زەردەشت پیامبەرێ ئاریایی د هزر و بیرێن خۆ یێن كو وەكی ڕێنمایی د پەرتووكا یا پیرۆز، ئەڤێستایێ دا ئینای و لسەر خەلكێ دابەشكری ژبلی كو كۆبیری و تەكەزەكا مەزن لسەر خالا چاكیێ و قەنجیێ دكەتن د هەمی گۆتار و هزر و كریارێن مرۆڤی، پشكەك ژ ڤێ چاكیێ، كو ب باوەرا وی ب باشترین و مەزنترین ئاستێ خۆدێ پەرێستیێ دهێتەهژمارتن، بۆ لایەنێ كاری و پیشەیی لنك خەلكێ خۆ یێ ئاری ددا زانین و ئارەزوویا وی ئەو بوو كە خۆدایێ باشیێ، ئانكۆ ئەهوەرامۆزدا، د ڤێ جیهانا خاكی و گەردوونێ مەزن دامرۆڤێن باش و چاك بێبەهر نەكەتن ژ مەزناهیێ و زانینێ و دارایێڤە، لێ د هەمان دەمدا ژی باوەرا وی ئەو بوویە كە ئەڤ مەزناهی و زانیاری و ئاستێ بلندێ ئابوورینە كو نە بڕێكا هەوانتەیی و ژخۆڤە بدەستڤە دهێتن، بەلكۆ ب رەنج و ماندیبوون و كار و پیشەوەریێ ڤە مرۆڤێن باش دێ شێن بگەهنە ڤان ئاستێن بلند. بێكاری و خۆ ژ كاری و پیشەروەریێ ڤەدزین و تەمبەلی د ڤی ئایینێ پیرۆز دا تشتەك نەپەرژاندی و كرێت بوویە و چ جاران بانگەشە بۆ نەهاتیە كرن.
پێشكەفتنا جڤاكی و شارستانیەتێ و كۆمەلگەها نوی یا كشتۆكالی تنێ بڕێكا كارتێكرنا باوەریێ و دەست و باسكێن تاكێن وێ جڤاكێ و بزاڤ و ماندیبوون و كارێ تاك تاكی وان دهێتە سەرگرتن و تنێ ئەڤ بۆهایەنە كە وێ كۆمەلگەهێ پێش دئێخیتن، و ژبەر ڤێ چەندێ بوویە كە ب باوەریا زەردەشتێ پیامبەر ڕێز و شكۆ و پرستیژ و مەزناهی، سامان و دارایی، دەستهەلات و ئازادی و ئاسایێشا جڤاكی و رامیاری و سایكۆلۆژییا وێ هەمیگرێدای بوویە ب هندێڤە كە د جڤاكێدا پترتر و پترتر تاك خۆ ماندی بكەن و كارێ خۆ بڕێڤە ببەن و ژ كاری و كاركرنێ ڤەنەقەتیێن.
پیشە و كارێ مرۆڤی و دگەلدا ژی راستی و قەنجییاتی و باشی و بزاڤ بۆ خۆ ماندیكرن بۆ بدەستڤەئینانا ژیانەكا ئارام و ئاسوودە و تەنا و پاراستنا سەربخۆیی و كۆمكرنا دارایی و سامانەكێ باش ئێك ژ ئارمانجێن ژیانا تاكی د جڤاكا زەردەشتیدا دهاتە هژمارتن. لێ ب باوەرا وی هەمی كەسەك نەشێتن بگەهیتە ڤێ چەندێ و ببیتە خۆدان سامان و ژیانەكا باش و ئاسوودە و بەختەوەر. ڤێ ئێكێ هندەك مەرجێن هەین كە زەردەشتێ پیامبەر هەبوونا ساخلەمی و تەندروستیێ، هێز و شیانەكا باش ب ئێك ژ وان مەرجێن سەرەكی دزانیتن كو بۆ گەهشتنا مرۆڤی وان ئارمانجێن گرنگ فەر و پێدڤی دبینیتن. لەوما ژی زەردەشتی گرتنا رۆژیێ ل ئایینێ خۆ دا نەدەیناندییە و ب باوەرا وی نەخوارن و ڤەنەخوارن جەستەیێ مرۆڤی لاواز و سست و خاڤ دكەتن و وزەیێ پێدڤی ناگەهینیتە وی جەستەی و ئەڤ مرۆڤە ژی نەشێتن كارێ كێلانا ئەردی و جۆتیاریێ ئەنجام بدەتن. ژ لایەك دیتر ڤە زەردەشتی باوەری ب هندێ هەبوو كو ئەڤ چەندە و برسیاتیە هەتاكۆ كارتێكرنێ ل ئاستێ مێنتالی و سایكۆلۆژی و هزرییا وی ژی دكەتن و وان لاواز دكەتن. هەبوونا هێز و شیانێ و زارۆكێن تەندروست پێدڤی ب پویتەدانێ یە ب خوارنێ و هەكەر خوارن ل گۆڕێ نەبیتن پشكا وی مرۆڤی ئازار و ئەشكەنجەدانا خۆیە و بەهرا وی لاوازی و مرنە، و ژ ڤێ چەندێ یە كە د ڤی ئایینی دا مرۆڤێ بهێز و خۆدان شیان پترتر جهێ پویتەی و بایەخێ جڤاكی و خەلكێ بوویە و باوەری لنك وان كەسان ژ یێن دیترێن لاواز و سست و خاڤ پترتر د ئاستەك بلندتر دا بوویە. ئەڤ چەندە بۆ هندێ دزڤڕیتن كە مرۆڤێ خۆدان هێز و شیان پترتر ڕێزێ ل ژیانێ و جڤاكێ و جیهانێ دگریتن و یا شیای بڕێكا كار و كریار و هێز و شیانا خۆ یا پیشەیی ڤە ڤی سامان و ڤێ دارایێ پێكڤە كۆم بكەتن كە بۆ بەرگریكرن ژ خۆدێ خۆ و خێزان و جڤاكا وی ژ مەترسیێن سەرمایا زڤستانێ و خەلایێ و هشكەسالیێ بپارێزیتن، و هەروەسا ژی وان ژ مەترسیێن پەیوەندارن ب دوژمنان و نەیاران بپارێزیتن و بشێتن بڤێ چەندێ ئارامی و ئاسایشەكا پەیت و بهێزا سایكۆلۆژی و جڤاكی بۆ خێزان و جڤاكێ دابین بكەتن و ببیتە ئەگەرێ بەردەوامیێ بۆ مان و ژیانا جڤاكا خۆ.
ژێدەر:
- رەزا، هاشم ( 2012 ). زەردەشت پێغەمبەرێ ئیرانی دێرین، وەرگێڕان: وریا قانع، دەزگای چاپ و بڵاوكراوەی جەمال عرفان، سلێمانی، كوردستان، ( 425 )ل.
- زیهنیر، ر. س. ( ب. س. ). الزّرادشتیە الفجر – الغروب، ترجمە: د. سهیل زكّار، التلوین، دمشق: سوریە، ( 530 )ص.
- غانم، خالد السید محمد (2006 ). الزّرادشتیە تاریخیاً و عقیدە و شریعە دراسە مقارنە، گ. 1، خگوات، دمشق:سوریە، ( 399 )ص.

*بسپۆرێ پێداگۆگیا و سایكۆلۆژیێ / بەشێ دەروونزانی / زانینگەها زاخۆ