ئەردۆغان پێی وایە دروستكردنی ناوچەی ئارام لە باكووری سووریا بەهۆی دەستێوەردانەكەی لەو ناوچەیەدا، بە درێژایی 300 میل و بە 20 میل قووڵایی دەتوانێت دوو بۆ سێ ملیۆن پەناهەندە لەخۆبگرێت و ئەمەش دەبێتەهۆی ئەوەی ئەنقەرە لە سەرئێشەیەكی گەورەی ناوخۆیی رزگاری بێت، هەرچەندە ناچاركردنی هەزاران و بگرە ملیۆنان پەناهەندەی سووری بۆ ناوچەی ئارام كارێكی مەحاڵ بێت، بەڵام ئەردۆغان تێڕوانینێكی پێچەوانەی هەیە.
رەنگە پلانەكەی ئەردۆغان بۆ ناردنەوەی ملیۆنان ئاوارەی عەرەبی سووری بۆ ناوچە كوردنشینەكانی نێو سووریا كە بە تێڕوانینی ئەو دەبێتە هۆی گۆڕینی پێكهاتەی ئیتنی ناوچەكە و، دەبێتە هۆی لاوازكردنی زیاتری كورد، بەڵام دەبێتە هۆی زیادكردن و هەڵكشانی گرژییەكانی نێوان كورد و عەرەب و ناكۆكییش لە ناوچەكەدا دروست بكات، كە تا راددەیەك سەقامگیر بووە. بەپێی یاسای نێودەوڵەتی ئەردۆغان ناتوانێت پەناهەندە سوورییەكان ناچار بە گەڕانەوە بكات، كە رەنگە بتوانین بە دڵنیاییەوە بڵێین كە ئەوان ئارەزوومەندانە ناگەڕێنەوە، تەنانەت ئەگەر ئەو زۆنی ئارامییەش دروست بكرێت.