بەپێی ئەو زانیارییانەی لە ویكیپیدیا دەربارەی تەمەنی ئایەتوڵا عەلی سیستانی مەرجەعی باڵای شیعەی نەجەف بڵاو كراوەتەوە، لە ساڵی 1349ی كۆچی لە شاری مەشهەدی ئێران لە دایك بووە و ئێستاش ساڵی 1441ی كۆچییە، واتە بە ساڵنامەی كۆچی تەمەنی 92 ساڵە و ئەگەر وەریگێڕینە سەر ساڵنامەی زایینی و لەبەر ئەوەی ساڵی كۆچی 10 رۆژی لە ساڵی زایینی كەمترە، ئەوا تەمەنی سیستانی دەگاتە دەوروبەری 90 ساڵ. لە بەرامبەردا و بەپێی هەمان سەرچاوە، تەمەنی ئایەتوڵا عەلی خامەنەئی رابەری شۆڕشی ئیسلامیی ئێران لە ساڵی 1949 لە شاری مەشهەدی ئێران لە دایك بووە و ئێستا تەمەنی شتێك لە 80 ساڵ زیاترە، كەچی ئەمریكییەكان گرەو لەسەر تەندروستییە ناجێگیرەكەی دەكەن و دەڵێن ئێستا توانای بەڕێوەبردنی تەواوی كۆماری ئیسلامی ئێرانی نەماوە و ناشتوانێت بۆ ماوەیەكی درێژ وەك مەرجەع و رێبەری كۆماری ئیسلامی ئێران بمێنێتەوە و، لەوانەیە لە ئایندەیەكی نزیكدا یەكێكی دیكە، یان چەند كەسێك شوێنی بگرنەوە، بەمەش ئاراستەی كۆماری ئیسلامیی ئێران گۆڕانكاری گەورەی بەسەردا دێت و لەوانەیە كۆماری ئیسلامیی ئێران چیدیكە پابەندی (هەناردەكردنی شۆڕشی ئیسلامی) بۆ دەرەوەی نەبێت.
ئامانج لە بەرارودكردنی تەمەنی سیستانی و خامەنەئی ئەوەیە، ئەگەر خامەنەئی لە تەمەنی 80 ساڵیدا، كە راپۆرتە ئەمریكییەكان بە پشتبەستن بە راپۆرتی پزیشكی ئاماژەی پێ دەكەن، توانای تەواوی وەك مەرجەع و رێبەری كۆماری ئیسلامی نەمابێت، ئایا سیستانی لە تەمەنی 90 ساڵیدا توانای ئەوەی ماوە بە باشی بارودۆخی سیاسیی عێراق بخوێنێتەوە و فەتوای دروست لە سەر رەوشی رووداوەكانی ئێستای عێراق بدات؟ یان ئایا لە ئێستادا ئەو كەسایەتییە كاریزمایە بێت كە لە خۆپیشاندانەكاندا وێنەكانی بەرز بكرێتەوە و وەك رابەری شۆڕشی (حوسێن) لە عێراقدا بناسرێت؟.
ئەوجا لەگەڵ ئەوەی ئیمام و پێش نوێژ و وتەبێژی مەرجەعییەت لە یەك دوو هەفتەی رابردوو بە ناوی مەرجەعییەتەوە رایگەیاند كە نابێت چیدیكە خۆپیشاندەران وێنەی سیستانی لە خۆپیشاندانەكان بەرز بكەنەوە، بەڵام لە هەمان كاتدا و بە بڕیاری لابەلا فەرمان دەدرێت كە وێنەی سیستانی لەسەر دامودەزگا فەرمییەكانی حكومەت هەڵبواسرێت. لێرەدا پرسیار ئەوەیە: ئایا ئەمە مانای ئەوە نییە كە ئایەتوڵا عەلی سیستانی-یش بە هۆی زۆریی تەمەنی و باری تەندروستییەوە توانای قسەكردن و بڕیاردانی نەماوە؟ یان ئەو كەسانەی بە ناوی مەرجەع و سیستانییەوە پەیام بڵاو دەكەنەوە، گومانی ئەوەی لەسەر دروست نابێت كە ئەم قسە و پەیامانە راستەوخۆ قسە و پەیامی سیستانی نین؟.
