پشتی سەرەدانا فەرمی یا سەرۆك بارزانی بۆ توركیا و ئەو جۆرێ پێشوازییا گەرم یا كۆ ل وێرێ ژ وی هاتییە كرن، ل هندەك ئاژانسێن ڕاگەهاندنا ئیرانی دەست ب هەیاهۆیەكا مەزن كرو نەك تنێ ئەڤ سەرودانە نەنرخاند، بەلكو ژی ب هەمی ڕنگانژە بزاڤا كێمكرنا بهایێ وێ داو ئەڤ سەرەدانە ب مەبەستا پارچەكرنا سووریا و عیراقێ دا هژمارتن. یا فەرە بهێتە گۆتن ئەڤ مێنتالیتەیا سایكۆلۆژی یا كەساتیا ڤا جۆرە كەس و لایەنان لڤێ قۆناغا دیرۆكی و سەردەم جهێ سەیرێ و دگەل هندێ دا ژی جهێ داخێ یە.ئەم كورد چاڤەڕێی هندێ بووین بەری كۆ تۆرانی بڤی ڕەنگێ سەردەمیانەو لۆژیكی پێشوازیێ ل سەردانێن ژڤی بابەتی و بەلكۆ ژی ل ئاییندەدا دەولەتا كوردی بكەن، ئیرانیان ئەڤ بزاڤە كربایە، ژبەركۆ پێداچۆن ب دیرۆكێ نیشان ددەتن خالێن هەڤپشكێن هەردوو نەتەوەیێن كوردو فارسان گەلەك پترترن ژ هەمان ساخلەتداو دناڤبەرا كوردان و تۆرانیان. ژبلی كۆ بدرێژاهیا دیرۆكێ نەتەوەیێن ئاری و ل ئیرانی و كوردستانێ بەردەوام لبن گەڤێن تۆرانیان بووینە و چەندەها جەنگێن مەزن دناڤبەرا وادا ڕوویدانە، خودێ نەتەوەیێن كوردو فارس ل گەلەك قۆناغێن دیرۆكی هەڤدو گرتییەو بووینە پشكەك ژ زلهێزێن دەڤەرێ و جیهانێ.مێنتالیەتا تاكێ ئیرانی لبن كارتێكرنا فاكتەرێن دیترێن نەتەوەیی و نەژادی یا تووشی گرێ یەكا دەروونی ( Psychological complex)بووی كو سیبەرا ڕەشا خۆیا لسەر خالێن هەڤپشكێن دیرۆكی،نەژادی و جۆگرافیایی دا زال بووی. مە دخواست ئەڤ نەتەوەیێ ئاری بەری هەر كەس و نەتەوەو لایەن و وڵاتەكی دەستێ برایەتی و هاریكاریێ بۆ كورد و كوردستانیان درێژكربایە و پشتەڤانی ل مافێن ڕەوایێن وێ كربایە، نەك كەفتبایە سەنگەرێ دژایەتیكرنا خواست و داخوازیێن وان، هەكەر ئەم ناڤێ ڤێ گرێیا سایكۆلۆژی بكەینە(گرێیا پسمامی) دویرنینە ئارمانجا خۆ بپێكیتن و نەخاسمە ددیرۆكێ دا نممونەیێن وێ زۆرن، و دبیتن ئەڤ گرێ یە جۆرەك بیتن ژ (گرێ یا سایكۆلۆژیا برای) كۆ قوربانیێ وێ یێ ئێكەم لسەر ئەردی هابیل بی كو ب دەستێن قابیلی هاتە كوشتن، و پشتی هینگی بدرێژاهیا دیرۆكێ ل ناڤ شارستەنیەت و ئیمپراتۆرێن مەزن كو بۆ خۆ قورتالكرن ژ هەڤڕكێن خۆ دناڤ مالبات و كەس و كارێن خۆدا بزاڤا كری یان وان كۆرە و ئوجاخ كۆرە بكەتن یان بكوژیتن دا هەولا هندێ نەدەن جهێ وی بگرن. ڤێ گرێ یا دەروونی ب ڕەنگەك دیتر ژی خۆ نیشان دای و ئەو ژی ململانی و هەڤڕكی و جەنگێن دژوار و خویناوی بووینە دناڤبەرا تایفەو بنەمالێن جودایێن ناڤ ئێك نەژادی كو نموونەیێن هەرە دیارێن دەڤەرێ ژی ململانێ یا جۆهییاو ئەرەبانە كو ئێك ژ بەنی حام و یێ دیتر ژ بەرەبابێ بەنی سامینە، و هەروەسا ژی كوردو پارس(فارس) كو ژێدەرێن دیرۆكی وان دگەهیینە ئێك، و هەتا كۆ دیرۆك ژی ڤێ چەندێ نیشانددەتن و بەلگێ هەرە سەرەكی ژی زمانێ وانە كو هەڤپشكە یان هیچ نەبیتن گەلەك نێزیكە. نموونەیا وێ ژی زمانێ پەهلەوییە كو ل دەربارێن پاشایێن ئیرانی بەلاڤبوویە و ئەڤ زمانە دگەل زمانێ كوردی ئێكدگرن. پێداچۆن بدیرۆكا مرۆڤایەتیێ نیشان ددەتن كو ئەڤ گرێ یە فاكتەرەكێ مەزنێ تێكدانا پەیوەندیێن نەژادی بوویە، و ئەڤڕۆكە جۆهی و ئەرەب لشوینا لێك نێزیكیێ مەزنترین دوژمنێن هەڤدۆنەو ب هەمان ڕەنگ ژی نەژادێ پارسی بلایەنێ كێمی ڤە لڤان هزار و چارسەد سالێن بۆری دا، ئێك ژ ئاستەنگێن مەزن بوویە لبەر گەلەك ژ ماف و داخوازی یێن كوردستانیان، لدەمەكی كە لێكنێزیكیا ڤان دوو نەتەوان دشیا ببیتە دەرگەهێ دورستبوونا ئێكەتییەكا مەزن وەك ئێكەتییا ئەورۆپا، كو ڕۆلەكێ مەزنێ سیاسی و ئابوری و جڤاكی و فەرهەنگی و كەلتووری ل دەڤەرێ و جیهانێ بگێڕیتن، نەخاسمە ژی جهێ جیۆپۆلەتیكا وان گەلەك زەنگین و هەستیارە. ئەڤ ئێكگرتنە دشیا وەك سەردەمێ كۆرۆشێ مەزن كارتێكرنێ لسەر شارستانیەتا مرۆڤایەتی ژی بكەتن، بەلێ جهێ داخێ یە، ئەڤڕۆكە، هەر ئەڤ نەتەوەیێ ئاریایی ئێكە ژ ئاستەنگێن مەزنێن بدەستڤەهاتنا خەونا نەتەوەیێ كوردی، لدەمەكێ كو ل جیهانا ئەڤڕۆدا گەلەك كەس خودان وەڵاتن كو هژمارا وان گەلەك كێمترە ژ كوردستانیان، و چ گومان تێدا نینە دبیتن ئەڤ ئێكگرتنە خەونا گەلەك تاكێن كوردو پارس ژی بیتن.
*بسپۆرێ پێداگۆگیا و سایكۆلۆژیێ / بەشێ دەروونزانیێ / زانستگەها زاخۆ