سایكۆلۆژیایا پیشەسازی و ڕێكخستنی پویتەیەكا مەزن ددەتە بابەتێ كار و پیشەی. د بەندێ بیست و سێهەم ژ جاڕنامەیا جیهانییا مافێ مرۆڤیدا یا هاتی كە هەر كەسەكێ مافێ هەی كارەكی بۆ خۆ بكەتن و كارێ خۆ لدویڤ دلێ خۆ و ب ئازادی هەلبژێریتن و داخوازا مەرجێن گۆنجای و د ئاستەكێ رەزامەندییا خۆ دا بكەتن و ل دەمێ بێكاریێ دا پشتەڤانی لێبهێتە كرن و بهێتە خۆدانكرن. وەلاتێن پێشكەفتی و مۆدرێن پێشكەفتا خۆ ب بەرهەمێ كار و بزاڤ و شەونەخوونیا تاكێن خۆ دزانن. ژبلی لایەنێن پێشكەفتن و بلندكرنا ئاستێ ژیارا خێزانێ و جڤاكێ، كار دگەل ڤێ چەندێ دا جۆرەكا جێگیرییا ئارامی و ئاسایێشا سۆسیۆسایكۆلۆژیك لنك تاكی و جڤاكێ دوروست دكەتن. چونكی ئەو پێشكەفتنا بڕێكا كاری دهێتە گۆڕێ پشكەكە ژ وێ ئاسایێشا سایكۆلۆژی، چونكی بەرهەمێ كارێ تاكی و خزمەتا نەتەوەیی بۆ وی ڤێ ڕاستیێ نیشان ددەتن كە تەنها مرۆڤ چاڤەڕێی هندێ نەبیتن كە وەلاتێ وی و پارت و لایەنەك سیاسی بۆ وی چ دكەتن بەلكۆ یا گرنگ لنك وی ئەوە كا ئایا ئەوی بۆ ڤی نەتەوەی چ كرییە و چ مفا گەهاندییە گەلێ خۆ، و ئەڤ ئێكە ژ مەزنترین بهایێن مرۆڤایەتیێ و بەرهەمێ كارێ وییە. ب دەستكەفتێن ئابووریێن كاری تاك هەست ب جۆرەك دلخۆشیێ دكەتن ب هندێ كە دبیتە ژێدەرەكێ مادی بۆ پێشكەفتنا نەتەوە و جڤاكا خۆ بگشتی و خێزانا خۆ و كەسێن وێ بتایبەتی. ئەڤە ژ بلی هندێ كە خۆدێ كاركرنێ و خافلاندن و بۆراندنا دەمی و مژویلكرن ب ڕێڤەبرنا ئەركێ خۆ و خزمەتگەهاندن ب هندەك كەس و لایەنان جۆرەكێ سەرپێبوونا هزری و جڤاكی لنك تاكی دوروست دكەتن و دگەل هندێ ژی چەند قۆناغەكا ژ پرۆسێسا بدەستڤەئینانا خۆدێ خۆ لنك وی تەواودكەتن كە سایكۆلۆژیستێ ئەمریكایی ماسلوو ب دابینكرنا پێداویستیێن فیزیۆلۆژیك و بەراهیێ و لدویڤدا ژی لایەنێن دیترێن وەكی ئارامییا سایكۆلۆژیك و پەرژاندنا جڤاكی دهینیتن و وان بۆ مرۆڤی ب گرنگ و فەر دزانیتن.
لەوما دابینكرنا كاری ژ لایەنێ هكومەتێڤە گرنگە و ژ بیرا مە نەچیتن كە كار یێ بۆ ڤێ چەندێ هاتیە كرن تارادەیەكێ كە ل هندەك فەرمانگەهان زیاتر ژ ئاستێ خۆ فەرمابەرێن هاتینە دامەزراندن، لێ ئەڤە نەچارەسەرییا دۆماهیكە و پشكەكا مەزن ژ ڤی ئەركی و ڕەخساندنا كاری دمینیتە سەر ملێن زەنگینان، كە ل شوینا ڤەكرنا ماركێتێن مەزن و پاركا و وان پرۆژەیێن كە تاكێ كوردی فێری تەمبەلیێ و ژكاركەتنێ دكەتن، بلا پرۆژەیێن وەبەرهینەرێن بەرهەمهینەر ڤەكەن، و بڤێ چەندێ ڕحەك تازەتر بدەنە جەستەیێ ماندیێ تاكێ كوردی و كوردستانیان، و خەلك ژی بلا هەرچاڤ لهندێ نەبن دەستێ وان لبەر مووچەی یێ درێژكری بیتن. گەلەك كەسێن ل جڤاكا مە یێن هەین ل گۆندان خۆدان زەڤی و ئەردەكێ باشن و یێن هاتین و خۆ ب باژێڕی داداین ل دەمەكی نە فەرمانبەرە و نە كارەكی ل باژێڕی دكەتن، هەتاكۆ هندەك زارۆكێن خۆ ژی ناهنێرنە قوتابخانێ و بەس لسەر شارێن كوردستانێ بارگرانیێ دوروست دكەن، و دیارە هیچ كەسەك دویڤداچۆنا ڤی بابەتی ژی ناكەتن ڤان كەسا ژی یا خۆ ل گێلی دای و خۆ ب باژێڕی دزانیتن، ل دەمەكی كە هەكەر ل گۆندان بایە ژبلی تام و چێژا وێ و ساخلەمییا جەستەیی، دا بیتە ئەلەمێنتەكێ بەرهەمهینەر و ئاڤاكەر و بڤێ چەندێ ئارامی و ئاسایێشا سایكۆلۆژیكا خۆ مسۆگەرتر كەتن، و نەخاسمە كە ئەڤرۆكە نابەینا باژێڕی و گۆندا چ جیاوازییەك نەمایە.
• ئەڤبابەتە یا ل ڕۆژناما (ئەڤرۆ ) هاتیە بەلاڤكرن ژمارە (1776 ) ل ڕێكەفتی(6/12 /2015) ل. (13 ).