دیارە ئەوەی گومانی ئەم پرسیارە زیاتر تۆخ دەكاتەوە، ئەو لێدوان و پەیامانەیە كە سەركردەی لایەنە سیاسییەكانی شیعەی عێراق بڵاوی دەكەنەوە و دەڵێن: سەركردە سیاسییەكانی شیعە تا ئەو كاتە پابەندن بە پەیام و قسەكانی سیستانییەوە كە لە بەرژەوەندیی خۆیاندا بێت، ئەگەر بزانن لە بەرژەوەندیی خۆیاندا نییە، ئەوا فەرامۆشی دەكەن، هەروەك چەندین جاری دیكەش فەرامۆشیان كردووە.
هەروەها چەند ساڵێكیشە ئەم حاڵەتە لە سیاسەتی دەرەوەی ئێراندا رەنگی داوەتەوە، بۆ نموونە هەڵوێست و پەیامەكانی ئایەتوڵا خامەنەئی لە ساڵی 2015 لە سەر رێككەوتنی ئەتۆمی ئێران لەگەڵ دەوڵەتانی 5+1 جۆرێك بوو، هەڵوێستی حكومەتی ئێرانیش شتێكی دیكە بوو، هەروەها لە دوای دەرچوونی ئەمریكاش لەو رێككەوتنە، بە ئاشكرا دەبینین كە هەڵوێستی حكومەتی ئێران لەسەر زاری رۆحانی (سەرۆك كۆمار) و جەواد زەریف (وەزیری دەرەوە) جۆرێكە كە بە هەموو جۆرێك دیالۆگ و دانوستاندن لەگەڵ ئەمریكا رەتناكاتەوە، بەڵام هەڵوێستی رابەری كۆماری ئیسلامی ئێران بە هەموو جۆرێك دانوستاندن و دیالۆگ رەتدەكاتەوە.
ئەم حاڵەتەی ئێستای هەر دوو مەرجەعییەتی (قوم و نەجەف) كە بە حیساب ئاراستەی هاوكێشە سیاسییەكانی دوو وڵات دەكەن، سەردەمی مەرجەعییەت و رابەرایەتیی (ئایەتوڵا خومەینی)مان بە بیر دێنێتەوە كە لە 8ی ئابی 1988 بەو جۆرە پەیامەكەی بڵاوكراوەیە كە گوتوویەتی: «رازیبوون بە راگرتنی شەڕی عێراق و ئێران (بڕیاری 598ی ئەنجومەنی ئاسایش) بۆ من وەك خورادنەوەی پیاڵەیەك ژەهرە»، ئەوكات ئەم پەیامە بە ناوی ئایەتوڵا خومەینی بڵاو كرایەوە كە تەمەنی 86 ساڵ بووە و تەنیا دوای 10 مانگ لە حوزەیرانی 1989 كۆچی دوایی كردووە، ئەوەشی هاتە جێگەی ئایەتوڵا خومەینی، واتە ئایەتوڵا خامەنەئی كە ئێستا رێبەری كۆماری ئیسلامیی ئێرانە، ئەمەش ئەوەمان پێ دەڵێت، لەسەردەمی ئایەتوڵا خومەینی، نەوە تازەكەی دوای «ئیمام خومەینی» بۆچوونێكی دیكەیان بۆ خوێندنەوەی هاوكێشە سیاسییەكان هەبووە و لە هەمانكاتدا بە ناوی «فەتوای ئیمام»ـەوە مامەڵەیان لەگەڵ هاوكێشە تازەكان كردووە، خۆ ئەگەر وا نەبوایە، دوای ئەوەی رژێمی سەدام حوسێن ناوی رۆكێتە دوورمەوداكانی یەكێتی سۆڤیەتی پێشانی گۆڕی بۆ رۆكێتەكانی (حوسێن و عەباس و عابد و.. هتد) راستەوخۆ ناو تارانی پایتەختی پێ بوردمان دەكرد، دەبوو ئەوكاتە (پەرداخە ژەهرەكە بخورایەتەوە) نەك دوای ئەوەی هێرشە مووشەكییەكان كۆتاییان پێ هاتبوو.
