رۆژناما ( ئەڤرۆ ) هاتیە بەلاڤكرن ل ژمارە(1656) ڕێكەفتی (1/6/2015) ل(13 ).