سووپەر ئیگۆ ( super ego ) یان ئەزێ بلند ئێكە ژ پێكهاتەیێن سایكۆلۆژیك لنك مرۆڤی و ئێكە ژ داهینانێن فرۆیدێ بەرنیاس د گۆڕەپانا دەروونناسیێدا. ئەزێ بلند هێمایێ بهایێن مرۆڤی و بلندترین ئاستێن داخوازیێن ڕەوایێن جڤاكینە. بگۆتنەك دیتر چەكێ رەوشتیێ مرۆڤی ئەزێ بلندە و دكەڤیتە جەمسەرێ دیتر ژ ئید ( Id ) كە دبنەڕەتدا تنێ بەس بەرەڤــ تام و چێژ وەرگرتن و خۆشیێ پێهنگاڤا دهاڤێژیتن. كانت، فەیلەسۆفێ مەزن، ژی وێ ب ئەقلێ پراكتیكی ددەتە نیاسین. ئەركێ منێ بلند دەستنیشانكرنا راستیێ یە ژ نەراستیێ و خەلەتیێ، و گۆنجان یان دژایەتیكرنا كارەكییە كە دگەل بنەما و پیڤەرێن رەوشتیێن كۆ دناڤ جڤاكێدا ناهێنە گۆنجان، و بزاڤكرنە بۆ هندێ كە بەرێ تاكی بدەتە هندێ رەفتارێن خۆ دگەل ڤان بنەما و پیڤەر و پرەنسیپا ڕێك بئێخیتن و بگۆنجینیتن تاكۆ ژ لایەنێ جڤاكێ ڤە بهێنە پەسندكرن و پەرژاندن. دەمێ كۆ ئەڤ چەندە رووی ددەتن و تاك هەست پێدكەتن كار و رەفتارا وی دگەل ڤان پیڤەرا دگۆنجیتن خۆشحال دبیتن و ئەڤە ب سەركەفتنەك لنك وی دهێتە هژمارتن، و بەرۆڤاژی دەمێ ئەڤ كار و رەفتارە و پیڤەرێن جڤاكی و رەوشتی دگەل هەڤ ناگۆنجن هەستەكا خراب بۆ وی تاكی دوروست دبیتن و تێدا هەست ب گۆنەهباریێ و شەرمساریێ دكەتن و بەردەوام خۆ ژ ڤێ چەندێ ڤە لۆمەهی دكەتن.
هندەك هكومەت و بۆ نموونە ئەو دیكتاتۆریەتا ماوەی نێزیكی ئێك سەدەیە دەستهەلاتێ ل كوردستانا مە دكەتن هەر ژ سەرەتایا دوروستبوونێ و هەتا نۆكە بەردەوام یا دژی سەرەتاییترین مافێن رەوایێن گەلێ مە ڕاوەستیای و بزاڤكری مە ژ وان مافان بێبەهر بكەتن و سەرباری وێ چەندێ ژ هەمی جۆرێن كریارێن دڕندانە و تووند و تێژیێ ژی دگەل مە یا بكار ئیناندی – جینۆساید، ئەنفال و كیمیا بارانكرن و وێرانكرنا هزاران گۆند باژێرێن كوردستانێ و .. هتد. چ گۆمان تێدا نینە ئەڤ هەمی كریارێن دڕندانە دژی هەمی بنەمایێن مرۆڤایەتی و ئایینانە و ژ ڤێ چەندێ یە كە بێگۆمان ئەو تاكێن بڤان كارێن نەمرۆڤایانە ڕابووین، بەردەوام یێن د بن هێڕشێن سووپەر ئیگۆیێ خۆ دا بووین، لێ عینادی و ڕكگرتنێ ( ئید ) ێ وان بسەر سووپەر ئیگۆیێ ب رەوشت و جڤاكدۆست و پیڤەرناسدا د ستراكچەرێ كەساتییا واندا زال بووی و نەهێلایە ئەڤ منێ بلند لنك وان بكارێ خۆ یێ سەرەكی ڕابیتن، و تەنها هنگی ئەوێن هاتینە سەر هۆشێن خۆ كە سروشتی تۆلا ڤان هەمی زۆرداری و ستەمگەریێ، ئەوا وان دگەل نەتەوەیێ مە دا كرین، ل وان ڤەكرین و ئەو گەهاندینە سزایێ خۆ. چونكی وەكی دبێژن " جیهان جهێ سزادانێ " یە. مە دیتن ڤان دەستهەلاتدارێن زۆردار، پشتی بەرۆڤاژی منێ خۆ یێ بلند لڤیاین و رەفتار كرین، چەوا لسەر دەستێ سروشتی ئێك لدویڤ ئێكی هاتنە سزادان و نەتەوەیێ كورد هێشتان یێ دمینیتن و دێ هەردەم مینیتن چونكی خۆدان كۆمەكا بهایێن جڤاكی و مرۆڤیە كە ئێك ژ وان وەلاتپارێز و مێرخاس و عەگیدن كە د جل و بەرگێن پێشمەرگەهیدا وەك هێزەكا پۆلاین دەستێ هەر زۆردارەكی د بنێ ڕا ژێڤەدكەن.
• ئەڤ بابەتە یا ل گۆڤارا (وار ) هاتیە بەلاڤكرن ل ژمارە ( 1228 ) ڕێكەفتی ( 8 / 12 /2014 ) لاپەرە ( 6 ).