دیارە ئەو كەسانەی دەبنە مەرجەع لە شیعەدا، هەتا ئەو كاتەی كۆچی دوایی دەكەن، لەو پۆستە دەمێننەوە، بەڵام زۆر جار تەمەن و تەندروستی دەبنە رێگر لەوەی كە مەرجەع رۆڵی خۆی بگێڕێت، بۆیە لەم حاڵەتەدا نەوەی تازەی دوای مەرجەع بە بیروبۆچوونی تازە ئاراستەی هاوكێشە سیاسییەكان دەخوێننەوە، ئەم حاڵەتە لە رژێمی پادشایەتی دەوڵەتانی عەرەبی سوننەشدا هەبووە، هەر بۆ نموونە: شاحوسێنی پادشای ئەردەن لەو كاتەی لە نەخۆشخانەی مایۆكلینگ بوو لە ئەمریكا، بۆ چەند رۆژێك هێنایانەوە بۆ ئەوەی جێنیشنی دوای خۆی لە شازادە حەسەنەوە بگۆڕێت بۆ شازادە عەبدوڵا، بەڵام ئایا ئەمە قەناعەت و بیركردنەوەی شا حوسێن بوو، بێگومان نەخێر، بەڵكو نەوە تازەكەی دوای شا حوسێن ئەوەیان فەرز كرد و بە شا حوسێنیان جێبەجێ كرد، بێگومان ئێستا بەڕێوەبردنی پادشایەتی سعودیەش بەو جۆرەیە، لەلایەك شازادە محەمەد بن سەلمان پەیام بەم لا و بەو لا دەنێرێت كە سعودیە ئامادەیە لەگەڵ ئیسڕائیل پەیوەندییەكانی ئاسایی بكاتەوە، هەڵبەت بە نهێنی و لە ژێرەوە، بەڵام شا سەلمان هەڵوێستێكی دیكەی هەیە و ئەوەشی ئەمریكا وئیسڕائیل مامەڵەی لەگەڵ دەكەن، پەیوەندییە ژێربەژێرەكەی شازادە محەمەد سەلمانە، نەك پەیامە ئاشكرا و راستەوخۆكانی شا سەلمان.
كەواتە لێرەوە زەمینەی ئەوە دێتە ئاراوە كە بڵێین: نە كۆماری ئیسلامی تەواو بەو ئاراستەیە بەڕێوە دەچێت كە ئایەتوڵا خامەنەئی لە ساڵی 1989- 2015 (ساڵی ئیمزاكردنی رێككەوتنی ئەتۆمیی ئێران لەگەڵ دەوڵەتانی 5+1) بەڕێوەی بردووە)، نە مەرجەعییەتی شیعەی نەجەفیش ئەو مەرجەعییەتەیە كە سیستانی لە 2003 – 2014 (ساڵی فەتواكەی مەرجەعییەت بۆ دروستكردنی حەشدی شەعبی) رێبەرایەتی كردووە.
ئەوجا ئەگەر لەسەر ئەم بنەمایە، سەیری رۆڵی مەرجەعییەتی نەجەف لە هاوكێشە سیاسییەكان و سەیری رۆڵی رابەری ئیسلامی لە ئاراستەی دیپلۆماتییەتی دەوڵەتی ئێران لە ناو كۆمەڵگەی نێودەوڵەتی بكەین، هەست دەكەین مامەڵەكردنی رابەری كۆماری ئیسلامیی ئێران و مامەڵەی مەرجەعییەتی نەجەف، لەگەڵ خوێندنەوەی هاوكێشە سیاسییەكان زیاتر ئاراستەی نەوە تازەكەی دوای هەردوو مەرجەعییەتی پێوە دیارە، نەك خودی ئەو مەرجەعانەی كە ئێستا لە ژیاندا ماون و بە ناوی ئەوانەوە پەیام و فەتوا بڵاو دەكرێنەوە، هەر بۆ نموونە:
1. لە ساڵی 2015 كاتێك ئێران رێككەوتنی ئەتومی لەگەڵ دەوڵەتانی 5+1 ئیمزا كرد، هەتا ئێستاش وەك دەوڵەت پابەندە بەو رێككەوتنە، سەرەڕای ئەوەی كە هەر لە سەرەتاوە رابەری كۆماری ئیسلامیی ئێران هەڵوێستێكی دیكەی توندی هەبووە.


2. ئەو گەمە دیپلۆماتییەی ئێستا نەوە تازەكەی دوای خامەنەئی لەگەڵ سزاكانی ئەمریكا لە دژی ئێران دەیكەن، گەمەیەكە جیاوازە لە بیركردنەوەی پێشتری خامەنەئی، هەر بۆ نموونە: دیپلۆماتییەتی ئێرانی هەتا ئێستا لە رێككەوتنی 5+1 نەهاتۆتە دەرەوە، ئەمە لەكاتێكدا، چەند دەوڵەتێك بۆ نموونە (فەرەنسا، بەریتانیا و تا راددەیەك ئەڵمانیا)، لە چەندین بڕگەی سزاكانی ئەمریكادا پشتگیری ئەمریكا دەكەن، بەڵام دیپلۆماتییەتی ئێرانی، توانیویەتی مامەڵەیەكی باشیان لەگەڵ بكات، كە ئەم مامەڵە باشەی دیپلۆماتییەتی ئێرانی لەگەڵ پەیامەكانی خامەنەئی یەك ناگرنەوە.


