هاتنا ئاڵاڤێن وەك تۆڕێن ئەنتەرنێتێ وموبایلێ،وەك لایەنەكێ سەرەكی ژ دیاردەیا بجیهانی بوونێ، ئەڤ جیهانا مەزن یا كری گۆندەك بچویك كە سادەترین و دویرترین مرۆڤ تێدا دشێتن پەیوەندیێ ب كەسانێن خۆ بكەتن و دبیتن دماوەیێ ئایندەیی دا بڕێكا موبایلێ و هەیڤێن دەستكرد بزانیتن ئەو كەسە ل كیژمالێ و جەهدێ و ماركێتێ دایە، لێ ئایا ئەڤ (گۆندكرنا) جیهانێ و ئالاڤێن پەیوەندیكرنێ و پێكگەهشتنێ چەند هێمایێن كەتواریبوونا ڤێ هەلوێستێ و دەلیڤەینە؟ ئایا ئەو پێكگەهشتنە و پەیوەندییە وەك وێ پەیوەندیێ و پێكگەهشتنێ یەك تاك ب ساخی و ڕاستەوخۆ ڕووی ب ڕووی و ل دەڤ و لنك ئێك ڕادوەستن و هەڤپەیڤینێ دكەن؟ ئایا هەر ئێك ژمە هەست ناكەین كەس و كارێن مەو ئەم بخۆ زێدەگاڤیێ دپشتگرێدان بڤان ئالاڤا، رۆژ لدیڤ ڕۆژێ ژ ژیانا كەتواری و ڕاستەقینە دویردكەڤین و جۆرەكێ گۆشەگیری و دویرە پەرێزیێ بۆ خۆ دكەینە ڕێڕەوەیا ژیانێ؟هەرچەندە كە ئەڤ ئالاڤە ژ لایەنەكی بۆ مرۆڤایەتیێ(نەعمەت) و خێرو بێرەك مەزن بوویە، لێ دەهەمان دەم دا ژی، هەكەر لسەر ڤێ دەه و دۆێێ بچیتن، دێ لێ بیتە(نەقمە)تەك مەزن و وەكی بەلایەكێ وی ل تافەكێ دەتن، و وی تووشی زیانێن مەزن كەتن.
پشتگیری ژ ڤێ نەهامەتیێ و بەڵایێ یا پەیوەست و گرێدایە ب هندێڤە كە تاكێن جڤاكی َ بۆ كاركرن ومفا وەرگرتنا خۆ ژ وان ئالاڤا و نەخاسمە ژی مۆبایلا، كە ب سانەهی یا لبەردەستێ هەمی كەسەكێ هەی، پلانەك كارامە و بكارە دەینیتن و دڤێ پلانێ دا جهەك تایبەت بۆ هندەك بهایێن جڤاكی دانیتن، چونكی بەرۆڤاژی وێ دێ مرۆڤی تووشی ئێش و ئازارەك مەزن كەتن، وهنگی مفا نینە، باب و باپیرێن مە یا گۆتی ( هەتا مرۆڤ بسەری ڕێڤە نەچیتن قەدرێ پییا نزانیتن). ئەڤ ئالاڤە دناڤ جڤاكا مەدا تشتەك نوییە و پشتی ماوەیەك دیترو پشتی ڤەكۆلینێن زانستی لچەند سالێن داهاتی، دێ بۆمە دیاربیتن كە هەر ئێك ژ ڤان ئالاڤێن بجیهانیبوونێ چەند زیانێن سایكۆلۆژیك و جڤاكی و فیزیۆلۆژیێ یێن گەهاندینە مە و مە هێشتانێ ئاگەه ژێ نینە، و دبیتن ئەڤ ئێك بیتن ژ وان زیانێن زانست و پێشكەفتنێ بۆ مرۆڤایەتیێ و شارستانیەتێ ب دیاری ئینابیتن.
*بسپۆرێ پێداگۆگیا و سایكۆلۆژیێ / بەشێ دەروونزانیێ / زانینگەها زاخۆ