3. رابەری كۆماری ئیسلامیی ئێران بانگەشە بۆ ئەوە دەكات، دەبێت ئیسڕائیل لەسەر نەخشەی جیهان بسڕێتەوە، بەڵام بە كردەیی ئێران مامەڵەیەكی دیكە لەگەڵ ئیسرائیل دەكات و لەگەڵ ئەوەی ئیسڕائیل تا ئێستا چەندین جار هێزەكانی ئێرانی لە ناو سووریا بۆردومان كردووە، بەڵام لەبەرامبەردا ئێران و وەكیلەكانی بێدەنگییان هەڵبژاردووە، ئەمەش بە دیپلۆماتییەتێكی زیرەك پێناسە دەكرێت و لەگەڵ پەیامە توندەكانی رابەر یەك ناگرێتەوە.
4. مەرجەعییەتی شیعەی نەجەف (ئایەتوڵا) سیستانی لە ماوەی 2003-2014 كەم تا زۆر راستەوخۆ خۆی تێكەڵاوی پرۆسەی سیاسی لە دەوڵەتی عێراقدا نەكردووە، بەڵام لەگەڵ دەركەوتنی داعش و راگەیاندنی خەلافەتی ئیسلامی لە موسڵ، مەرجەعییەت بڕیاری رەشبگیری لەژێر ناوی دروستكردنی (حەشدی شەعبی) دا، بەڵام كێ بوون ئەوانەی لە ناو حەشدی شەعبی رۆڵی گەورەیان بینی؟ بێگومان فەرماندەی ئەو میلیشیا شیعەكان بوون كە پێش دروستبوونی حەشدی شەعبی لە سووریا جیهادیان بۆ مانەوەی رژێمی ئەسەد دەكرد، لەمەش زیاتر چەندین راپۆرتی سەربازیی ئەمریكا و رۆژئاوا لەبەر دەستن و پێداگری لەسەر ئەوە دەكەن، كە ئەو فەرماندەیانەی حەشدی شەعبی كە پابەندی فەتوا و بڕیارەكانی مەرجەعییەتی نەجەفن، لەلایەن دەستەی حەشدی شەعبییەوە هەمان ماف و ئیمتیازاتی ئەو میلیشیایەیان نییە كە پابەندی مەرجەعییەتی قوم و فەرماندەكانی سوپای پاسدارانن. هەر بۆیە پرسیار لێرەدا ئەوەیە: ئایا ئایەتوڵا سیستانی فەتوای بۆ دروستكردنی حەشدی شەعبی بۆ ئەو مەبەستە دەركرد كە ئاراستەی عەقیدەی شیعەی عێراق بگۆڕێت بۆ تێكەڵاوكردنی ئایین و سیاسەت، یان ئەمە بیركردنەوەی ئەو نەوە تازەیەیە كە لەژێر ناوی مەرجەعییەتدا و بەناوی مەرجەعییەتەوە ئامانجە سیاسییەكانی خۆی جێبەجێ دەكات؟

5. ئەگەر سەیری پرۆسەی ئامادەكاری بۆ بەشداریی میلیشیاكانی حەشدی شەعبی لە هەڵبژاردنەكانی ئایاری 2018 بكەین، وەك هەموو لایەك بینیمان، مەرجەعییەت هیچ قسەیەكی لەسەر ئەوە نەبوو كە ئەم میلیشیا سەربازییانە تێكەڵاوی پرۆسەی سیاسیی عێراق بن، ئەمە لە كاتێكدا بەپێی ئەو فەتوایەی مەرجەعییەت، حەشدی شەعبی بۆ یەك ئامانج دروست بووە كە ئەویش شەڕی دژی داعش بوو، دوای ئەو شەڕە دەبێت بگەڕێنەوە سەر كاری خۆیان، بەڵام میلیشیاكانی حەشدی شەعبی بەشداریی هەڵبژاردنیان كرد و، سەرەنجامیش جڵەوگیری پرۆسەی سیاسیی عێراق كەوتە دەستی حەشدی شەعبی.
6. لە ئێستای خۆپیشاندانەكانی عێراقدا، مەرجەعییەت هەتا وتاری رۆژی هەینیی رابردووش، پشتگیریی زمنی خۆی بۆ حكومەتی ئێستای عێراق نەگۆڕیوە، لەمەش زیاتر وەك جنین هیسن نوێنەری نەتەوە یەكگرتووەكان لە عێراق دوای دیدارەكەی لەگەڵ سیستانی رایگەیاند، (بە قسەی جنین) سیستانی گوتوویەتی: هێزە سیاسییەكانی دیكە لەبەر ململانێی پۆست و دەسەڵات كارێكیان كردووە كە دەسەڵاتی جێبەجێكردن (مەبەستی حكومەتی ئێستای عێراقە) نەتوانێت چاكسازی بكات، ئەم پەیامەی مەرجەعییەت پشتگیری تەواوە لەمانەوەی ئەم حكومەتە.
7. ئەوانەی ئێستا لەسەر شەقامەكانی شارە گەورەكانی عێراق خۆپیشاندان دەكەن، جیا لەوەی هەموویان گەنجن و تەمەنیان لە نێوان (15-25) ساڵیدایە، لە هەمانكاتدا هەموویان داوای هەڵوێستێكی ئاشكرای مەرجەعییەت دەكەن و پابەندبوونیان بە مەرجەعییەتەوە دووبارە دەكەنەوە، تەنانەت وەك كاردانەوەیك بەرامبەر بە وتاری رۆژی هەینیی رابردوو، بەشێك لەو گەنجانە داوای ئەوەیان دەكرد كە دەبێت لەمەودوا مەرجەعییەت فەرمان بدات، نەك داوا لە حكومەت بكات، چاكسازی ئەنجام بدات.

8. لەبەر ئەوەی مەرجەعییەت بە كردەیی پشتگیری لە مانەوەی حكومەت و دەسەڵاتی ئێستای عێراق دەكات، لایەنە سیاسییەكانی شیعە ناچار بوون لە ماڵی عەمار حەكیم كۆببنەوە و لەسەر بەرنامەیەك بۆ ئەنجامدانی چاكسازی رێك بكەون، لەبەرامبەریشدا خۆپیشاندەران زۆر بە راشكاوی باس لە «دەوڵەتی حوسێن» دەكەن، ئەمەش مانای ئەوەیە دەوڵەتی حوسێن دەبێت دەوڵەتی دادپەروەری و خزمەتگوزاری بێت.
9. موقتەدا سەدر لەگەڵ ئەوەی دەیەوێت خۆی وەك جێگرەوەی مەرجەعی نەجەف نمایش بكات، بەڵام ئەمە دووەمین جارە كە لەو كارەیدا شكست دەهێنێت، هەر بۆ نموونە لە دوای هەڵبژاردنەكانی ئایاری 2018 و سەركەوتنی هاوپەیمانیی سائیرون وەك هاوپەیمانیی پەلە یەك، هەوڵیدا رۆڵێكی باوكایەتی وەك مەرجەعییەتی هەموو عێراق لە پرۆسەی سیاسیی عێراقدا بگێڕێت و، بە حیساب حكومەتێك دروست دەكات كە هەم مەرجەعییەتی نەجەف و هەم مەرجەعییەتی قوم لێی رازی بن، بەڵام وەك دەركەوت، لەم كارەیدا سەركەوتوو نەبوو، سەرەنجام هاوپەیمانیی فەتح بە سەرۆكایەتیی هادی عامری حكومەتی پێكهێنا، لە سەرەتای هەڵبژاردنەكانی ئێستای عێراقیشدا، زۆر هەوڵیدا جارێكی دیكە ئەو رۆڵی مەرجەعە بگێڕێت و بڕیاری هەڵوەشانەوەی حكومەت بدات، هەر بۆ ئەمەش داوای لە عادل عەبدولمەهدی كرد، دەست لەكار بكێشێتەوە، بەڵام وەك بینیمان سەرۆك وەزیران وەڵامی داواكەی سەدری نەدایەوە، بەڵام سوپاسی هەڵوێستی مەرجەعییەتی كرد، هەروەها سەدر بۆ سەركەوتنی ئەم ئامانجەی نامەیەكی درێژی بۆ هادی عامری نووسی، سەرەنجام عامری-یش تەنیا بە دوو دێڕ وەڵامی دایەوە.
بە لەبەر چاوگرتنی خوێندنەوەی تازەی مەرجەعییەتی ( قوم و نەجەف) بۆ هاوكێشە سیاسییەكان و جیاواز لە شێوازە تەقلیدییەكەی كە پێشتر هەڵوێستی هەر دوو مەرجەعییەتی پێ ناسراوە، دەبینین، بە پێچەوانەی هەڵوێستە تەقلیدییەكەی پێشووی مەرجەعییەتی نەجەف، پرۆسەی سیاسی لە عێراقدا نەك هەر بەرەو ویلایەتی فەقیهی هاوشێوەی كۆماری ئیسلامیی ئێران هەنگاو هەڵدەگرێت، بەڵكو ئێستا گۆڕدراوە بۆ «دەوڵەتی حوسێن» كە ماناكەی گەڕانەوەیە بۆ دەوڵەتی «ئال ئەلبەیت»، دەوڵەتی (ئال ئەلبەیت) كە بۆ شیعەی عێراق لە شیعەكانی هەر شوێنێكی دیكە گونجاوترە، جارێكی دیكە حوسێن بە ئیمامی عەلی و ئیمامەكانی دیكەوە گرێ دەداتەوە و وەك باپیری خۆیان (لە باوكەوە) مامەڵەی لەگەڵ دەكەن، نەك وەك شیعەی ئێران كە مامەڵە لەگەڵ نەوەكانی حوسێن دەكان، وەك مامەڵەی باپیر (لە رێگەی دایكەوە) .


لێرەدا پرسیاری گرنگ ئەوەیە: ئایا وەرچەرخان لە دەوڵەتی (ویلایەتی فەقیهەوە) بۆ دەوڵەتی (ئال ئەلبەیت)، هیچ كێشەیەك لە نێوان بیركردنەوەی تازەی هەر دوو مەرجەعییەتی قوم و نەجەف، یان هەر دوو دەسەڵاتی دەوڵەتی عێراق و كۆماری ئیسلامیی ئێران دروست دەكات؟ لە وەڵامی ئەم پرسیارەدا دەڵێین: ئەگەر لە بیروبۆچوونە تەقلیدییەكەی هەردوو مەرجەعی (قوم و نەجەف) جیاوازییەكە ئەوە بووبێت كە (قوم) پێی وابووە دەكرێت (ویلایەتی فەقیهی) هەبێت، هەتا سەرهەڵدانەوەی «ئیمام مەهدی» و، مەرجەعییەتی (نەجەف) پێداگری لەوە كردبێت، هەتا سەرهەڵدانەوەی «ئیمام مەهدی» هیچ حوكمڕانییەك بۆ شیعە بوونی نابێت، ئەوا لە ئێستادا بیركردنەوەی تازەی هەر دوو مەرجەعییەتی (قوم و نەجەف) بەو جۆرەیە چۆن لەناو هاوكێشە سیاسییە تازەكانی ئێستای جیهاندا جێگە بۆ دوو (كۆماری ئیسلامی) دەكرێتەوە، بەدوو ناوی جیاواز و بە دوو تێڕوانینی جیاواز كە لە بنەڕەتیشدا هەموو ئەم جیاوازییانە لە یەك دید و تێڕوانینەوە سەرچاوە دەگرن، ئەویش فراوانكردنی حوكمڕانیی شیعەیە لە سەر ئاستی ناوچەكە.



ئەگەر سەرنج بدەین، دەبینین بانگەشەكردنی شیعەی عێراق بۆ «دەوڵەتی حوسێن» لە رووكاردا بە گەڕانەوەی شیعەی عێراق بۆ بازنەی عەرەبی و دووركەوتنەوە لە بازنەی فارسی دەخوێندرێتەوە، لەبەرامبەریشدا دروستبوونی ئەم دەوڵەتە دەبێتە پەردەیەك بۆ شاردنەوەی (هەناردەكردنی شۆڕش) بۆ دەرەوە كە ماوەی40 ساڵە كۆماری ئیسلامیی ئێران بانگەشەی بۆ دەكات.
بۆیە لەسەر ئەم بنەمایە كاتێك دەبینین خۆپیشاندەران، وێنەی ئایەتوڵا خامەنەئی و ئاڵای كۆماری ئیسلامیی ئێران لە نەجەف و كەربەلا دەسووتێنن، جیا لەوەی لەلایەك هێزەكانی حەشدی شەعبی بێدەنگن، لەلایەكی دیكەوە سوپای پاسداران زۆر بە گەرمی پشتیوانی لە مانەوەی حكومەتەكەی حەشد دەكات.